1 Tesaloniike Siè 1
1
Tìɛníkɛrɔ́
1Ǹpe Pooli àá Silivɛn#1.1 Silivɛn ɛ́ iè Pooli ɓà ńbèɓán nùún lɛ ɛ́ ɓɛ́ lò ɛ́ wóò bĩní ve nɛ Silaasi (Vɛ húi Bɔw 15.22). àá Timote ɛ́ te lepe vɛ̃hṹ sɔlɛ ɛ́ wĩ́ ɛ́ ke ɛ̀ lɛ́ mípe Tesaloniike lóo Dɔfĩn zũnù nìɛ ǹ, mìpe lɛ bòo ɛ́ sɛ̃̀ à Yàá Dɔfĩn àá ɔ̀ Ɲunsɔ Yiezu Kirisa ǹ: Nɛ Dɔfĩn hiì àá pehɔ̀ hũn-wiɛ̀ ɛ̀ wé àá miɛ.
Tesaloniike lóo ńdɛsĩ̀rìe te dàarɔ́ àá peɓɛ̀ ńdɛsĩ̀nlɔ́ bòo
2Ké wóò dé Dɔfĩn bɛrikɛ fúu mìpe mìkùi bòo hũn, ɛ̀ kè lò wóò nùún mí bòo fúu kè Dɔfĩn hɛ̃nnɛ hũn. 3Ké den wóò liení mí bòo fúu kiè Yàá Dɔfĩn híɛhɔ́; ké wóò liení mí ńdɛsĩ̀nlɔ́ tɔnlɔ́ lɛ ɛ́ hɔ́ ɛ́ tɛ́ bòo, àá mí wanminu bòo lɛ ɛ́ hɔ́ ɛ́ wé bòo àá bòo lɛ ɛ́ mí tĩì bènlén dàa fɛ́sí dɛ̃̀ sãa ɔ̀ kè Ɲunsɔ Yiezu Kirisa ǹ. 4Kìe zɛ̀ɓɛ̀ lɛ ɛ́ Dɔfĩn ɛ́ wɛ, ké dũ kɛ́ hɔ́pe Dɔfĩn ɛ́ munɛ miɛ nɛ mi bòo ɛ̀ sɛ̃̀ mí ǹ. 5Iè hɔ̀ lɛ ɛ́ pɛ̃̀hṹ lɛ ɛ́ ké dàa hàarí khɛ́ lé Bentĩnu ɛ́ lɛ́ miɛ ǹ, ɛ́ lé yí wé ɲɛ-bienù mí dòonún, kɛ́ Mɛkɛ̃n-Sãanu pànkɛ́ àá pehɔ̀ ńyíinín ɛ́ hàarí wi yán, ɛ́ ké dàa dũnɛ sãaniɛ kɛ́ ké biehĩ́ ɛ́ hàarí bɔn. Mí lò wo dũ bòo lɛ ɛ́ ké dàa hàarí dàa kète mì tĩ́ihṹ ɛ́ hɔ́ dàa wɔ́ ńyíinín mì viì. 6Mí kerɛ kèpe kè te dàarɔ́ àá ɔ́ Ɲunsɔ te dàarɔ́ ǹ; mí hàarí wi le sɛ̃́ɲíi hũn kɛ́ mí den pɛ́wi tɛ̀ lè Bentĩnu bòo àá tĩwiɛ̀ lɛ ɛ́ lé àá lépe Mɛkɛ̃n-Sãanu viì. 7Ɛ́ kɛ̀amu, ɛ́ mí iè pe wo wɔ́ nìɛ lɛ ɛ́ hɔ́ Maseduanɛ àá hɔ́ Akayi ńdɛsĩ̀riè ɓɛ́kùi ɛ́ wóò húi ɛ̀ dàá wé ɓɛ́ bòo. 8À Ɲunsɔ bienù ɛ́ hàarí ɓɛrɛ lɔ́ àá mípe mì vìi ɛ́ dàa van lɔ́ dɛ̃un hɔ̀ Maseduanɛ àá hɔ́ Akayi; kɛ́ hɔ́ lò den yí hɔ́pe sí mí dòonún wɛ̀; kɛ́ bĩní páa yán, ɛ̀ hɔ̀ lɛ ɛ́ mí dũmuasɛ̃̀ Dɔfĩn ɛ́ bòo saa van tú viì míkùi, ɛ́ ké yɛ̀rɛ́ wo bĩniɛ mɛ̀kóo mí ɛ̀ kè bie hɔ wɛ̀. 9Pɛ̃̀hṹ lɛ ɛ́ ké hàarí ɓɛrɛ dɛ̃un mì viì ɛ́ bòo lɛ ɛ́ mí dàa hàarí perɛ kie ǹ sãàniɛ ɛ́ ɓɛ́ nìnbirìe ɛ́ bòo ɛ̀ bie àá bòo lɛ ɛ́ mí dàa pɛ̃́ hɔ̀ wɛ̃̀hɛ̃ bòo ɛ̀ mì khũ̀a khie tɛ̀ hɔ̀ Dɔfĩn bòo ɛ́ pehɔ̀ tɔnlɔ́ ɛ̀ tɛ́, hɔ̀pe lɛ ɛ́ temu iè pe Dɔfĩn àá bɔ̀bín ɛ̀ Hɔ̀ lò yìe wi. 10Ɛ́ mí wo ɛ́ hìé nɛ piè Zuú Yiezu ɛ̀ yòó lé hɔ́ hóohũn ɛ̀ ɓen síɛ. À iè ɔ̀pe ɛ́ hɔ́pe Dɔfĩn ɛ́ vìeniɛ líeniɛ hɔ̀ húmú hũn, ápe ɛ́ te kie ɓén leń ɛ́ lé hɔ́pe Dɔfĩn tĩcĩ̀nín lɛ ɛ́ ɓen hũn.
Currently Selected:
1 Tesaloniike Siè 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
