1 Korɛnte Siè 12
12
Dɔfĩn hɛ̃mù bòo àá mí ɲúuhɛ̃ ɲúuhɛ̃
1Kìe zɛ̀ɓɛ̀, ɛ́ hɔ́ ɓen kɛ́ lé Mɛkɛ̃n-Sãanu hɛ̃mù bòo lɛ ɛ́ hɔ́ wóò lɛ́ ɓɛ́ nìnbirìe ǹ, ɛ̀ ǹ den yí wɛ nɛ mi dìń kũǹ kɛ́ mí bí dũń hɔ́ ɛ̀ wiekɛ wɛ̀. 2Mí dũ kɛ́ pɛ̃̀hṹ lɛ ɛ́ mí dàa hàarí ɲɛùn yí ɓɛ́ ńdɛsĩ̀riè, ɛ́ mí hàarí wɔ́ hɔ́ wɛ̃̀hɛ̃ lɛ lò yí dɛ̀ yáà bie máahṹ ɛ́ mí bɔ̀ kɛ́ mí lò ɛ́ yí dɛ̀ yá pĩ́ wɛ̀. 3Ɛ́ sí iè hɔ̀pe ɛ́ ń dàa nin khɛ́ hɔ́ lɛ́ miɛ ǹ nɛ nìnbírɔ lɛ ɛ́ bie àá Mɛkɛ̃n-Sãanu pànkɛ́ ɛ́ yí dɛ̀ yá zɔ bie nɛ dánkɛ́nín ɛ̀ yòó Yiezu wɛ̀. Ɛ̀ nìnbírɔ ɛ́ lò ɓiɛ̀ yí dɛ̀ yá zɔ bie nɛ Yiezu iè Ɲunsɔ kɛ́ Mɛkɛ̃n-Sãanu ɛ́ yí teń hɔ́ ɛ̀ wé wɛ̀.
4Hɔ̀ hɛ̃mù bòo ɛ́ ɲúuhɛ̃ wikɛ wikɛ, kɛ́ lé lò iè pe Mɛkɛ̃n-Sãanu dìcóoní ɛ́ te hɔ ɛ́ wóò lɛ́. 5Ɛ̀ hɔ̀ Dɔfĩn tɔnlɔ́ ɛ́ ɲúuhɛ̃ wikɛ wikɛ, kɛ́ á lò iè pe Ɲunsɔ wìcóoní tɔnlɔ́ ɛ́ ké ɛ́ tɛ́. 6Ɛ̀ hɔ̀ tɔnlɔ́ tánlɔ́ ɛ́ wikɛ wikɛ, kɛ́ hɔ́ lò iè pe Dɔfĩn dìcóoní ɛ́ te hɔ míkùi wénlɔ́ ɛ́ wóò lɛ́ ɓɛ́ nìnbirìe ɓɛ́kùi ǹ. 7Ɛ́ lé Mɛkɛ̃n-Sãanu ɛ́ wóò lɛ́ hɔ́ hɛ̃mù hɔ́rɔ ǹ ɛ̀ dàá zɛ̃́ní mí pànkɛ́ ɓɛ̀ nìnbirìe ɓɛ́kùi sãàrɔ́ bòo hũn. 8Ɛ́ lépe Mɛkɛ̃n-Sãanu ɛ́ wóò lɛ́ bɔ̀dũmunù bienù àdɔ̀ ǹ, ɛ̀ lèpe Mɛkɛ̃n-Sãanu dìcóoní sɔ ɛ̀ bĩní lɛ́ hɔ́ bɔ̀berà dũnlɔ́ bienù àdɔ̀ ǹ. 9Ɛ̀ lèpe Mɛkɛ̃n-Sãanu dìcóoní sɔ ɛ́ wóò lɛ́ hɔ́ ńdɛsĩ̀nlɔ́ lɛ dɛ̃̀ sãa àdɔ̀ ǹ, ɛ̀ lèpe Mɛkɛ̃n-Sãanu dìcóoní sɔ ɛ̀ bĩní lɛ́ ɓɛ́ dɔriè wiɛnílan pànkɛ́ àdɔ̀ ǹ. 10Ádɔ̀ wóò yí hɔ́ yéréké bòo wénlán pànkɛ́, àdɔ̀ ɛ̀ yí hɔ́ Dɔfĩn bòo háanílán pànkɛ́, àdɔ̀ ɛ̀ yí hɔ́ pànkɛ́ lɛ wóò dũń hɔ́ mɛkɛ̃n-koohɛ̃ ɛ̀ lé Mɛkɛ̃n-Sãanu ǹ, àdɔ̀ ɛ̀ yí hɔ́ pànkɛ́ lɛ wóò bie hɔ níi bɔ̀ɓuà, àdɔ̀ ɛ̀ yí hɔ́ pànkɛ́ lɛ ɛ́ wóo tɛ̃́ní hɔ́pe níi bɔ̀ɓuà. 11Ɛ́ lépe Mɛkɛ̃n-Sãanu dìcóoní sɔ ɛ́ te hɔpe sí míkùi ɛ́ wóò wé. Lè wóò sankɛ hɔ ɛ̀ lɛ́kɛ ɓɛ nìnbirìe ɓɛ́kùi àá ɓɛ́ nì-cóohɛ̃ ɛ̀ ɓáaníɓán àá bòo lɛ ɛ́ Lé wɛ.
Ɓɛ̀ ńdɛsĩ̀riè ńkóoɓánlɔ̀n lɛ dɛ̃̀ kɛ̀a tɛkɛ-cóoní bòo
12Ɛ́ mí húi lò, nìnbírɔ tɛkɛ̀a dáahĩ́ ɛ́ buò, kɛ́ hɔ́ lò den iè pe tɛkɛ̀a dìcóoní. Ɛ́ kɛ̀a bòo lɛ ɛ́ hɔ́pe tɛkɛ̀a dáahĩ́ sɔ àá mí buòrɔ́ míkùi ɛ́ iè tɛkɛ̀a dìcóoní, ápe Kirisa ɛ́ ɓiɛ̀ dɛ̃̀ kɛ̀amu. 13Ɛ́ képe kè kùi, ɓɛ̀ Zuifuɓɛ àá ɓɛ́lɛ yí ɓɛ́ Zuifuɓɛ, ɓɛ̀ wɔhĩ́ àá ɓɛ́lɛ ɛ́ te ɓɛ́te, pɛ̃̀hṹ lɛ ɛ́ ɓɛ́ dàa ɛ́ líiníkɛa kie hɔ̀ ɲumu hũn, ɛ́ lépe Mɛkɛ̃n-Sãanu dìcóoní sɔ ɛ́ lɛ́ ké wɔ́ tɛkɛ-cóoní nìɛ. Ɛ́ képe kè kùi ɛ́ wo tú àá lépe Mɛkɛ̃n-Sãanu dìcóoní sɔ.
