1 Zãn 2

1Niǹ nìɛ, nín hɔ̀pe bòo lɛ ɛ̀ wĩ́ ɛ̀ lɛ́ miɛ ǹ kɛ̀amu bòo lɛ ɛ́ wé ɛ̀ mì dàá bí wé bɔ̀koohɛ̃ wɛ̀. Ɛ̀ hɛ̀rí kɛ́ ádɔ̀ ɛ́ wɔ́ bɔ̀koohɔ́, ɛ̀ kè ɛ́ dàa ɲɛtɛ̀ lɛ yòó van wi e Yàá viì, à Yiezu Kirisa, àpe lɛ ɛ́ cã̀aní. 2Ápe Yiezu míte ǹ ɛ́ lɛ́ míte ɛ́ ɓɛ́ ɓɔ́ ɛ́ wɔ́ àá miyiɛ́ ɛ́ dàa dɔ́ sɛ́wɛ́rí ɛ́ lɛ́ kiè ǹ kè bɔ̀koohɛ̃ bòo hũn. Kɛ́ hɔ́ lò yí képe kè-dòonún bɔ̀koohɛ̃ bòo hũn, kɛ́ hɔ́ lò ɓiɛ̀ iè lè dímíɲɛ́ nìɛ ɓɛ́kùi bɔ̀koohɛ̃ bòo hũn.

Hɔ̀ ńwɛní ɓán kɛ̀a ie zɛ̀ɓɛ̀ bòo sí

3Ɛ́ hɔ́ bòo lɛ temu mii lɛ́ ɛ̀ kè dàá dũń kɛ́ ké dũ Dɔfĩn ɛ́ iè hɔ̀ lɛ kɛ́ ké ɓen tɛ̀ pehɔ̀ ɲunù tɛmu. 4Kɛ́ nìnbírɔ dɔ̀ ɛ́ nɛ mípe dũ Dɔfĩn, kɛ́ á lò yí tɛ̀ pehɔ̀ ɲunù tɛmu bòo, hɔ́rɔsí ɛ̀ ɓàasɔ ɛ́ iè ɓɔ́-ɓúukɛ, ɛ̀ bɔ̀berà ɛ́ mí-ɛ̀ ǹ wɛ̀. 5Àlɛ kɛ́ á tɛ̀ Dɔfĩn bienù bòo, hɔ́rɔsí ɛ̀ Dɔfĩn wanminu ɛ́ ɲunù ɛ́ tú ɓàasɔ viì. Ɛ́ sí den iè bòo lɛ temu mii lɛ́ ɛ̀ kè dàá dũń kɛ́ ké canɓán àá Dɔfĩn. 6Àlɛ kɛ́ á bie nɛ mípe ɛ́ can dɛ̃̀ Dɔfĩn ɛ̀ ɓàasɔ ɛ́ ɓiɛ̀ sãawi à wóo dàá míte kɛ̀a ie Yiezu Kirisa bòo sí.

7Kìe nìɛ lɛ ɛ́ ń wɛ, lè yí ɲunù tɛmu dɛ̀fĩì ɛ́ nín wĩ́ ɛ̀ lɛ́ miɛ ǹ wɛ̀; kɛ́ lé iè ɲunù tɛmu dɛ̀kĩ́i lɛ ɛ́ mí hàarí yú àá pehɔ̀ fìi ɓánlén. Ɛ́ lépe ɲunù tɛmu dɛ̀kĩ́i ɛ́ iè lè bienù lɛ ɛ́ mí hàarí ɲɛ́. 8Kɛ́ lé lò den pɛ́wi iè ɲunù tɛmu dɛ̀fĩì ɛ́ nín wĩ́ ɛ̀ lɛ́ miɛ ǹ; ɛ́ pelè bɔ̀berà ɛ́ mɔn ɔ̀ Kirisa ǹ, ɛ̀ lè lò ɛ́ mɔn mìpe ǹ, iè hɔ̀ lɛ ɛ́ hɔ́ síbínú ɛ́ vĩ́ cɔ́, ɛ̀ hɔ̀ ńpiemu hɛ̀lɛ̀lɛ̀ ɛ́ zĩ̀níkɛa ɛ́ lè viì ɛ̀ cienínin.

