1 Korɛnte Siè 9

À tɔnkɛrɔ bòo lɛ á sãawi à wóo wé

1Ɛ́ bòo ɛ́ nín wìe ɛ́ yí te niǹte? Ɛ́ nín wìe ɛ́ yí Dɔfĩn tɔnkɛrɔ? Ɛ́ nín wìe ɛ́ yí mi ke Ɲunsɔ Yiezu? Ɛ́ bòo ɛ́ mípe ɛ́ yí hɔ́ bòo lɛ ɛ́ ń yú-o Ɲunsɔ tɔnlɔ́ lɛ ɛ́ nín tɛ́ hũn? 2Hɛ̀rí kɛ́ ɓɛ́dɔ̀ viì ɛ̀ ǹpe ɛ́ yí Dɔfĩn tɔnkɛrɔ, ɛ̀ mìpe viì ɛ́ ń iè ɔ̀pe àá bɔ̀bín. Mìpe mì ńcɛɓánlɔ́n àá ɔ́ Ɲunsɔ ɛ́ temu iè hɔ̀ bòo lɛ ɛ́ zɛ̃́ní kɛ́ ńpe ɛ́ iè ɔ̀pe Ɲunsɔ tɔnkɛrɔ àá bɔ̀bín.

3Ɛ́ lɛ iè hɔ̀ bòo lɛ ń dàa ɛ́ nín dàá kɔ̃́ní ɓɛ́pe lɛ ɛ́ niǹ wũ̀aní: 4Bòo ɛ́ ké sũǹ hṹn yí fɔ́ɓán ɛ̀ kè yí bɔ̀díe àá mí bɔ̀ɲuriè hɔ̀ tɔnlɔ́ lɛ ɛ́ ké ɛ́ tɛ́ bòo hũn? 5Bòo ɛ́ ń hṹn yí dɛ̀ ńdɛsĩ̀rɔ hṹnu dɔ̀ ɛ́ yá wé àá kìe hṹnu á wóo níiní mi kɛ̀a bòo lɛ ɛ́ ɓɛ́pe tɔnkɛriè lɛ kɛ́ àá ɔ́ Ɲunsɔ ɓà zɛ̀ɓɛ̀ àá ɔ́ Piɛre ɛ́ dàa wóò wé hɔ? 6Íee kɛ́ ńpe àá Baranabaasi kè dòonún ɛ́ temu fɔ́ɓán ɛ̀ kè wóo tɛ́ ɛ̀ dàá díiní kéte? 7Á iè sɛ̃̀nɛ̀dɔ́sí hɔ́sɔ ɛ́ mí ɲɛùn mɔn kɛ́ á te míte ɛ́ wóò sàaní ɛ̀ dàá tɛ́ mí sɛ̃̀nɛ̀dɔ́sí yaamu tɔnlɔ́? À iè wieni ɛ́ mí ɲɛùn mɔn kɛ́ á wóò fɛ́ hɔ́ vɛ̃̀hɛ̃ à yá dí pehɔ̀ biè? À iè wieni ɛ́ temu wóò sie ɓɛ bìlaàsiè kɛ́ á yá ɲu peɓɛ̀ yɔmu?