14Ɛ́ nìnbírɔ tɛkɛ̀a ɛ́ yí tɛkɛ̀a dáanú dìcóoní ɛ́ hɔ́ dàa, kɛ́ pehɔ̀ dáahĩ́ ɛ́ buò. 15Kɛ́ lé zeǹ ɛ́ hṹn zɔn nɛ làa: «Ǹpe ɛ́ yí núnú wɛ̀; ɛ́ nín bòo ɛ́ wo mí hɔ́pe tɛkɛ̀a hũn wɛ̀.» Ɛ́ bòo ɛ́ hɔ́pe sí ɛ́ wo ɛ́ lɛ́ ɛ́ lépe zeǹ ɛ́ wo yá wé hɔ́pe tɛkɛ̀a dáanú dɔ̀? 16Ɛ̀ kɛ́ lé ɲɛkɛ̃hṹ ɛ́ hṹn zɔn nɛ làa: «Ǹpe ɛ́ yí yiì wɛ̀; ɛ́ niǹ bòo ɛ́ wo mí hɔ́pe tɛkɛ̀a hũn wɛ̀.» Ɛ́ bòo hɔ́pe sí ɛ́ wo ɛ́ lɛ́ ɛ́ lépe ɲɛkɛ̃hṹ ɛ́ wo yá wé hɔ́pe tɛkɛ̀a dáanú dɔ̀? 17Kɛ́ nìnbírɔ tɛkɛ̀a míkùi ɛ́ hṹn iè yìi, á wo hṹn ɓén wiɛwiɛlɔ́ ɛ́ dàá ɲí wóo ɲí bòo? Ɛ̀ kɛ́ hɔ́pe tɛkɛ̀a míkùi ɛ́ hṹn iè ɲɛkɛ̃hṹ, á wo hṹn ɓén wiɛwiɛlɔ́ ɛ́ dàá wóo ɲí hɔ́ bòo tũnù? 18Dɔfĩn ɛ́ den wɔ́ ápe nìnbírɔ tɛkɛ̀a dáahĩ́ míkùi dúrɔ àá mí dĩ̀nlén kɛ̀a bòo lɛ ɛ́ Hɔ́ wɛ. 19Ɛ́ kɛ́ hɔ́pe tɛkɛ̀a míkùi ɛ́ wo hṹn iè dáanú dìcóoní, ɛ́ hɔ́pe tɛkɛ̀a sɔ ɛ́ wo ɓén wé àá yí? 20Ɛ́ sí iè hɔ̀pe ɛ́ hɔ́pe tɛkɛ̀a dáahĩ́ ɛ́ dàa buò, kɛ́ hɔ́pe tɛkɛ̀a sɔ ɛ́ lò den iè dìcóoní.
21Lè yìi ɛ́ yí dɛ̀ yá zɔ́ bie ɛ́ lɛ́ le núnú ǹ nɛ làa: «Kɔ̀ bɔ̀werà mí niǹ viì wɛ̀.» Ɛ̀ lè ɲún ɛ́ lò ɓiɛ̀ yí dɛ̀ yá zɔ́ bie ɛ́ lɛ́ hɔ́ zehĩ́ ǹ nɛ làa: «Mì bɔ̀werà mí niǹ viì wɛ̀.» 22Ɛ́ hɔ́pe tɛkɛ̀a dàahĩ́ lɛ ɛ́ dɛ̃̀ kɛ̀a bòo lɛ cũ̀kṹ mí ɛ́ yɛ̀rɛ́ den temu bòo ɛ́ hie cɛ̃̀un. 23Ɛ́ hɔ́pe tɛkɛ̀a dàahĩ́ lɛ ɛ́ ké yáà líi hùúu iè pe ɛ́ ké den wóò húi bòo sãàní ɛ́ pɔ hɔlɛ kɛ́, ɛ̀ hɔ̀lɛ bòo bierɔ́ lùwiè wi iè pe ɛ́ ké den wóò ɓɛ́ɓɛ́nin cɛ̃̀un. 24Ɛ̀ hɔ̀lɛ ɛ́ ké yàá lùwi bòo hũn ɛ́ mɛ̀kóo mí hɔ́pe ɓɛ́ɓɛ́rɔ́ sɔ sí ǹ wɛ̀. Ɛ́ Dɔfĩn ɛ́ den mɛ́ á nìnbírɔ tɛkɛ̀a, ɛ̀ Hɔ̀ ɛ́ lɛ́ ɓàarɔ́ hɔ̀pe dàahĩ́ lɛ ɛ́ ké wóò nɛ hɔ lùwiè wi ǹ. 25Ɛ́ kɛ̀amu, ɛ́ hɔ́pe tɛkɛ̀a ɛ́ wo yí sankɛ wɛ̀; kɛ́ dúrɔ ńdáanú ɛ́ den wóò húi lé sí kɛ́ bòo. 26Kɛ́ hɔ́pe tɛkɛ̀a dáanú dɔ̀ lɔ̀n ɛ́ be, ɛ̀ hɔ́pe dáahĩ́ lɛ kɛ́ míkùi lɔ̀n ɛ́ wóò be àá lé. Ɛ̀ kɛ́ lé dáanú dɔ̀ ɛ́ ɓɛ́ ɓàaniɛ nin, ɛ̀ hɔ̀pe dáahĩ́ lɛ kɛ́ míkùi ɛ́ wóò wɛní ɓɛ́te àá lé.
