ESAY 10
10
Re ti jar hã faage ɓlaggen wo
1Re ti jar maga yer wo jag liŋgi ma bay blam wo mono,
ti jar maga hã wo faage joŋge fẽẽre maga bay wo ti ngel ɓe wa mono!
2Á joŋn wo maga saara mo maŋ jag jar coo wo go ti ɗege ɗúu ti kiida,
saara mo joŋ nen jar gayre ma yoo jarn wo ti nen mo ɓaaran no,
saara mo kol naare dewur wo go har ɓaara,
weere holge wo go fen frumgi ɓaara.
3Nday joŋ ge wur reen wo de bon maga le de seege hãã mo caw joŋge la?
Nday ɗee ge wo nà see wo se ma yãã waŋ mo la?
Day nday men ge togoɗge ɓayn ge go ne wose mo la?
4Gwaʼ mbe nà diŋ maga nday ham ti go gesiŋ de jar maga wo ti paglam mo koɗ so,
diŋ ga nday leɗ mbay go gesiŋ de húulí yoo jar maga à id ra go mo so no.
Bà mbe de sen ɓuy bagge põõ ɓen taw go ne hara ti gà day doo ɓe joŋ mbe de maŋge ciŋ see ɓaara ɗa pa.
Re ti sir Asiri, á raw wùu liŋ jar no
5Re ti sir Asiri,
graw bagge põõ ɓi no!
Genày ma doo ɓen diŋ fen maga ndi bag jag sõõge ɓil ɓin go de ɓe mono.
6Ndi ɓoʼn wo ne wer jar maga bay wo hoo sug ti ɓi wa wo ti.
Ndi geɗer jar maga car wo jiili ɓi go wo de ɓe nen
maga á mo frum ra go day mo hoo ra go ɓe,
nen maga á mo dag ra go ti doo ga à dag pããge ma ti faage nono.
7Ama se kon doosen no gà
á kon le de ɓil ɓe nà doo kay no gà.
Werga fen maga le ɓil ɓe nà diŋ tawge wer jar wo go debaŋ.
8Day se ga :
Jar kluuri ɓin bay wo doo waŋre wo no maʼ tuu wa yawla?
9Re maga hay daʼ ɓi leege Kalno diŋ te ma Karkemis no,
ma Hamadn diŋ te ma Arpad no,
ma Samarin diŋ te ma Damas no.
10Doo maga doo ɓi yãã sir waŋre maga baa ɓaaran bay wo
diŋ Baa wa ga fodo ɓaara hay de daŋ ma Jerusalem wo de Samarin yaw nono,
11ndi joŋ ge Jerusalem wo de baa ɓe ma de ceɗgen wo
de te fen maga ndi hay joŋ Samari wo de baa ɓe ma bay blamn wo de ɓe mo lay.
12Ane, de maga Waŋkluu bag ge jag joŋre ɓen we go ti húulì Siyoŋ wo de Jerusalem no,
ndi joŋ ge bon waŋ Asiri yaŋ ti leʼge maʼge jag jiili ɓe ma ɓil ɓe no,
ti debaycõõre ma nen ɓe ga se far ti see ɓe ciŋ wer ɓe mono.
13Werga á kal wããge ga :
Doo ɓi joŋn mo hãʼ diŋ de egre ɓi, diŋ de ɗeŋ ɓi werga ndi diŋ je ma de ti.
Ndi hay ɓlag haagu sir wer jar wo go,
ndi hay yãɗ horog ɓaara wo go, men ra go ploʼ ploʼo.
Doo je egre nono,
ndi hay srog jar maga hay wo de lagge wãã wããre jar wo go gesiŋ.
14Doo ɓi daʼ horog mani wer jarn wo taʼ doo jobo maŋ tiŋ dwee nono,
doo maga jobo hoo pããre maga à tobn go nono.
Ndi hoo fẽẽre ma ti tamsirn go ɓuy, jobo fũy graŋ meʼ gà lay,
caa jag gesiŋ gà lay, tĩĩ roo po gà ɓuy lay.
15Klaɓ kee mbe see ɓe yaŋ de daŋ je maga de ɗawge ɓe caa mopo mo yawla?
Weklaɓ far mbe ti see ɓe yaŋ ciŋ de daŋ je maga de ceɗge de ɓe mo yawla?
Sen nà doo ga graw kol fĩɗ je maga maŋn ciŋ nono,
doo ga genày maŋ je maga bay diŋ koo wa ciŋ nono.
