JAŊ 20

À a daʼ rum húulìn go de koɗe

(Mat 28.1-8; Mark 16.1-8; Lug 24.1-12)

1De jag toŋ crum de maga ngel yaŋ de suŋgu ɗa, Mari ma Magdala kal rawge ti tipaale no. Á wo ko húulìn go de lagadge ti jeŋ tiʼ i, 2á raw ur ɗee deparday ɓiŋ jar ma wer Yeson wo, Simoŋ Piyer wo de je maga Yeso da ne mono, raw riŋ rage ga : Á naa wo Waŋkluu we le go ɓi rum no, wùr bay de ko ngel maga á ɓoʼn wo ni mo wa. 3Piyer wo de je ma wer Yeso sen raw wo rawge ti tipaale no. 4Á raw wo hoo ɗeere degaʼ ɓuy, day je ma lan raw ɗeege deparday daŋ Piyere, raw woge go ti tipaalen taŋgu ɓe. 5Á raw jel nen ɓe wo ko rum no, raw ko mblaagan go de laage gesiŋ lagge. Ama se laa kalge wo ɓi rum húulìn gà. 6Simoŋ Piyer raw age le blam ɓe, raw kalge ɓi rum sogge, wo daʼ mblaagan go de laage gesiŋ lagge, 7de õõbe maga hay de kuu ti Yeso mo lay. Õõbe ma sen hay bay ɓiŋ mblaagan wa, ama go de kaage ti jeŋ taʼ sara. 8Wersen je ma lan ga hay a go taŋgu la, raw kalge lay, raw koge, raw yãã re sen ga á cwãy. 9(De sen ɓuy jar ma wer ɓen laa mbaara laa wer wããre maga à go de yerge ɓe ga Yeso le go de húulí yoo jar ma de húulín wo, á fer ge le go birgi, saara laa laa wer ɓe mbe gà ɗa pa.) 10Blam sen jar ma wer ɓe ma ɓogn raw wo ferge liŋ ni ɓaara.

Yeso naa nen see ɓe ne Mari ma Magdala nene

(Mat 28.9-10; Mark 16.9-11)

11Mari raw hayge go jag rum húulìn yeʼ rage, de maga á de rage mo yeʼ, á raw jel nen ɓe wo ko rum no. 12Á raw ko jar peele Baa wo ɓog de õõbe ti depiiri, de lagge ti ngel maga à hay ɓoʼ húulí Yeso ni mono, ma la de hayge nen ti ɓe, ma la de hayge nen ɓaale ɓe lay. 13Jar peelen raw wo riŋgi ɓe ga : Wãy, ndo ra ɓon le ɓa? Á raw fer wããre ne hara ga : Werga à naa Waŋkluu ɓin go, day ndi bay de ko ngel maga á ɓoʼn wo ni mo wa. 14Blam maga á wãã doosen no wãã, á raw mbuɗ nen ɓe, raw ko Yeso de oole deŋe, ama se bay de koge ɓe go pah ga á diŋ Yeso wa. 15Yeso raw riŋgi ɓe ga : Wãy, ndo ra ɓon le ɓa? Ndo kiɗ ɓon diŋ wose la? Á raw ɗig ɓen ga á diŋ pan pay no, raw riŋgi ɓe ga : Hayga maŋn we diŋ ndo no, ni ndo kaŋ nen ɓi ti ngel maga ndo ɓoʼn ni mo ɗa la, ndi wo maŋge ɓe. 16Yeso raw ɗege ɓe ga : Mari. Á raw mbuɗ nen wo ne hẽn ti, raw wãã jag Hebre ga : Rabuni. (Wer ɓe ga : Waŋ ma pel kããra had jare.) 17Yeso raw riŋgi ɓe ga : Duʼ doo me see wa hase, werga ndi bay de ɗiigi wo see Pan ɓi wa ɗa. Ama see riŋ hẽẽre ɓin wo ga ndi raw we wo see Pan ɓi, diŋ Pan ɓay lay, see Baa maga ndi goŋ ne mono, diŋ Baa maga nday goŋ mo lay no. 18Blam sen Mari ma Magdala kal rawge riŋ jar ma wer Yeson wo ga : Ndi ko Waŋkluu we le. Á raw sii wããre maga Yeso wããn le ne hẽn ne hara lay.