27Ɛ́ mípe ɛ́ iè ɔ̀ Kirisa tɛkɛ̀a. Mìpe àá mí nì-cóohɛ̃ ɛ́ hɔ́rɔ ɛ́ iè piè tɛkɛ̀a dáanú dɔ̀. 28Ɛ́ kɛ̀amu, ɛ́ Dɔfĩn ɛ́ ɓiɛ̀ bɔkɛsí ɓɛ́ nìnbirìe mí zũnù hũn, hɔ́rɔ àá mí dĩ̀nlén: ɛ́ ɓɛ́ hán nìɛ ɛ́ iè ɓɛ̀ tɔnkɛriè, ɛ̀ ɓɛ̀ ńɲuunín nìɛ ɛ́ iè ɓɛ̀ bɔ̀háaníriè, ɛ̀ ɓɛ̀ ńtĩinín nìɛ ɛ́ iè ɓɛ̀ kɛ̀ránliè, ɛ́ ɓɛ́ lɛ sɛ̃̀ ɛ́ iè ɓɛ̀lɛ ɛ́ wóò wé hɔ́ yéréké bòo, ɛ́ ɓɛ́lɛ bĩniɛ sɛ̃̀ ɛ́ iè ɓɛ̀lɛ ɛ́ yú hɔ́ pànkɛ́ lɛ wóò wiɛní ɓɛ́ dɔriè, àá ɓɛ́lɛ ɛ́ yú hɔ́ hɛ̃mù bòo lɛ wóò yíiní ɓɛ́ nìnbirìe, àá ɓɛ́lɛ ɛ́ wóò dí ɓɛ́ nìnbirìe híɛhɔ́, àá ɓɛ́lɛ ɛ́ wóò bie hɔ níi bɔ̀ɓuà. 29Ɛ́ ɓɛ́pe ɓɛ́kùi ɛ́ yí Yiezu tɔnkɛriè lò, ɛ̀ ɓɛ̀pe ɓɛ́kùi ɛ́ lò yí Dɔfĩn bɔ̀háaníriè, ɛ̀ ɓɛ̀pe ɓɛ́kùi ɛ́ yí kɛ̀ránliè, ɛ̀ ɓɛ̀pe ɓɛ́kùi ɛ́ lò yí bìe lɛ wóò wé yéréké bòo wɛ̀. 30Ɛ̀ ɓɛ̀pe ɓɛ́kùi ɛ́ yí yí hɔ́ hɛ̃mù bòo lɛ ɛ́ wóò wiɛní ɓɛ́ dɔriè, ɛ̀ ɓɛ̀pe ɓɛ́kùi ɛ́ yáà bie hɔ níi bɔ̀ɓuà, ɛ̀ ɓɛ̀ lò yí ɓɛ́pe ɓɛ́kùi ɛ́ temu wóò tɛ̃́ní hɔ́pe níi bɔ̀ɓuà wɛ̀. 31Ɛ́ kɛ̀amu, ɛ́ lépe Mɛkɛ̃n-Sãanu hɛ̃mù bòo lɛ ɲún ɛ́ lì pɔ hɔlɛ kɛ́ míkùi iè pe ɛ́ mí cɛ mi kuò ɛ̀ cɛ̀.
Kɛ́ kɛ̀a sáalɛ, ɛ́ lé wṹn lɛ bòo hie ɛ́ pɔ hɔlɛ kɛ́ iè pe ɛ́ nín zɛ̃́ní miɛ ǹ.
Currently Selected:
1 Korɛnte Siè 12: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
