JAŊ 21

Yeso naa nen see ɓe ne jar ma wer ɓe wo nen renam

1Naw wo nà ge blam sen rabe, Yeso raw naa nen see ɓe ne jar ma wer ɓe po wo nen tigriŋ pa, ti jeŋ maarog ma Tiberiyade. Jar maga á naa nen see ɓe ne hara mono, 2diŋ Simoŋ Piyer, Toma (maga à ɗen ga Welgèere), Nataniyel (ma Kana ma ɓi sir Galile) de jar ni Sebeden wo, de jar ma wer Yeso ma ɓog lan wo, á hay wo de tay ti ti ngel po kaʼ boŋ. 3Simoŋ Piyer raw riŋ rage ga : Ndi wo bag cẽẽ. Á raw wo riŋgi ɓe ga : Wùr wo wer ɓo lay. Á kal wo rawge, ɗii wo daage. Ama saara laa baa mopo de suŋ ni gà hase. 4Wur wo le kalge mono, Yeso raw naa nen le jag bii no, ama jar ma wer ɓen kon wo ga á diŋ se naa ko gà. 5Yeso raw ɗe rage ga : Ɓa weere jõõre wo, nday bag mbay cẽẽ we? Á raw wo ferge ne hẽn ga : Bay wa. 6Á raw riŋ rage ga : Laa we bày ɓayn ti jeŋ daagen ɓaŋ ware, ni nday bag yaŋ. Á raw wo laa bayn so. Blam sen egre ɓaara laa kããge ma kog bayn le go ciŋ gà so, werga bayn baa go de cẽẽ debaŋ. 7Je ma wer Yeso po ga á dan debaŋ raw riŋ Piyer ga : Á diŋ Waŋkluu naa no.

Piyer wo laage ga á diŋ Waŋkluu saaran mono, raw laa õõbe ɓen ti, (werga á hay go see koɗe) raw yooge nen bii. 8Jar ma lan kal wo rawge le de daagen kog bàyn le de baage go de cẽẽ debaŋ. Á hay bay wo wo go see diŋdiŋ bii hãã wa, nen meeder kis boŋ. 9De maga saara wo go ɗiigi gesiŋ mono, á raw wo ko wùu de fuggi de cẽẽ ti cogge kaʼa, hoole ni lay. 10Yeso raw riŋ rage ga : Hoon we le see cẽẽ maga nday bag ra le la mono. 11Simoŋ Piyer raw ɗii daage no, raw fũŋ bàyn le go ciŋ de bagge de cẽẽre ma kluuri wo debaŋ, kis ti ɓe doo dwee ti swaʼa. De maga cẽẽn mbe go de baa bayn mo deŋ ɓuy, bàyn ngar go gà. 12Yeso raw riŋ rage ga : A we le rege. Jobo kãã ma wiigi ɓe yoo jar ma wer ɓen wo ga á diŋ wo la gà hase, werga á wo go de koge ɓe ga á diŋ Waŋkluu saara no. 13Yeso raw yaʼ ge le, raw maŋ hoole no, raw hãge ɓe ne hara, raw hã cẽẽ ne hara ni lay.

14Yeso dog ndar nen see ɓe ne jar ma wer ɓen wo nen mokay ma de swaʼa, de maga á fer kalge go ciŋ tenen mono.

Yeso wo de Piyere

15Blam maga saara re go re mono, Yeso raw ɗe Simoŋ Piyer ga : Simoŋ je ni Jaŋ, ndo da me daŋ jar ma lag wo yawla? Se raw yiŋ jag ga : Ãã Waŋkluu, ndo yaŋ de koge ga ndi da ndo. Yeso raw riŋgi ɓe ga : Koɗ weere sããre ɓin wo me de ele. 16Á fer dogge ɓe ma de ɓog pa ga : Simoŋ je ni Jaŋ, ndo yaŋ mbo da mege gla? Piyer raw yiŋ jag ga : Ãã Waŋkluu, ndo yaŋ de koge ga ndi da mo. Yeso raw riŋgi ɓe ga : Koɗ sããre ɓin wo me de ele. 17Á fer dogge ɓe ma de swaʼ pa ga : Simoŋ je ni Jaŋ, ndo yaŋ mbo da mege yawla? Piyer raw hrag see go ti maga Yeso dog wiigi ɓe ɓaale swaʼ ga á yaŋ mbe da se ge yawla, á yaŋ da se ge yawla mono. Á raw yiŋ jag ne hẽn ga : Ãã Waŋkluu, ndo go de ko reen ɓuy, ndo yaŋ mbo de koge ga ndi da ndo mo pa la. Yeso raw wiigi ɓe ga : Koɗ sããre ɓin wo me de ele. 18Á raw ga : Kidolgi ndi riŋ ndo, ndo jõõ mo caw ndo saʼ mblaaga ɓon sag ɓo de see ɓo, ndo see ti ngel maga ɓil ɓo da, ama ndo wo ge we go joŋ tããbe no, ndo raw mbeɗ doo ɓo ge wo go, je tigriŋ saʼ ge mblaaga ɓon mo, wo de ɓo ti ngel maga ɓil ɓo da gà. 19(Á wãã doosen ma kaŋ nen Piyer go ti húulí ɓe maga jar wo ge wo togoɗ Baa ti re ɓe mono.) Blam sen Yeso raw riŋgi ɓe ga : Maŋ blam ɓi.

Yeso wo de je ma wer ɓe maga á dan mono

20Piyer raw mbuɗ nen ɓe blam, raw ko je maga Yeso dan le seege wer ɓaara caw, diŋ je maga hay de gisgi jiili Yeso de maga ni á hay wo re hoolen, ga se hay wiin ga : Waŋkluu, je maga kaŋ taw ɓo go diŋ wo la mono. 21Piyer raw koge ɓe le, raw riŋ Yeso ga : Je maga day le mo caw joŋ ge joŋ ge lay ɓa? 22Yeso raw fer wããre ne hẽn ga : Hayga ndi da we ga á mo hay tenen hãã wur maga ndi wo le homge mo layblaʼ maŋ see ɓo tẽʼ la? Ɓon, maŋ diŋ blam ɓi. 23Wããre sen raw dusgi go yoo hẽẽre Yeso wo ɓuy ga je ma sen huu gà hase. Ni paga Yeso bay de wããge ne Piyer ga á huu gà wa, ama á wãã diŋ ga hayga se da we ga á mo hay tenen hãã ti wur maga se homge le, maŋ see ɓe tẽʼ la koɗe.

24Á diŋ je ma wer ɓe se ga sii wããre se kay go mono, diŋ je yerge ɓen lay, wùr ko lay ga wããre maga á wãã ne ti cwãy ɓe lay.

Ɓoʼ ge jag wããren go

25Yeso joŋ fẽẽre ma tigriŋ wo debaŋ pa, hayga à mo yer ra we go wer kẽẽ boŋ boŋ ɓuy no, hay bo tamsir la ɓuy draʼ layblaʼ, ndi ɗig ga ngel laa rage de joŋ la ni gà.

Currently Selected:

JAŊ 21: TUP

Highlight

Copy

Compare