9Álɛ kɛ́ á nɛ mípe ɛ́ wi ńpiemu hũn hɔ́rɔsí kɛ́ á lò den hɛ́rɛ ɓá ńkɔnù, ɛ̀ ɓàasɔ pɛ́wi ɛ́ wi hɔ síbínú hũn. 10Àlɛ ɛ́ wɛ ɓá ńkɔnù ɛ́ pe wi ńpiemu hũn, ɛ́ bòo dɔ̀ lɛ dɛ̀ ɛ́ lɛ́ á ɛ́ kenkení ɛ́ zɔ bɔ̀koohɔ́ wénlɔ́ hũn ɛ́ mí wɛ̀. 11Kɛ́ álɛ ɛ́ hɛ́rɛ ɓán ńkɔnù ɛ́ pe wi síbínú hũn; à ɛ́ vɛ hɔpe síbínú hũn, ɛ́ yí dũ viì lɛ á vaá-vɛ iè hɔ̀ lɛ ɛ́ hɔ́ síbínú ɛ́ muiníɛ piè yìe.

12Niǹ nìɛ, nín hɔ̀pe lɛ ɛ̀ wĩ́ ɛ̀ lɛ́ miɛ ǹ iè hɔ̀ lɛ ɛ́ mí bɔ̀koohɛ̃ sɛ́wɛ́rí ɛ́ dɔ́ ɛ́ lɛ́ miɛ ǹ Yiezu Kirisa yèrè bòo hũn. 13Ɛ̀ mìpe kìe yàáɓɛ́, nín hɔ̀pe lɛ ɛ̀ wĩ́ ɛ̀ lɛ́ miɛ ǹ iè hɔ̀ lɛ ɛ́ mí dũ ape lɛ ɛ́ wi hàarí hɔ̀ bòo míkùi fìi ɓánlén. Ɛ̀ nín hɔ̀pe lɛ ɛ̀ wĩ́ ɛ̀ lɛ́ mípe zɛ̀fùa ǹ, iè hɔ̀ lɛ ɛ́ mí ɛ́ yú pànkɛ́ hɔ̀ bɔ̀-làahṹ lɔ̀n. 14Ɛ́ mípe niǹ nìɛ, ń den wɛ̃́ hɔ́pe sí ɛ́ lɛ́ miɛ ǹ iè hɔ̀ lɛ ɛ́ mí dũ a Yàá lɛ iè hɔ̀pe Dɔfĩn. Ɛ̀ ǹ wɛ̃́ hɔ́ ɛ́ lɛ́ mípe kìe yàáɓɛ́ ǹ, iè hɔ̀ lɛ ɛ́ mí dũ ape lɛ ɛ́ wi yán hàarí hɔ̀ bòo míkùi fìi ɓánlén. Ɛ̀ mìpe zɛ̀-fùa, ń wɛ̃́ hɔ́ ɛ́ lɛ́ miɛ ǹ iè hɔ̀ lɛ ɛ́ mí pànkɛ́ ɛ́ wi: lè Dɔfĩn bienù ɛ́ wi mi tĩɛ̀ hũn ɛ́ mí wo yú pànkɛ́ hɔ̀ bɔ̀-làahṹ lɔ̀n.

