1 Korɛnte Siè 11

1Ɛ́ mí ken niǹ bɔ̀werà ǹ kɛ̀a bòo lɛ ɛ́ ńpe ɛ́ ɓiɛ̀ dàa kerɛ à Kirisa bɔ̀werà ǹ.

Ɓɛ̀ ńdɛsĩ̀riè tĩ̀ɛ zɔnlɔ́ ɓɛ́ ńkóoɓanlɔ̀nɓɛ̀ hũn bòo

2Nín mì tanɓiì ɛ̀ dé, iè hɔ̀ lɛ ɛ́ bòo míkùi hũn, ɛ́ mí wóò nùún niǹ bòo, ɛ̀ hɔ̀ bérɛ́ lɛ ɛ́ ń lɛ́ miɛ ǹ ɛ́ mí lò wóò vɛ bè nin.

3Kɛ́ ń den ɛ́ cɛ̀ nɛ mi dũń kɛ́ ɓɛ́ báa ɓɛ́kùi ɲúnsɔ ɛ́ iè ɔ̀ Kirisa, à bɛ́rɔ ɛ́ iè ɔ̀ hṹnu ɲúnsɔ, ɛ̀ Dɔfĩn ɛ́ iè ɔ̀ Kirisa Ɲunsɔ. 4Ɛ́ bɛ́rɔ yée bɛ́rɔ lɛ ɛ́ Dɔfĩn ɛ̀ hɛ̃nnin tàá ɛ́ Dɔfĩn bòo ɛ̀ hàaní ɛ̀ lɛ́ ɓɛ́ nìnbirìe ǹ kɛ́ piè ɲún ɛ́ híɛnin, ɛ́ yá mí Ɲunsɔ ɛ̀ mɛ̀ndɛ̃ wɛ̀. 5Ɛ̀ hṹnu yée hṹnu lɛ ɛ́ Dɔfĩn ɛ̀ hɛ̃nnin tàá ɛ́ Dɔfĩn bòo ɛ̀ hàaní ɛ̀ lɛ́ ɓɛ́ nìnbirìe ǹ kɛ́ piè ɲún ɛ́ yí híɛnin, ɛ́ yá mí ɲúnsɔ ɛ̀ mɛ̀ndɛ̃ wɛ̀. Hɔrɔsí ɛ̀ hɔ̀ dɛ̃̀ kɛ̀a bòo ɛ́ piè ɲún ɛ́ khũa. 6Ɛ́ kɛ́ hṹnu ɛ́ ɓen yí mii híɛ mí ɲún à tɛ khũa le. Ɛ́ kɛ́ hɔ́ dàa ɓen iè lùwiè bòo ɔ̀ hṹnu viì à khè mí ɲún tàá à khũa le, à wóo híɛ lè ǹ lò! 7À bɛ́rɔ ɛ́ pe yí fɔ́ɓán à wóo híɛ mí ɲún, iè hɔ̀ lɛ ápe ɛ́ iè Dɔfĩn ɓà ńlénɓán, à lò ɛ́ hɔ̀pe Dɔfĩn ɓàarɔ́ ɛ̀ zɛ̃́ní. À hṹnu ɛ́ pe iè ɔ̀ bɛ́rɔ ɓàarɔ́ á ɛ́ zɛ̃́ní. 8Iè hɔ̀ lɛ á bɛ́rɔ ɛ́ den hàarí yí lí-e hṹnu ǹ, kɛ́ á hṹnu ɛ́ temu hàarí lɔ́ á bɛ́rɔ ǹ. 9À bɛ́rɔ ɛ́ yí mí-ɛ hṹnu yènsénín, kɛ́ á hṹnu ɛ́ temu mɛ́ á bɛ́rɔ yènsénín. 10Ɛ́ sí iè hɔ̀ pe, ɛ́ ɓɛ́ mɛlɛkɛɓɛ bòo hũn, á hṹnu ɛ́ dàa fɔ́ɓán á wóo híɛ mí ɲún ɛ̀ dàá zɛ̃́ní kɛ́ á yú lé ɲunù. 11Kɛ́ Ɲunsɔ viì, ɛ̀ hṹnu ɛ́ mí kɛ́ á bɛ́rɔ ɛ́ ɓen ɛ́ bòo mí, ɛ̀ bɛ́rɔ ɛ́ lò ɓiɛ̀ mí kɛ́ á hṹnu ɛ́ ɓen bòo mí. 12Iè hɔ̀ lɛ ɛ́ kɛ̀a bòo lɛ á hṹnu ɛ́ dàa hàarí lɔ́ á bɛ́rɔ ǹ, á bɛ́rɔ ɛ́ ɓiɛ̀ wóò te ɛ̀ lí-e hṹnu ǹ, ɛ̀ hɔ̀ bòo míkùi ɛ́ lɔ́ Dɔfĩn viì.

