1 Korɛnte Siè 10

Zèn ɲìninlɔ́ lɛ wi hɔ bòo lɛ hàarí wɔ́ ɓɛ́ Yizarayɛɛle nìɛ ǹ hũn

1Kìe zɛ̀ɓɛ̀, ń yá cɛ̀ nɛ mi hũn ɛ̀ ɓé hɔ́ bòo lɛ hàarí wɔ́ kìe zĩnkĩ́nɓɛ̀ ǹ à Moyiize pɛ̃̀hṹ hũn wɛ̀. Ɓɛ̀pe ɓɛ́kùi ɛ́ hàarí ɛ́ vɛ le dùndùí fìi hũn, ɛ̀ ɓɛ̀pe ɓɛ́kùi ɛ́ hàarí cánkɛ́a hɔ̀ ɲun-bɛhɔ́. 2Ɛ́ hɔ́ wo tan dɛ̃̀ kɛ̀a bòo ɛ́ ɓɛ́ iè bìe lɛ ɛ́ ɓɛ́ hàarí líiníkɛa lè dùndùí àá hɔ́ ɲumu hũn ɛ́ dàa wɔ́ ɓɛ́ àá dìcóoní àá ɔ́pe Moyiize. 3Ɛ̀ ɓɛ̀pe ɓɛ́kùi ɛ́ hàarí iè dínlɔ́ ɲún-cóoní dɔ̀ lɛ hàarí wóo lé àá Dɔfĩn viì ɛ́ ɓɛ́ dú. 4Ɛ̀ ɓɛ̀pe ɓɛ́kùi ɛ́ hàarí ɲún hɔ́ ɲumù ɲún-cóoní dɔ̀ lɛ hàarí ɛ́ lé lé lɛnù hũn, lèpe lɛnù lɛ ɛ́ hàarí ɛ́ ɓɛ̀ níiní. Ɛ́ lépe lɛnù sɔ ɛ́ hàarí iè ɔ̀ Kirisa. 5Kɛ́ peɓɛ̀ nìnbí-kuì ɛ́ den hàarí bòo yí tĩ Dɔfĩn wɛ̀. Ɛ́ sí iè hɔ̀pe ɛ́ ɓɛ́ dàa hàarí húrunkɛ le ńɲiherà hũn. 6Ɛ́ hɔ́pe sí míkùi ɛ́ iè bòo ɛ́ hɔ́ ɛ́ zɛ̃́ní àá kie bòo lɛ ɛ́ wé ɛ̀ kè yìi ɛ́ bí lé hɔ́ bɔ̀koohɔ́ ǹ kɛ̀a iè ɓɛpe wɛ̀. 7Ɛ́ mí bí wé hɔ́ wɛ̃̀hɛ̃ ɛ̀ mì ɓàanínin kɛ̀a ie ɓɛpe nìɛ sɔ dɔ̀ bòo lɛ ɛ́ ɓɛ́ hàarí wɔ́ wɛ̀. Hɔ̀ den wɛ̃́ lé Dɔfĩn bienù vɛ̃hṹ hũn ɛ́ nɛ làa: «Ɓɛ̀ nìnbí-zã̀amáa ɛ́ siɛ kɛsí ɛ̀ ɓɛ̀ dú ɛ̀ ɓɛ̀ ɲun ɛ̀ ɓɛ̀ den wo siɛ hĩ́nà ɛ́ múnkɛ.»#10.7 Ɓɛ̀pe nìɛ sɔ lɛ ɛ́ ɓɛ́ bòo ɛ̀ bie ɛ́ den hàarí yɔn ɓɛ́ wɔ̃̀hṹ lɛ ɛ́ ɓɛ́ mɛ́ híɛhɔ́. 8Ɛ́ mí bí nɛ ke wé ńdaaníkɛɓánkũǹ nìɛ kɛ̀a ie ɓɛpe nìɛ sɔ dɔ̀ bòo lɛ ɛ́ ɓɛ́ hàarí wɔ́, ɛ́ nìnbirìe muasíe ɓénlé àá bɔ̀nbɔ̀ tĩ ɛ́ dàa hàarí húrun peɓɛ̀ tĩ́ihṹ wúsɔn-kùi hũn wɛ̀. 9Ɛ̀ mì bí nɛ ke vua ɔ Kirisa ɲunù kɛ̀a bòo lɛ ɛ́ ɓɛpe nìɛ sɔ dɔ̀ ɛ́ dàa hàarí wɔ́ hɔ́, ɛ́ ɓɛ́ hóohĩ́ ɛ́ dàa cã́a ɓɛ̀ ɛ́ ɓɔ́ wɛ̀. 10Ɛ̀ mì lò bí wóo fĩ mi ɲihĩ́ɛ hũn ɛ̀ nɛ̀ún Dɔfĩn kɛ̀a ie ɓɛpe nìɛ sɔ dɔ̀ bòo lɛ ɛ́ ɓɛ́ hàarí wɔ́, ɛ́ Dɔfĩn dàa hàarí tɔrɛ à húmú mɛlɛkɛ á ɓɛrɛ ɓɔ́ ɓɛ́ wɛ̀.

