SAKARI 14
14
Durgi ma blam tawn wo de nduugi Manwuri
1Koɗa, wur naw mani Manwur yaŋ le age!
À ɓes ge fẽẽre ɓayn de see ɓayn wo yaŋ go
Ti holaŋ ɓay ni ɓay ni doo ga.
2Ndi tay ge ti wer sir wo yaŋ le go
Jerusalem ɓuy ma durgi
À yãã ge ɓi leegen yaŋ,
À dag ge tiŋ wo yaŋ go hrab hrab,
Day à suɗ gi yaŋ de naare ɓay wo,
À hoo ge nus ɓi leege no, raw ge yaŋ de ɓe,
Ane te jar maga gwaʼ ge wo mono,
Sen gwaʼ ge wo mbaara ɓi leege ni.
3Manwur kal ge yaŋ go,
Day dur gi wer sir sen wo yaŋ
Doo maga á hay dur ti wur durgin nono.
4Ɓaale ɓe kaŋ ge yaŋ ti wursen
Ti húulì maga koore Olife wo ti ɓe mono,
Maga de ngafge de Jerusalem,
Wo nen wer no kay mono.
Húulì maga koore Olife wo ti ɓe mono
Celer ge yaŋ go ti gisiɗgi nen wer lay, nen pel lay
Caa ge log yaŋ ti holaŋ ni kluu debaŋ
Nus húulì maapo boŋ yaʼ ge yaŋ wo go nen ɓaŋ gloŋhwede,
Nus ma lan yaʼ ge yaŋ wo go nen ɓaŋ ni wãybane.
5Doo kay nono, nday daŋ ge yaŋ wo go
Ti log húulì ɓin wo.
Werga log húulìn wo ge wo go kaŋge hãã Atsale.
Nday daŋ ge yaŋ doo maga nday hay
Ɗee pel daɗge sir ma ti wur mani Osiyas
Waŋ Judan nono.
Manwuri, Baa ɓin nduu gi yaŋ
Day, jar ɓe ma bay ɗagn joŋ ge wo yaŋ wer ɓe.
6Doo kay nono ti wursen mono,
Poɗag joŋ ge gà ceere joŋ ge gà
Glas joŋ ge gà lay
7Á joŋ ge diŋ naw maga go ni no boŋ no,
Naw maga Manwur de koge ɓe,
Maga joŋ ge mokay bay diŋ ngel ceg wa lay,
Bay diŋ ngel suŋ wa lay
Ama wo dayge ge de law no kay mono poɗag naa ge nen yaŋe.
8Doo kay nono ti wursen mono,
Bii ma de siggi yigyig kal ge yaŋ le go Jerusalem,
Plaŋ yuu gi yaŋ wo nen jag maarog ma nen wer no,
Plaŋ yuu gi yaŋ nen jag maarog ma ɓaŋ lan lay.
Sen joŋ ge doosen nono de yaale lay, ti cege lay.
9Manwur joŋ ge diŋ Waŋ ma ti tamsirn ɓuy.
Ti wur sen mono,
Manwur joŋ ge diŋ Baa ma boŋ no,
Day ɗúu ɓe joŋ ge diŋ ɗúu ma boŋ no.
10Sirn ɓuy joŋ ge go doo Araba nono,
Le Geba kaʼ hãã go Rimmon
Nen ɓaŋ ni wãyban Jerusalem
Day Jerusalem joŋ ge yaŋ go de maŋge ciŋ
Day joŋ ge ti ngel ɓe ni,
Le jag tiŋ mani Benjamen kaʼ
Hãã go ti ngel jag tiŋ ma taŋgu no,
Hãã go jag tiŋ ma de her cõõ wo no.
Day hãã le ti tiŋ ma de gẽẽre ma Hananeyel no,
Hãã go ti ngel hãɗ fẽẽre mani waŋ no.
11À lag ge yaŋ de tiŋ ɓil ɓe
Day fen maga go de diggi joŋ ge gà so,
Jerusalem hay ge yaŋ go de yõõ ti.
12Mokay diŋ bulfũŋ maga Manwur ɓoʼge ne wer jar
Wo ti ɓuy maga wo ge wo de soode ɓaaran wo dur
Jerusalem mo ɓuy no.
Hõõgese wosela ɓuy buu gi go deele deŋ,
Nen ɓe buu gi wo le go ɓi hul ɓaaran ni kaɗ kaɗe,
Day trum ɓe buu gi le go jag ɓe ni kaʼa.
13Ti wursen mono,
Manwur joŋ ge re ma gijig gijig debaŋ yaŋ ti holaŋ
Ɓaara je ma lan ɗaw ge doo je ma lan yaŋ
Day je ma lan maŋ ge doo yaŋ ciŋ see je ma la no.
14Juda dur gi yaŋ ɓi leege Jerusalem,
Day à tay ge horog ma ti wer sir ma ti jeŋ wo ni kara
Ɓuy yaŋ go pur debaŋ :
Boo biŋni wo, boo solay wo, de õõbe wo ra.
15Bulfũŋn leʼ ge go ne piiri wo ti lay,
Gerhẽẽ wayla wo, manyoŋyoŋ wo, gerhẽẽ wo,
De horog maga joŋ ge wo mbásga sen ni mo ɓuy,
Bulfũŋ sen joŋ ge de maŋ ma lan pa.
16Doo kay nono, jar maga gwaʼ ge wo yoo wer sir
Maga hay nduu wo dur Jerusalem mo ɓuy,
Wo ge wo yaŋ nen kiŋgi tum
Ma leʼ monɗra pel waŋ, Manwur Pantway,
Ma joŋ few mburyugi.
17Doo kay nono hayga, wer jar po wo ti sir la,
Bay wo we woge Jerusalem
Ma leʼ monɗra pel waŋ, Manwur Pantway wa no,
Baa ra ge ni ɓaara gà.
18Hayga wer jar Ejipte
Bay wo we woge wa, hayga á nduu wo we gà no,
Baa ra ge ni ɓaara gà.
Sen joŋ ge diŋ bulfũŋ maga Manwur
Ɓoʼn ge ne wer sir maga wo ge wo Jerusalem
Ma joŋ few mburyug gà mono ti.
19Sen joŋ ge diŋ bon maga daʼ sir Ejipte,
Diŋ bon ma daʼ wer sir lan wo ɓuy maga
Bay wo woge joŋ few mburyug wa mono.
20Ti wursen mono, à yer ge yaŋ
Ti kondoloŋ ma soole piirin ga :
Debay ɗag mani Manwuri no!
Day teɓoole maga wo ɓi tiŋ mani Manwurn mono
Joŋ ge wo doo kalis ma ti ngel siɗ jagn nono.
21Teɓoole maga wo Jerusalem de Juda mo ɓuy
Joŋ ge wo bay ɗage, ma Manwur Pantway.
Jar maga nduu gi wo joŋ siigi jag mo ɓuy,
Hoo ge wo ra yaŋ ma kar này.
Day jar joŋ trere joŋ ge ɓi tiŋ mani
Manwur Pantwayn
Ti wursen gà so.
Currently Selected:
SAKARI 14: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