15Mì bí wɛní lé dímíɲɛ́ àá hɔ́pe bòo lɛ ɛ́ wi lepe dímíɲɛ́ hũn wɛ̀. Kɛ́ nìnbírɔ dɔ̀ ɛ́ wɛ dímíɲɛ́, ɛ̀ Yàá Dɔfĩn wanminu ɛ́ mí ɓàasɔ ǹ wɛ̀. 16Ɛ́ hɔ́ bòo lɛ wi le dímíɲɛ́ hũn míkùi, lɛ iè hɔ̀ bòo lɛ pɔnù ɛ́ wóò ɓé ɓɛ́ nìnbirìe àá hɔ́lɛ ɛ́ peɓɛ̀ yìi ɛ́ wóo lénin àá peɓɛ̀ te ɓàanírɔ́ hɔ̀ yírɛ́ lɛ ɛ́ ɓɛ́ dàa bòo hũn, hɔ̀pe sí míkùi ɛ́ den yáà lé àá Yàá Dɔfĩn viì kɛ́ hɔ́ wóò lé àá lé dímíɲɛ́ viì. 17Ɛ́ lépe dímíɲɛ́ ɛ́ lò den mii khíi àá mí bòo pɔnù lɛ wóo ɓé ɓɛ́ nìnbirìe míkùi; kɛ́ álɛ ɛ́ wóò wé Dɔfĩn tĩì bòo ɛ́ pe ɛ́ kań yán fúu.

Kirisa ɓà ńbíyanliè bòo

18Mìpe niǹ nìɛ, lɛ wo iè hɔ̀ mɛ́n-sí ɛ́ ké wi hũn; mí lò wo ɲɛ́ kɛ́ ɓɛ́ nɛ a Kirisa ɓà ńbíyanle dɔ̀ ɛ́ vaá-ɓen; ɛ́ laà lɛ lɔ̀n ápe Kirisa ɓà ńbíyanliè cɛ̀rìɛɛ ɛ́ wo siɛ hĩ́nà; ɛ́ sí iè pe temu lɛ́ ɛ́ ké dàa dũ kɛ́ hɔ́ iè hɔ̀pe mɛ́n-sí ɛ́ ké wi hũn. 19Ápe Kirisa ɓà ńbíyanliè sɔ ɛ́ lɔ́ ké tĩ́ihṹ, kɛ́ ɓɛ́ lò den hṹn yí ké nìɛ dɔ̀ wɛ̀; iè hɔ̀ lɛ kɛ́ ɓɛ́ hṹn iè kè nìɛ dɔ̀ àá bɔ̀bín, nɛ ɓɛ̀ kɛsí àá kie. Kɛ́ hɔ́ wɔ́ kɛ̀amu ɛ́ dàa ɛ́ zɛ̃́niɛ kɛ́ ɓɛ́pe ɓɛ́kùi ɛ́ hɛ̀rí nìnbí-cóoní dɔ̀ lɛ iè kè nùún dɔ̀ ɛ́ mí wɛ̀.

20Kɛ́ hɔ́ ɓen kɛ́ mípe, ɛ̀ mì ɛ́ yú lé Mɛkɛ̃n-Sãanu lɛ á Kirisa ɛ́ lɛ́ ɛ́ lé ɓɛrɛ siɛ mì lɔ̀n, ɛ́ mípe míkùi ɛ́ wo dũ hɔ bɔ̀berà. 21Ɛ́ kɛ́ ń ɓen ɛ́ lèpe vɛ̃hṹ lɛ ɛ̀ wĩ́ lɛ́ miɛ ǹ, ɛ̀ hɔ̀ yí bòo ɛ́ mí yí dũ hɔ bɔ̀berà wɛ̀, kɛ́ hɔ́ den iè hɔ̀ lɛ ɛ́ mí dũ hɔ ɛ̀ mì lò dũ kɛ́ ɓúo ɛ́ yí dɛ̀ yá zɔ lé hɔ́ bɔ̀berà hũn wɛ̀.