11Ɛ́ hɔ́pe sí ɛ́ den wɔ́ ɓɛ́pe kìe zĩkĩ́nɓɛ̀ ǹ bòo lɛ ɛ́ wé ɛ́ hɔ̀ wé bòo zɛ̃́nílán ɓɛ̀ nìnbirìe viì. Ɛ̀ hɔ̀ ɛ́ wɛ̃́ ɛ́ mii dàá ɲì kè zeń lɔ̀n, kèpe lɛ ɛ́ wo wi le pɛ̃̀hṹ lɛ vénlɔ́ dɛ̃un hũn. 12Ɛ́ sí iè hɔ̀pe á nìnbírɔ lɛ ɛ́ lieníkɛ à nɛ mí fɛ́sí dɛ̃̀ sãa ɛ̀ ɓɛ́ɓɛ́ míte ǹ à bí kùén wɛ̀. 13Ɛ́ hɔ́ bòo lɛ ɛ́ wóò cɛ̀ ɛ̀ hɔ̀ súuní miɛ nɛ mi wé hɔ́ bɔ̀koohɔ́ lɛ ɲɛùn yí hàaní nìnbírɔ ǹ ɛ́ yí mi ɛ́ mínɛ wɛ̀. Ɛ́ Dɔfĩn lɛ iè bɔ̀berà ɓàasɔ ɛ́ yá ɓén tɛ̀ ɛ́ fùansí ɛ́ hɔ́ bɔ̀koohɔ́ ɛ́ hàaní miɛ fúu ɛ́ vɛ pɛ̃́un mí pànkɛ́ wɛ̀. Kɛ́ pɛ̃̀hṹ lɛ kɛ́ hɔ́ bɔ̀koohɔ́ ɛ́ mì hàaní, ɛ́ Dɔfĩn ɛ́ lɛ́ hɔ́ pànkɛ́ miɛ ǹ ɛ́ mí dàá hĩ̀iní mí hũn, ɛ̀ Hɔ̀ lò ɛ́ zɛ̃́ní wṹn miɛ ǹ ɛ́ mí dàá lé pehɔ̀ hũn.