16Diŋ wersen Waŋkluu, Manwur Pantwayn kaŋ ge fen ngog jar yaŋ
ti holaŋ jar Asiri ma de goɓren wo.
Á ngal ge wùu yaŋ ne twore ɓen wer doo wùu ma de ngalge hiɓ nono.
17Poɗag ma Israyeln kol ge yaŋ diŋ wùu.
Je ɓe ma bay ɗag kol ge yaŋ diŋ trum wùu maga roɗ hõõre wo de ɗewseŋ go,
taa sããge ɓaara go nen wurpo boŋ,
18diŋ wùu maga caa ge wer woore yooway ma Asirin wo go
de koore ɓe ma de peɗgen wo ɓuy. Sen joŋ ge nà doo je cegè maga leʼ go de sealge nono.
19Koore ma yooway ma Asiri gwaʼ ge wo no mbag no,
go nen maga weklee kee ra go.
Jar Israyel maga gwaʼ ge wo mono
20Day ge ti wur sen mono, jar Israyel maga gwaʼ ge wo de
jar ma liŋ ni Jakob maga daŋ wo go men ge wo deŋ see ɓaara
yaŋ go see je maga hay mbar rage mono, day saara deŋ ge
see ɓaara yaŋ de hãge ɓil see Manwuri, je ma bay ɗag ma
Israyeln de kaŋ ɗiggi ti ɓe.
21Jar po wo mbag fer ge wo yaŋ le see Baa ma de egre no,
diŋ jar ni Jakob maga gwaʼ ge wo mono.
22O Israyele, de maga jar sir ɓon joŋ ge wo we go ngaɓa
doo duguɗgi ma jag maarog nono, jar po wo mbag koɗ fer
ge wo yaŋ le. Baa go de ɗig tawge jar no, ma naa nen
keɗedn go.
23Werga tawge jar se maga Baa ɗign go mono, Waŋkluu
Manwur Pantwayn go de baa jag ɓe ti sirn ɓuy yaw.
Joŋ we hẽẽne doo jar Asiri wo wa
24Diŋ wersen Waŋkluu, Manwur Pantwayn wãã so ga :
Nday jar ɓi maga de lagge Siyoŋn mono,
joŋ we hẽẽne doo je Asirin wa!
Á de mbar nday de graw, maŋ genày ɓen ciŋ see ɓay doo
maga jar Ejipte hay wo joŋ nday nono.
25Ane naw gwaʼ mbe meʼ koɗe sõõge ɓil ɓin taw ge yaŋ go,
ɓil ɓi fug gi yaŋ go.
26Manwur Pantwayn caa ge mbreŋ yaŋ ti ɓe doo ma ti
wur maga re caa jar Madiyaŋ wo le ti húulì Oreb nono.
Manwur go de coŋ graw ɓen ciŋ ti maaroge,
á de maŋge ɓe ciŋ doo ma Ejipten nono.
27Ti wur sen mono,
à srog ge fen põõre ɓen yaŋ go mo jag bay,
jug ɓe ma soole ɓon lay.
Jugn men ge ngel yaŋ go ne twore no.
Je heen kos Jerusalem we go
28Á go de age Ayade,
le go de hres Migron,
men fẽẽre ɓen wo Mikmase.
29Á cegaɗ wo holaŋ húulìn wo we le go day wãã wo ga :
Naa wo kaŋge Geba!
Rama go de daɗge yaw,
Gibeya mani Sawuln daŋ wo we de ɗeere yaw.
30Cag mbo go de roo so,
may ma Galim no! Ko see ɓo Layisi!
Faɗge go ti ɓo Anatode!
31Madmena go de dusgi yaw,
jar Gebim wo de kiɗ ngel yoŋre.
32Wara tuu se wo ge Nobe,
day maŋ ge doo ɓe yaŋ ciŋ see húulì mani may ma Siyoŋ no,
see húulì ma Jerusalem no.
33Ko we, Waŋkluu, Manwur Pantwayn le de brag sug koore wo de egre :
Maga sen daŋ wo kããra ciŋ gẽẽre car wo go,
maga sen wo de gẽẽre debaŋ leɗ wo go gesiŋ.
34Á poʼ lir ma yoowayn go de klaɓe,
koore ma ti húulì Libaŋ laa wo go gesiŋ ɓaale je ma de egre no.
Currently Selected:
ESAY 10: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