8Hɔ̀ yí ɓɛ́ nìnbirìe bòo lɛ ɛ́ ɓɛ́ wóò wé mí dòonún ɛ́ ń mɔ̀ ɛ́ dàa ɛ́ niǹ biehĩ́ ɛ̀ bie wɛ̀. À Moyiize làndɛ́ ɛ́ ɓiɛ̀ khɛ́ hɔ́pe bɔ̀cóoní sɔ. 9Hɔ̀ ɛ́ wɛ̃́ ápe Moyiize làndɛ́ vɛ̃hṹ hũn ɛ́ nɛ làa: «À nàa lɛ ɛ́ hɔ̀ sìe hũn ɛ̀ vɛ̀ ɛ́ kɔ́ bí cɛ ɲunù wɛ̀.»#9.9 Vɛ húi 1Timote 5.18 Ɛ́ bòo ɛ́ ɓɛ́ iè ɓɛ̀ nɛ̀ɓɛ̀ ɓɛ́ dòonún ɛ́ Dɔfĩn kuò ɛ́ hè bòo hũn? 10Hɔ̀ sũǹ yí képe bòo hũn ɛ́ hɔ́pe Dɔfĩn ɛ́ dàa ɛ́ bie kɛ̀amu? Ũun hɔ̀ iè kèpe bòo hũn ɛ́ hɔ́pe biehĩ́ sɔ ɛ́ dàa wɛ̃́. Á vànvɛ̀ ɛ́ fɔ́ɓán à wóo vɛ̀ kɛ́ á dɔ́ mí tĩì nɛ mí ɓén mìí bòo, àlɛ ɛ́ hɔ̀ sìe ɛ̀ ɓán ɛ́ fɔ́ɓán à wóo ɓán kɛ́ á dɔ́ mí tĩì nɛ mí ɓén yí hɔ́ sì-biè. 11Ɛ́ ké wo zù lè Dɔfĩn bienù mì tĩɛ̀ hũn. Ɛ́ bòo ɛ́ mí ɓen ɛ́ mì yírɛ́ sɛ̀nù dɔ̀ ɛ̀ lɛ́ kiè ɛ̀ kè wé àá ké ɲunù dínlɔ́ hɔ́rɔsí ɛ̀ mì iè bìe zĩ̀níkɛa ɛ́ wé ɛ̀ vɛ khie mí khiɛ̀? 12Ɛ́ kɛ́ nìnbí-ɓuà ɛ́ ɓen dàa ɲunù lɛ ɛ́ wóò ɓen fé mí núnú hũn bòo dɔ̀, ɛ̀ kèpe ɛ́ sũǹ hṹn yí dàa ɲunù lɛ wóo yí mí núnú hũn bòo ɛ́ pɔ ɓɛ́?

Kɛ́ képe ɛ́ den yí wé hɔ́pe sí wɛ̀. Ké ɛ́ den hɛ̃̀ kè hũn hɔ̀ bòo míkùi hũn bòo lɛ ɛ́ wé ɛ̀ kè bí sí-e Kirisa Bentĩnu wɛ̀. 13Ɛ́ mí bìe yí dũ kɛ́ ɓɛ́lɛ ɛ́ tɛ́ lé Dɔfĩn zũ-bɛhɔ́ hũn ɛ́ wóò yí ɓɛ́ dínlɔ́ pelè hũn? Ɛ̀ ɓɛ̀lɛ ɛ́ te ɓɛ bìlàasiè ɛ́ wóò wòokɛ ɛ̀ wé àá lé miyiɛ́ ɛ̀ lɛ́ Dɔfĩn ɛ́ ɓiɛ̀ wóò yí ɓɛ́ hɔ́n ɓɛ̀pe bìlàasiè lɛ wòokɛa hũn? 14Ɛ́ sí ɓiɛ̀ iè hɔ̀pe ɛ́ Ɲunsɔ ɛ́ dàa bie nɛ ɓɛlɛ ɛ́ lè Bentĩnu ɛ̀ buie ɛ́ ɓiɛ̀ sãawi ɛ̀ ɓɛ̀ wóo yí ɓɛ́ ɲunú díe lèpe Bentĩnu buierɔ́ hũn.#9.14 Vɛ húi Matiye 10.10

