ESAY 9
9
1Jar maga wo de seege nen suŋgu ko wo poɗag ma kluu we.
Ngel ler we go ti jar sir maga húulí hay go de kaŋ cee ne hara ti mono.
2Ndo tes wer jarn wo,
Kol ra ngaɓa, ndo hã feg ne hara jage.
Á joŋ wo fruygi pel ɓo doo ma ti wur weegen nono,
ʼwad wo war fruygi doo ga saara de ɓes fẽẽre
Maga à yãã ra le jag jaw nono.
3Werga jug maga hay põõ rage,
Graw maga à hay mbar rage de ɓe,
Genày ma doo je joŋ bon jar no,
Sen wo ɓuy ndo hrag nen ɓaara we go doo ma ti
Wur maga à joŋ jar Madiyaŋ wo nono.
4Taarag ma ɓaale je durgi ma car sir no,
Õõbe ma kluu maga go de cíi ti mo ɓuy
À laa ge sen wo go ti wùu maga wùu mo roɗ ra go.
5Werga wel biŋ we ne naa,
À hã wel we ne naa.
Egre ma wãã re jar ɓuyn joŋ ge doo ɓe.
À ɗen ge yaŋ ga Daŋkããra no,
Je bag yaŋ no, Baa ma de egre no,
Pããbe ma tum no, Waŋ jam no.
6Mokay diŋ fen maga ɓil Manwur Pantway
Baa ge wùu joŋge ɓe mono :
Á yaʼ ge wer wããge wããre jar ɓuy yaŋ ciŋ,
Hã ge jam ma tum yaŋ ne paale waŋ mani Dafidn wo de waŋ ɓe no,
Coɓn ge yaŋ, kayn ge yaŋ diŋ de fen ma ti ngel ɓe no,
De cagge re ti faage ɓe no hãã patala wo ma tum.
Waŋkluu caa ge kiida Israyel wo
7Waŋkluu wãã wããre ti Jakobe,
Wããre sen leʼ ne Israyel ti.
8Jarn ɓuy daʼ wo wer yaŋ go ne re seno,
Sir Efrayim wo de jar maga wo de tiŋ ɓi leege Samari wo lay,
Jar se maga wãɗ wo de mbar jag jiili,
De far ti see ɓaara ciŋ lay ga :
9Brign laa mbaara go gesiŋ,
Ane wùr fer ge borge diŋ de húulì ma de ceɗge wo.
À car mbe koore Sikomorn wo mbaara go,
Ane wùr fer ge cor rage de koore seder wo mono.
10Ama Manwur kaŋ ge jar hee Retsin wo yaŋ ne hara ti,
Á grag ge jar hee ɓaaran wo yaŋ go de fẽẽre durgi wo
11Jar sen wo diŋ jar Siri ma nen wur bo toŋn wo,
Jar Filisti ma nen wur bo lawn wo lay day saara lor ge
Israyel go de saŋ brud-brudi.
Bà mbe de sen ɓuy bagge põõ ɓen taw go ne hara ti gà
Day doo ɓe joŋ mbe de maŋge ciŋ see ɓaara ɗa pa.
12Jarn bay wo le ferge see je ma mbar ragen wa,
Á bay wo kiɗ Manwur Pantwayn wa.
13Doo kay no so, Manwur caa ge ti Israyel wo go de waale ɓe,
Caa ge jag doo gomon wo yaŋ go de fǐiri biin nen wurpo boŋ.
14Je kluun wo de je ma pel kããran wo nà diŋ ti no,
Je ndar nen wããre Baa maga kol go car geteʼ diŋ waalen lay.
15Jar seege de jar sen wo la yee wo ra go day jar ma
men see ɓaara ne haran yee ge wo nen go lay.
16Diŋ wersen ga Waŋkluu bay de fruygi ti weere jõõre ɓaaran wo wa lay,
Bay ko decoo weere holge ɓaaran wo
De naare dewur ɓaaran wo wa lay mono.
Werga á wo ɓuy diŋ jar maga tob wo Baa go,
Jar hãyhãy wo day jag ɓaara wo ɓuy wãɗ wo
Diŋ wããre ma bay ngar wo.
Bà mbe de sen ɓuy bagge põõ ɓen taw go ne hara ti gà
Day doo ɓe joŋ mbe de maŋge ciŋ see ɓaara ɗa pa.
17Werga ɓlagge roɗ jar doo wùu
Maga roɗ ɗewseŋ wo de hõõre wo nono.
Á roɗ lir ma yooway wo go,
Saara taa sããge go, naa wo cug go.
18Wer bagge põõ ma kluu mani Manwur Pantway no,
Sirn go de yãã wùu,
Jarn wo doo fen maga à heen go wer wùu nono,
Jobo bay hul doo ne hẽn ɓe ti wa hase.
19À caa le ti ɓaŋ war bridi day koŋne mbe de cee jare,
à loŋ le ti ɓaŋ gùri day jobo bay wuugi wa.
Wosela ɓuy lor này doo ɓe.
20Manase re Efrayim go,
Efrayim re Manase go day saara ɓog ɓuy lwaʼ wo ne Juda ti,
Bà mbe de sen ɓuy bagge põõ ɓen taw go ne hara ti gà
Day doo ɓe joŋ mbe de maŋge ciŋ see ɓaara ɗa pa.
Currently Selected:
ESAY 9: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