13Ɛ́ mípe mìte ǹ ɛ̀ kùusɔ síɛ huí hɔ́ lò: hɔ̀ hɛ̀ te mí yìe ɛ̀ hṹnu ɛ̀ hɛ̃un Dɔfĩn kɛ́ piè ɲún ɛ́ yí híɛnin? 14Àpe nìnbírɔ dĩ̀nlɔ́ ɛ́ kùusɔ ɛ́ kìe kɛ̀rán nɛ hɔ iè lùwiè bòo ɛ̀ bɛ́rɔ ɛ̀ fùansí mí ńɲiihĩ́ ǹ ɛ̀ hɔ̀ sɛ̀ tookɛní. 15Kɛ́ hṹnu viì, ɛ̀ hɔ́ den iè bòo lɛ ɛ́ ɔ̀ ɓàanínin, iè hɔ̀ lɛ ɛ́ hɔ́ ńɲiihĩ́ lɛ tóokɛa ɛ́ den lɛ́ á hṹnu ǹ nɛ hɔ híɛ piè ɲún. 16Ɛ́ kɛ́ nìnbírɔ dɔ̀ ɛ́ den pɛ́wi wɛ ɛ́ mii ɛ̀ wũ̀aní hɔ́pe sí, ɛ̀ ɓàasɔ ɛ̀ dũń kɛ́ képe ɛ́ yí dàa bɔ̀werà bɔ̀ɓuà dɔ̀, kɛ́ hɔ́pe sí ɛ́ ɓen bòo mí, ɛ̀ hɔ̀ Dɔfĩn zĩhĩ́ɛ ńkóoɓánlɔ̀n nìɛ ɛ́ lò ɓiɛ̀ iè hɔ̀pe ɛ́ ɓɛ́ ɛ́ mɛ́nɛnin.