15Kɛ́ hɔ́pe bòo sí ɛ́ ń lò hṹn dɛ̀ ɛ́ wé míkùi, ɛ́ pehɔ̀ dìcóoní dɔ̀ ɛ́ den ɛ́ yí wé wɛ̀. Ɛ̀ hɔ̀ lɛ ɛ́ nín wĩ́ kɛ̀amu ɛ̀ lɛ́ miɛ ǹ ɛ́ lò yí bòo ɛ́ ń nɛ mi wé hɔ́pe bòo sɔ ɛ̀ lɛ́ mi ǹ wɛ̀. Ɛ̀ ǹ tɛ hí ɛ́ bòo tṹ, kɛ́ ń den yá tɛ̀ ɛ́ nìnbírɔ dɔ̀ ɛ́ leń hɔ́pe bòo lɛ ɛ́ te le yèrè ɛ́ dé mi ǹ wɛ̀. 16Ǹpe niǹ viì, ɛ̀ lè Bentĩnu lɛ ɛ́ nín buie ɛ́ yí te yèrè ɛ́ yá lɛ́ mi ǹ, iè hɔ̀ lɛ ɛ́ hɔ́ iè tɔnlɔ́ lɛ ɛ́ ń fɔ́ɓán ɛ̀ ǹ tɛ́. Ɛ́ kɛ́ ń yí buie lepe Bentĩnu, ɛ́ nín yìi ɛ́ den ɛ́ mi hɔ. 17Kɛ́ ńpe niǹte ǹ ɛ́ hṹn te hɔpe tɔnlɔ́ sɔ ɛ́ munɛ, ɛ̀ ǹ hṹn fɔ́ɓán àá sàanín. Kɛ́ hɔ́ lɛ ɛ́ hɔ́ iè tɔnlɔ́ lɛ ɛ́ bɔ̀ niǹ lɔ̀n, ɛ́ hɔ́ wo iè hɔ̀pe tɔnlɔ́ lɛ ɛ́ Dɔfĩn ɛ́ dɔ́ niǹ núnú hũn ɛ́ nín tɛ́. 18Ɛ́ niǹ sàanín ɛ́ wo iè hɔ̀ hɔ́sɔ? Niǹ sàanín iè hɔ̀ lɛ ɛ̀ ǹ buie le Bentĩnu ɛ̀ lɛ́ ɓɛ́ nìnbirìe ǹ khã́máà, ɛ̀ ǹ buie le kɛ́ ń lò bí cɛ̀ bòo dɔ̀ lɛ á Bentĩnu buierɔ ɛ́ sãawi à yí wɛ̀.

19Ɛ́ hɛ̀rí àá hɔ́ lɛ ɛ́ ńpe ɛ́ te niǹte ɓɛ̀ nìnbirìe ɓɛ́kùi viì, ɛ́ ń den pɛ́ wɔ́ niǹte àá ɓɛ́pe nìnbirìe ɓɛ́kùi wɔnù bòo lɛ ɛ́ wé ɛ̀ ǹ vɛ́ ɓɛ́ nìnbí-kùi ɛ̀ dàá ɓen ɔ̀ Kirisa viì. 20Ń ɓen wi àá ɓɛ Zuifuɓɛ, ɛ̀ ǹ wé kɛ̀a iè Zuifu, bòo lɛ ɛ́ wé ɛ̀ ǹ yí ɓà ǹ ɛ̀ lɛ́ Kirisa ǹ. Ɛ̀ ǹ ɓen wi àá ɓɛ́lɛ ɛ́ wi-e Moyiize làndɛ́ pànkɛ́ fìi hũn, ɛ̀ ǹ wé kɛ̀a bòo ɛ́ ń ɓiɛ̀ wi hɔpe làndɛ́ pànkɛ́ fìi hũn, bòo lɛ ɛ́ wé ɛ̀ ǹ yí ɓà ǹ, kɛ́ ń lò den mí hɔ́pe làndɛ́ pànkɛ́ fiì hũn wɛ̀. 21Kɛ́ ń den ń ɓen wi àá ɓɛ́lɛ ɛ́ yí dũ a Moyiize làndɛ́, ɛ̀ ǹ wé kɛ̀a bòo ɛ́ ń ɓiɛ̀ yí dũ a hɔpe làndɛ́, bòo lɛ ɛ́ wé ɛ̀ ǹ yí ɓà ǹ. Kɛ́ hɔ́ lò yí bòo ɛ́ ɓɛ́ nɛ ń yá Dɔfĩn làndɛ́ ɛ̀ mɛ̀ndɛ̃ dɛ́! Ǹpe ɛ́ den wi-e Kirisa làndɛ́ pànkɛ́ fìi hũn. 22Ɛ̀ ǹ ɓen wi àá ɓɛ́lɛ ɛ́ ɲɛùn cũ̀kṹ mí hɔ́ ńdɛsĩ̀nlɔ́ hũn, ɛ̀ ǹ wé kɛ̀a bòo ɛ́ ń ɓiɛ̀ cũ̀kṹ mí, bòo lɛ ɛ́ wé ɛ̀ ǹ yí ɓà ǹ. Ɛ́ ń wɔ́ niǹte àá hɔ́ bòo míkùi ɓɛ̀ nìnbirìe ɓɛ́kùi bòo hũn, bòo lɛ ɛ́ wé ɛ̀ hɛ̀rí ɛ̀ hɔ̀ wé kɛ̀a ńɓuò, ɛ̀ ǹ hɛ̀ yí ɓɛ́dɔ̀ ɛ̀ fuenínin. 23Ɛ́ nín hɔ̀pe sí míkùi ɛ̀ wé lé Bentĩnu buierɔ́ yènsénín, bòo lɛ ɛ́ wé ɛ̀ ǹ ɓiɛ̀ yí niǹ hɔ́n bɔ̀tente lɛ ɛ́ zɔn wi lepe sɔ Bentĩnu hũn.