14Ɛ́ sí iè hɔ̀ pe, mìpe kìe pàáɓɛ́ lɛ ɛ́ ń wɛ, ɛ́ mí dàá zè ɛ̀ mí kɛ́ hɔ́ wɛ̃̀hɛ̃ bòo. 15Mí iè nìɛ lɛ ɛ́ wóò vɛ̀ mì hũn cɛ̃̀un hɔ̀ bòo míkùi hũn. Ɛ́ mí wo vɛ̀ mì hũn sãàní hɔ́pe bòo lɛ ɛ́ nín bie àá miɛ lɔ̀n. 16Mì húi ɔ́ Ɲunsɔ díe bòo lò! Ké wóò dé Dɔfĩn bɛrikɛ hɔ̀ bɔ̀ɲuriè lɛ ɛ́ wi le ɲuǹlán dìɛ hũn bòo hũn. Ɛ́ ké ɓen ɛ́ hɔ̀ ɲu, ɛ̀ hɔ̀ sũǹ yáà lɛ́ ɛ̀ kè yí ńcɛɓánlɔ́ àá ɔ́ Kirisa piè cãani lɛ ɛ́ koosí bòo hũn? Ɛ̀ hɔ̀pe búrú lɛ ɛ́ ké wóò ɓùenkɛ lò: ké ɓen ɛ́ hɔ̀ lɛ̀ ɛ̀ hɔ̀ sũǹ yáà lɛ́ ɛ̀ kè yí ńcɛɓánlɔ́ àá ɔ́pe Kirisa tɛkɛà? 17Ɛ́ hɔ́ búrú ɛ́ den iè dìcóoní, kɛ́ képe àá ké buorɔ́ míkùi ɛ́ den iè tɛkɛ-cóoní nìɛ iè hɔ̀ lɛ ɛ́ hɔ́ den iè hɔ̀pe búrú dìcóoní ɛ́ ké wóò lɛ̀. 18Ɛ́ mí húi ɓɛ́pe Yizarayɛɛle nìɛ lò! Ɓɛ̀pe lɛ ɛ́ wóò lɛ̀ ɓɛ̀ bìlàasiè lɛ ɛ́ ɓɛ́ ɛ́ ɓɔ́ lé miyiɛ́ leǹlén dúekéré lɔ̀n ɛ́ lɛ́ Dɔfĩn, ɛ́ ɓiɛ̀ wóò yí ńcɛɓánlɔ́ àá hɔ́pe Dɔfĩn lɛ ɛ́ lépe miyiɛ́ leǹlén dúekére ɛ́ bòo sɛ̃̀ nin. 19Ɛ́ hɔ́ wo iè ńɓúò ɛ́ nín cɛ̀ nín bie? Nɛ ɓɛ bìlaàsiè lɛ ɓɛ́ ɓɔ́ hɔ́ wɛ̃̀hɛ̃ lɔ̀n taà ɛ́ temu iè bòo dɔ̀? Yée kɛ́ hɔ́pe wɛ̃̀hɛ̃ ɛ́ temu iè bòo bɔ̀? 20Ńɓùé dɛ́! Hɔ bòo ɛ́ ń den nɛ ɓɛpe bìlàasiè lɛ ɓɔ́ hɔ́ wɛ̃̀hɛ̃ lɔ̀n ɛ́ iè ɓɛ̀ ńɲíkĩ́nìɛ ɛ́ ɓɛ́ ɛ́ ɓɔ́ lɛ́ nin. Ɛ́ ń den yá cɛ̀ nɛ mi yí ńcɛɓánlɔ́ àá ńɲíkĩ́nìɛ wɛ̀. 21Ɛ́ mí yí dɛ̀ yá páaní ɲu àá Ɲunsɔ ɲùnlán dìɛ ɛ̀ mì lò ɛ́ ɲu àá ɓɛ́ ńɲíkĩ́nìɛ ɲuǹlán dìɛ wɛ̀. Ɛ̀ mì yí dɛ̀ Ɲunsɔ díe àá ńɲíkĩ́nìɛ díe ɛ́ yá páaní dí wɛ̀. 22Yée kɛ́ ké iè bìe ɛ́ cànkɛ ɛ̀ kè dé yanlienú Dɔfĩn? Mí lieníkɛ ɛ̀ mì nɛ ké dàa pànkɛ́ pɔ Dɔfĩn?

Nɛ hɔ bòo lɛ ɛ́ mí wóò wé míkùi ɛ̀ wóo dé yèrè Dɔfĩn

23Ɛ́ ɓɛ́dɔ̀ ɛ́ wóò bie nɛ làa: «Ké te kete ɛ́ dɛ̀ bòo míkùi ɛ́ wóo wé.» Ɛ́ hɔ́pe wo bɔn. Kɛ́ hɔ́ den yí bòo míkùi ɛ́ temu tũ̀nú wi ke viì wɛ̀. «Kèpe wo te kete ɛ́ dɛ̀ bòo míkùi ɛ́ wóo wé», kɛ́ hɔ́ den yí bòo míkùi ɛ́ temu dɛ̀ wóo lɛ́ ɛ̀ ɓɛ̀ ńdɛsĩ̀rìe ɛ̀ vɛ àá híɛhɔ́ wɛ̀. 24Nɛ hɛ̀rí nìnbírɔ ɛ̀ bí wóo wé mí kùrú sãàrɔ́ à cɛ̀, kɛ́ á wóo wé ɓɛ́lɛ kɛ́ sãàrɔ́ à cɛ̀.