22Á ɓɔ́-ɓúukɛ ɛ́ wo iè ɔ̀ hɔ́sɔ? À den iè ɔ̀pe lɛ ɛ́ wóò bie nɛ a Yiezu ɛ́ yí-e pe Kirisa wɛ̀. Ápe sí ɛ́ den iè ɔ̀pe Kirisa ɓà ńbíyanle, à iè wiè lɛ ɛ́ pɛ̃́ á Yàá àá ɔ́ Zuú bòo. 23Ɛ́ nìnbírɔ lɛ kɛ́ á pɛ̃́ á Zuú bòo, à Yàá ɛ́ mí àá ɓàasɔ wɛ̀; àlɛ kɛ́ á tɛ̀ à Zuú bòo, à Yàá ɛ́ lò ɓiɛ̀ wi àá ɓàasɔ.

24Ɛ́ sí iè hɔ̀pe ɛ́ mí dàa ɓɛ́ɓɛ́ lé bienù lɛ ɛ́ mí hàarí ɲɛ́ ǹ àá pehɔ̀ fìi ɓánlén mì tĩɛ̀ hũn, kɛ́ mí ɛ́ ɓɛ́ɓɛa lèpe bienù lɛ ɛ́ mí hàarí ɲɛ́ ǹ àá pehɔ̀ fìi ɓánlén, ɛ́ mípe ɛ́ lò ɓiɛ̀ ɛ́ cɛ ɛ́ dìń ɔ́ Zuú àá ɔ́ Yàá ǹ. 25Ɛ́ lɛ iè hɔ̀ bòo lɛ á Kirisa ɛ́ lɛ́ mí ɲunù nɛ mí ɓén lɛ́ kie ǹ: lè iè mɛkɛ̃nì lɛ ɛ́ yá vé.

26Ɛ́ ń den ɛ́ wɛ̃́ hɔ́pe lɛ ɛ́ lɛ́ miɛ ǹ ɓɛ̀pe nìɛ lɛ ɛ́ cɛ̀ ɛ̀ ɓɛ̀ khɛ̃̀ní miɛ vĩ́iní bòo hũn. 27Kɛ́ hɔ́ ɓen kɛ́ mípe, ɛ̀ lè Mɛkɛ̃n-Sãanu lɛ ɛ́ mí yú ó Kirisa viì ɛ́ wi ɓánlɔ̀n àá miɛ, ɛ́ mí wo bĩniɛ mɛ̀kóo mí ɛ̀ ɓɛ̀ kɛ̀rán miɛ àá bòo dɔ̀ wɛ̀; iè hɔ̀ lɛ ɛ́ lépe Mɛkɛ̃n-Sãanu ɛ́ wóò kɛ̀rán miɛ àá bòo míkùi. Lè wóò kɛ̀rán miɛ àá hɔ́ bɔ̀berà kɛ́ hɔ́ yí hɔ́ ɓúo wɛ̀. Ɛ́ sí iè hɔ̀ pe ɛ́ mí dàa wóo wé hɔ́ bòo lɛ ɛ́ Lé kɛ̀rɛa àá miɛ, lɛ iè hɔ̀lɛ ɛ́ Lé nɛ mi cɛ dìń ɔ́ Kirisa ǹ.

28Ɛ́ kɛ̀a sáalɛ, mìpe niǹ nìɛ, mì wo cɛ dìń ɔ́pe Kirisa ǹ bòo lɛ ɛ́ wé kɛ́ zɔǹ lɛ kɛ́ á khũ̀a vaá-ɓen kɛ́ ké dàa tĩhiè, ɛ̀ lùwiè ɛ̀ dàa bí dí kie pie khũ̀á ɓenlɔ́ sɔ zɔǹ wɛ̀. 29Mí lò wo dũ kɛ́ á Kirisa ɛ́ cã̀aní; ɛ́ mí ɓiɛ̀ dũń sãaní kɛ́ nìnbírɔ lɛ wóò wé hɔ́ bòo lɛ ɛ́ cã̀aní ɛ́ iè Dɔfĩn Zuú.

Currently Selected:

1 Zãn 2: bwj

Highlight

Copy

Compare