24Mí lò wo dũ kɛ́ ɓɛ́lɛ ɛ́ hɔ̀ ńpenkɛɓán khã̀a ɛ̀ zè hɔ̀pe khã̀a zènlén khuiè hũn ɛ́ wóò páaní zè ɓɛ́kùi kɛ́ nìnbí-cóoní ɛ́ temu wóò yí hɔ́ sàanín. Ɛ́ mí zè sãaní bòo lɛ ɛ́ wé ɛ̀ mì yí hɔ́pe sàanín. 25Ɓɛ̀ khɛ̃̀zèriè ɓɛ́kùi ɛ́ ɓen ɛ́ ɓɛ́te ɛ̀ sɛ́sɛ́kɛ́ pɛ̃̀hṹ lɛ, ɛ̀ ɓɛ̀ wóò pĩ́ bòo cɛ̀rìɛɛ ɛ̀ tɛ́viɛní. Ɓɛ̀ wóò wé hɔ́pe sí, bòo lɛ ɛ́ wé ɛ̀ ɓɛ̀ yí hɔ́ sàanín lɛ lò iè bòo lɛ ɛ́ yáà míi wɛ̀. Kɛ́ képe ɛ́ den ɛ́ hɔ̀ wé hɔ́ sàanín lɛ pe yá yaa yá mi bòo hũn. 26Ɛ́ sí iè hɔ̀pe ɛ́ ńpe dàa ɛ́ zè, kɛ́ hɔ́ lò yí bòo ɛ́ nín zè kũǹ wɛ̀. Ń dɛ̃̀ kɛ̀a ie ńnúnkɛɓán sɛrɔ dɔ̀. Kɛ́ hɔ́ lò yí bòo ɛ́ nín núnkɛ kũǹ wɛ̀. 27Ɛ́ ń den ɛ́ hɔ̀ bɔ̀hiebáa ɛ̀ zɛ̃́ní àá nìn sɛ̃́hṹ, ń hɛ̀ ɓɛ́ɓɛ́a lè ǹ ɛ́ ɲàakɛanin, bòo lɛ ɛ́ wé ɛ̀ ǹ bí khɛ́ lé Bentĩnu ɛ̀ lɛ́ ɓɛ́lɛ kɛ́ ǹ, ɛ̀ zɔn dɔ̀ ɛ̀ ǹ vɛ khe hɔ sàanín wɛ̀.

Currently Selected:

1 Korɛnte Siè 9: bwj

Highlight

Copy

Compare