25Hɔ̀ bòo lɛ ɛ́ yìɛní lé yàa hũn míkùi ɛ́ mí dɛ̀ ɛ́ wóo dí, kɛ́ mí den bí wóo bie nɛ mí dìekɛ pehɔ̀ lénlén, bòo lɛ ɛ́ wé ɛ̀ mì hũn nùnlé ɛ̀ kań vi-cóoní. 26Iè hɔ̀ lɛ ɛ́ hɔ́ den wɛ̃́ lé Dɔfĩn bienù vɛ̃hṹ nɛ «le sṹsùnù àá hɔ́ bòo lɛ ɛ́ wi pelè lɔ̀n míkùi ɛ́ bòo sɛ̃̀ Ɲunsɔ ǹ.»

27Kɛ́ nìnbírɔ lɛ ɛ́ yí ńdɛsĩ̀rɔ ɛ́ nɛ mi ɛ̀ pen miɛ ǹ, kɛ́ mí tɛ̀ van, ɛ̀ hɔ̀ bòo míkùi lɛ ɛ́ ɓɛ́ lɛ́ miɛ ǹ ɛ́ mí dí kɛ́ mí bí dìekɛ bòo wɛ̀. Bòo lɛ ɛ́ wé ɛ̀ mì hũn nùnlé ɛ̀ kań vi-cóoní. 28Kɛ́ nìnbírɔ dɔ̀ ɛ́ van bie lɛ́ miɛ ǹ nɛ làa: «Hɔ̀pe lɛ ɛ́ iè bòo lɛ ɛ́ dúɓɛ́a hɔ̀ wɛ̃̀hɛ̃ lɔ̀n ɛ́ te mí tàa», ɛ̀ mì bí lɛ̀ hɔ́, àpe lɛ ɛ́ bie hɔ̀ lɛ́ miɛ ǹ bòo hũn, àá lé hũn nùnlé bòo hũn. 29Ɛ́ hɔ́ yí mípe mì hũn nùnlé ɛ́ ń nɛ̀, kɛ́ hɔ́ iè ɔ̀pe sí hũn nùnlé ɛ́ nín bòo ɛ̀ bie.

Ɛ́ hɔ́ wo iè ńɓúò ɛ́ nìnbí-ɓuɛ̀ hũn nùnlé ɛ́ dàa te ńtṹnú ɛ́ dé hɔ́ bòo lɛ ɛ́ ńpe ɛ́ te niǹte ɛ́ wé ǹ? 30Ɛ́ kɛ́ ń ɓen dɔ́ Dɔfĩn bɛrikɛ vɔ́ hɔ́ bòo lɛ ɛ́ nín dí bòo hũn, ɛ̀ ńɓúò temu lɛ́ ɛ́ ɓɛ́ dàa ɛ́ niǹ yèrè ɛ̀ yaa hɔpe dínlɔ́ lɛ ɛ́ ń dɔ́ Dɔfĩn bɛrikɛ vɔ́ bòo hũn?

31Ɛ́ kɛ̀amu, ɛ́ mí ɓen ɛ́ dí kɛ́ mí ɛ́ ɲu, ɛ̀ bòo yée bòo lɛ ɛ́ mí ɛ́ wé míkùi, ɛ́ mí wóo wé ɛ̀ dàá ɓàaní Dɔfin. 32Mì bí lɛ́ nɛ mi bɔ̀werà ɛ̀ lɛ́ ɛ̀ ɓɛ̀ Zuifuɓɛ tàá ɓɛ̀lɛ yí ɓɛ́ Zuifuɓɛ tàá lè Dɔfĩn zũnù ńkóoɓánlɔ̀n nìɛ ɛ̀ khe Dɔfĩn wṹn wɛ̀. 33Ɛ́ mí wóo wé kɛ̀a ǹpe: ń den can niǹ kuò hɔ̀ bòo míkùi hũn, bòo lɛ ɛ́ wé ɛ̀ niǹ bòo dàá tĩiní ɓɛ́ nìnbirìe ɓɛ́kùi ǹ. Hɔ̀ yí ńpe niǹ kùrú sãàrɔ́ ɛ́ nín cɛ̀, kɛ́ ɓɛ́ den iè ɓɛ̀ nìnbí-kuì sãàrɔ́ ɛ́ nín cɛ̀, bòo lɛ ɛ́ wé ɛ̀ ɓɛ̀ yí fuen.

Currently Selected:

1 Korɛnte Siè 10: bwj

Highlight

Copy

Compare