Ɲunsɔ húmú àá piè vìerɔ́ bòo lienírɔ́ díe bòo

Mat 26.26-29; Mar 14.22-25; Lik 22.15-20

17Ɛ́ hɔ́pe bòo lɛ ɛ́ ń wo nin bie àá miɛ kɛ̀a sáalɛ hũn, ɛ́ ń yí dɛ̀ mì tanɓiì ɛ́ yá dé wɛ̀. Iè hɔ̀ lɛ ɛ́ mí van kóo ɓánlɔ̀n, ɛ̀ hɔ̀ bòo lɛ ɛ́ mí wóò wé ɛ́ den wóò ɓóoní miɛ ǹ ɓóonírɔ́ ɛ́ pɔ hɔlɛ ɛ́ wóò wookɛ miɛ. 18Hɔ̀ hán bòo, ń den ɛ́ ɲí kɛ́ ɓɛ́ nɛ mi ɓen van koo ɓánlɔ̀n kɛ̀a ie Dɔfĩn zũnù nìɛ, ɛ̀ hɔ̀ ńsankɛà ɛ́ wi mi tĩ́ihṹ. Ɛ́ ńpe wo ɛ́ nùún ɛ̀ ǹ nɛ hɔpe sí ɛ́ nín ɲí hũn, ɛ́ hɔ́dɔ̀ ɛ́ iè bòo lɛ ɛ́ bɔn. 19Hɔ̀pe wo te mí yìe ɛ̀ ńsankɛà ɛ̀ kań mí tĩ́ihṹ, bòo lɛ ɛ́ wé ɛ̀ ɓɛ̀pe lɛ ɛ́ bɔ̀ à Ɲunsɔ wṹn àá bɔ̀bín ɛ́ den mi. 20Ɛ́ mí wo ɓen ɛ́ kóo ɓánlɔ̀n, ɛ̀ hɔ̀ yí Ɲunsɔ díe ɛ́ mí ɛ́ wo mii dí wɛ̀. 21Iè hɔ̀ lɛ ɛ́ mí ɓen kɛsí ɛ́ mii dí, ɛ̀ hɔ́rɔ ɛ́ wóò yíe kóo mí kùrú díe lɔ̀n, ɛ̀ pɛ mí híɛhɔ́ à dí. Ɛ́ kɛ̀amu ɛ́ ɓɛ́dɔ̀ ɛ́ hɔ́ hĩní ɛ́ wóò ɓé kɛ́ ɓɛ́dɔ̀ ɛ́ pe ɛ́ dú tù ɛ̀ ɓɛ̀ ɲun tù. 22Ɛ́ bòo ɛ́ mí yí dàa zĩhĩ́ɛ lɛ wóo dí ɛ̀ mì ɛ́ ɲu hũn? Yée kɛ́ mí iè bìe yìe ɛ́ yá lè Dɔfĩn zũnù ńkóoɓánlɔ̀n nìɛ ɛ̀ tí, ɛ́ mí wo wɛ ɛ́ mii dé lùwiè ɓɛ̀lɛ bòo dɔ̀ mí ǹ? Ɛ́ mí wo nɛ n bie ńɓúò ɛ̀ lɛ́ miɛ? Nɛ ń dé mí tanɓiì? Ńɓùé dɛ́! Ń hɛ̀ yí dɛ̀ mì tanɓiì ɛ́ yá dé hɔ́pe sí hũn wɛ̀.

23Hɔ̀ bòo lɛ ɛ́ ń kɛ̀rɛa àá miɛ ɛ́ iè hɔ̀ lɛ ɛ́ ń yú-o Ɲunsɔ viì. Àpe Ɲunsɔ Yiezu, hɔ̀ sṹnúhṹn lɛ ɛ́ ɓɛ́ dàa dú-o ɓɛ̀ nìnbirìe núnú hũn, á mɔ̀ hɔ̀ búrú, 24à dɔ́ Dɔfĩn bɛrikɛ à ɓùenkɛa hɔ̀ ɛ́ khie lɛ́ ɓà ǹ à zɔn bie ɛ́ nɛ làa: «Hɔ̀pe lɛ iè niǹ tɛkɛ̀a lɛ ɛ́ ń lɛ́ mí yènsénín. Mì wóo wé hɔ́ ɛ̀ dàá liení niǹ bòo.» 25Ɛ̀ bĩní páa yán, ɛ́ hɔ́ lɛ ɛ́ ɓɛ́ dú vɔ́, á khie mɔ̀ lè ɲuǹlán dìɛ lɛ ɛ́ hɔ́ bɔ̀ɲuriè ɛ́ wi hũn à zɔn bie nɛ làa: «Lèpe ɲuǹlán dìɛ lɛ ɛ́ iè lè ɲɛbíi dɛ̀fĩì lɛ ɛ́ Dɔfĩn dɔ́ àá ɓɛ́ nìnbirìe niǹ cãani hũn. Ɛ́ mí ɓen ɛ́ hɔ̀ ɲu pɛ̃̀hṹ lɛ, ɛ̀ mì wóo wé hɔ́ ɛ̀ dàá liení niǹ bòo.» 26Ɛ́ pɛ̃̀hṹ yée pɛ̃̀hṹ kɛ́ mí ɓen ɛ́ hɔ̀pe búrú sɔ ɛ̀ lɛ̀, ɛ̀ mì lò ɛ́ ɲu lepe ɲuǹlán dìɛ sɔ lɛ hũn, à iè ɔ̀pe Ɲunsɔ húmú bòo ɛ́ mí ɛ́ bie kɛ̀amu. Ɛ́ mí wo wóo wé hɔ́ fúu á vɛ khũ̀á ɓen lɔ̀n.

