ESAY 56
56
BAA RUU JAR ƁEN WO, KAY RA DE WÃÃRE PA
Baa men jobo go faale gà
1Manwur wãã ga : Hoo we sug ti mo ma de deele no,
joŋ we mo ma keɗed no.
Werga pẽẽge ɓin go mbaŋ ma
age, keɗed ɓin go maŋ ma age lay.
2Woore ti je maga joŋ doosen no mono,
ti je táabay maga oo ti sen ngiŋ,
hoo sug ti wur Saba no day ɓoʼ foo ɓe go gà
ɗaw see ɓe see joŋre ma de ɓlaggen mono!
3Daga waare maga de saʼ see ɓe see Manwurn mo riŋ ga :
Manwur caa ge nen ɓi go sar de jar ɓen wo wa!
Je ma de ndar ɓayn mo wãã ga :
Ndi diŋ koo ma de heeg koɗ nà wa!
4Werga, Manwur wãã ga :
Jar ma de ndar ɓay maga hoo ge wo
sug we ti wur Saba ɓin wo,
maŋ wo we diŋ fen ma de cõõre jag ɓi no
day lag wo we ngiŋ ti tayge jag ɓin no,
5ndi boo ge ngel ra ɗúu ɓaara yaŋ wo
ne hara ɓil tiŋ ɓin wo de kor ɓin wo.
Ndi leʼ riŋ ɓaara yaŋ go de daŋ weeren
wo de mayre biŋnin wo.
Ndi kaŋ ge ɗúu ma tum maga taw go
gà yaŋ ne hara.
6Waare maga saʼ ge wo see ɓaara we see
Manwur ma joŋ peele ne hẽne,
ma da ɗúu Manwuri, ma joŋ ge diŋ weere
jõõre ɓe jar maga hoo ge wo sug we
ti wur Saba ɓi no day ɓoʼ wo foo ɓe go gà
day lag ge wo we ngiŋ ti tayge jag ɓin no,
7ndi hoo ge ra yaŋ le go ti húulì ɓi ma bay ɗag no,
ndi hãge fruygi yaŋ ne hara ɓil tiŋ tosge ɓi no.
Ndi yãã ge doo ɓaara yaŋ de siɗgi jag ɓaara
maga à roɗ mo ɓen go ɓuyn wo de siɗgi jag
ɓaaran wo yaŋ werga à ɗe ge tiŋ mani ɓin
yaŋ ga tiŋ tosge ma wer jar wo ɓuy.
8Wããre ma jag Waŋkluu,
Manwur maga tay jar Israyel ma de welgen wo le ga :
Ndi tay ge jar tigriŋ wo yaŋ le
see jar ɓi maga wo go de tayge mo pa.
Baa ruu jar ma peln wo
9A we le rege, nday ɓuy, nday nàyre ma yoofíin wo,
nday ɓuy, nday nàyre ma yoowayn wo no!
10Jar gor ngel go ne hẽn tin wo go rẽwre,
á bay wo de ko mopo wa.
Á wo ɓuy diŋ wayre ma jag baʼbaʼ wo,
kãã wo ma biggi ti mopo gà.
Á lwaʼ wo lwaʼge sag sag tuu, wo
mbaara de suuli tiɗ tiɗi,
da wo leɗge diŋ naa.
11Á wo diŋ wayre ma de koŋne ɓil ga wuɗ wo gà
wo diŋ jar koɗge maga bay wo de ko laa wer fẽẽre wo wa.
Á wo ɓuy see wo de ti ngel see ɓaara,
wosela ɓuy de kaŋ ti nà diŋ ti daʼge ma ɓe de see ɓe boŋ tuu.
12Á wãɗ wo ga :
Á we le ndi kiɗ yii ne nday, naa taɗ
go de fẽẽre joge ma de hããn wo!
Naa joŋ ge toŋ doosen no
pa werga á gwaʼ wo ni debaŋ debaŋ ɗa mono.
Currently Selected:
ESAY 56: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