Yeso naa nen see ɓe ne jar ma wer ɓen wo

(Mat 28.16-20; Mark 16.14-18; Lug 24.36-49)

19De law wur Dimasi sen ni tuu, jar ma wer ɓen hay wo de tayge tiŋma, tẽg wo jag tiŋ ti ɓaara de lakel doo hẽẽne jar Jwif wo. Yeso raw age kal ooge yoo ɓaara deŋ, raw riŋ rage ga : Baa mo ɗaw we jam. 20Blam maga á wãã doosen no wãã, á raw kaŋ nen ɓaara ti doo ɓe wo de yoo ɓe, jar ma wer ɓen raw wo joŋ ɓil go feh debaŋ de maga á ko wo Waŋkluu mono. 21Yeso raw riŋ rage pa ga : Baa mo ɗaw we jam. Doo maga Pan ɓi ɓoʼ me le nono, ndi laa we we lay. 22Blam wããre sen, á raw ɓoʼ egre ne hara ti, raw riŋ rage ga : Yãã we Nenterse ma bay ɗage. 23Jar maga nday men ɗig re ɓlagge ɓaaran we go ne hara ti, ɓlagge ɓaaran taw go. Jar maga nday day we men ɗig re ɓlagge ɓaaran go ne hara ti gà mo lay no, ɓlagge ɓaaran taw go ɓil ɓaara gà lay.

Yeso wo de gee Toma

24De sen ɓuy, jobo yoo jar ma wer ɓe ma hwal ti ɓogn wo, diŋ Toma (maga à ɗen ga Welgèere) hay bay yoo ɓaara de maga Yeso á yoo ɓaara mo wa. 25Jar ma lan raw wo riŋgi ɓe ga : Wùr ko Waŋkluu we. Toma raw riŋ rage ga : Hayga ndi ko defõõre wããge ponte ma doo ɓen we gà ndi hee wedoo ɓi we ti ngel maga à ɓaln de ponte ni mo gà ndi hee wedoo ɓi we ti defõõre wããge ma yoo ɓen gà no, ndi yãã wããre sen gà hase.

26Naw wo nage blam sen renam pa, jar ma wer ɓen raw wo tay ti tiŋma pa, wur sen Toma yoo ɓaara ni lay so, jag tiŋ go de maʼ ge de lakel pa, ama Yeso raw age, oo yoo ɓaara deŋ, kal riŋ rage ga : Baa mo ɗaw we jam. 27Blam sen á raw riŋ Toma ga : Yaʼ wedoo ɓo le la, ko doo ɓi mokay no, yaʼ doo ɓo le kaŋge nen defõõre wããge ma yoo ɓi no, men faare go so, hã ɓil ɓo me so. 28Toma raw ɗege ɓe ga : Waŋkluu, ndo Baa maga ndi goŋ mono. 29Yeso raw riŋgi ɓe ga : Ndo raw yããge wer maga ndo ko ndi mo so gà yawla? Jar maga yãã wo mbaara wããre ɓi bay ko mege woo wo yaŋ.

De el wããre maga á yer ne mono

30Yeso joŋ fẽẽre mbuɗgi ma tigriŋ wo debaŋ nen jar ma wer ɓen wo, maapo yaŋ wo, bay wo de yerge la ni ɓuy wa. 31Ama maga à yer sen mokay la maga wosela ɓuy mo yãã wããre Yeso ga à diŋ Mesi, diŋ Wel Baa. Baa mo kol ra go tenen tiʼ tum wer ɓe, wer hãge ɓil maga wosela ɓuy hã we ne hẽn mono.

Currently Selected:

JAŊ 20: TUP

Highlight

Copy

Compare