27Ɛ́ sí iè hɔ̀pe, kɛ́ nìnbírɔ ɛ́ dàa lɛ̀ Ɲunsɔ búrú à ɲun piè ɲuǹlán dìɛ hũn kɛ́ á yí mɛ̀ndɛ̃ hɔ, ɛ̀ hɔ̀ iè bɔ̀koohɔ́ á wɔ́ àá Ɲunsɔ tɛkɛ̀a àá piè cãani. 28Ɛ́ hɔ́rɔ ɛ́ wóo vɛ̀ mí hũn sãàní vé, à den wo lɛ̀ hɔpe búrú sɔ, à ɲu lepe ɲuǹlán dìɛ sɔ hũn. 29Iè hɔ̀ lɛ álɛ ɛ́ hɔ̀pe búrú sɔ ɛ̀ lɛ̀ à lò ɛ́ ɲu lepe ɲuǹlán dìɛ sɔ hũn kɛ́ á yí dũń ciiní kɛ́ hɔ́ iè Ɲunsɔ tɛkɛ̀a, ɛ̀ hɔ̀ iè piè kùrú lìe lènlɔ́ á ɛ́ vɛ́ ɛ̀ bè mí lɔ̀n. 30Ɛ́ sí iè hɔ̀pe ɛ́ mí tĩ́ihṹ ɛ́ nìnbí-kuì ɛ́ dàa ɛ́ iè ɓɛ́ dɔriè àá ɓɛ́ nìɛ lɛ cũ̀kú mí, ɛ̀ ɓɛ̀ cɛ̀rìɛɛ ɛ́ lò húrúnkɛ. 31Kɛ́ ké hṹn wóò vɛ̀ kè hũn sãàní vé, ɛ́ Dɔfĩn ɛ́ hṹn yá lè kè lìe wɛ̀. 32Kɛ́ Ɲunsɔ ɛ́ den wóò lè kìe lìe ɛ̀ dàá bé kie, bòo lɛ ɛ́ wé ɛ̀ zɔn dɔ̀ ɛ̀ ɓɛ̀ bí vɛ lè kè lìe ɛ̀ vɛ́ ɲɛkɛ̃̀a àá ɓɛ́ dímíɲɛ́ nìɛ wɛ̀.

33Ɛ́ kɛ̀amu, kìe zɛ̀ɓɛ̀, mí ɓen van koo ɓánlɔ̀n ɛ́ mii dí Ɲúnsɔ díe, ɛ̀ mì wóo hìé ɓán. 34Kɛ́ ádɔ̀ ɛ́ hĩní ɛ́ ɓé, ɛ̀ ɓàasɔ ɛ̀ dí mí yìe, bòo lɛ ɛ́ wé kɛ́ mí ɓen kóo ɓánlɔ̀n, ɛ̀ mì bí wé bòo lɛ ɛ́ lɛ́ ɛ́ Dɔfĩn ɛ́ lè mì lìe ɛ́ ɲɛkɛ̃̀a wɛ̀. Kɛ́ hɔ́ ɓen kɛ́ mí bɔ̀dìekɛà lɛ kɛ́, ɛ́ ń ɓen ɓɛrɛ dɛ̃un mì viì pɛ̃̀hṹ lɛ, ɛ́ ń den ɛ́ leń pehɔ̀ yìe.

Currently Selected:

1 Korɛnte Siè 11: bwj

Highlight

Copy

Compare