ESAY 53
53
1Wose hay hã ɓil ti fen maga à hay siin ne naa mo la?
Wose hay ko we ga Manwur hay naa nen egre ɓen we go ne naa la?
2Á gẽẽ pel Manwur doo ko maga jaw mbe wo hãy koɗ nono,
doo cẽw mo po maga laa ti laale nono.
Á hay de maŋ mopo noga de woore nen maga naa kaŋ nen ti ɓe lay gà.
Fen po see ɓe ga naa slag nen ti ɓe lay bay wa.
3Jar táabay hay mbuɗ wo foo ɓe day toɓn wo go.
Á diŋ je maga jo bone,
á hay tum nen re doo je maga à bay koge ɓe nen wa nono.
À hay bay hoo sug ti ɓe wa,
naa hay kaŋ ɗiggi ti ɓe gà.
4Paga á hay hoo ti ɓe nà diŋ cege naan
wo yaw hay hã pũũri ne hẽn nà diŋ bon naan wo yaw.
Bà de sen ɓuy naa kon doo je maga Baa kaŋ cerge go ne hẽn see,
kaŋ bon ne hẽn ti day mbuɗ foo ɓe go nono.
5Ama à hay car wããge ne hẽn see nà wer debaycõõre naan wo,
à hay dagn go ti nà diŋ wer ɓlagge naan wo.
Bon maga hã jam ne naa leʼ go ne hẽn ti
day naa pẽẽ go nà diŋ wer wããge ɓen wo.
6Naa hay go de welge doo sããre wo nono,
wosela ɓuy hay de maŋ faage ɓe de see ɓe.
Manwur raw kaŋ ɓlagge naa ɓuy ne hẽn ti.
7À hay las ne. Á hay fer ti see ɓe go gesiŋ
day bul jag go gà has doo wesam maga à de
woge de ɓe ti ngel ngaɗ này nono,
doo sam ma baʼbaʼ pel jar caw fũy ɓen wo no.
Á hay bul jag go gà.
8Á caa jag tenen ɓen ne hẽn ciŋ de joŋge bon ɓe wo de caage kiida ɓe.
Ti kal mani ɓen mono,
wose hay ɗig bà we ti maga
à hay yee nen ɓe go ti sir mani jar ma tenen wo
wer debaycõõre jar mani ɓin wo noga hay lawn we ti re
maga hay caan wo mo la?
9À hay teen yoo jar ɓlagge wo,
à hay tay tuu húulí ɓen de je horoge,
koh bà de maga á hay joŋ fen ma de ɓlagge po taʼ gà lay
day à daʼ fen ma bay blam po mbe jag ɓe gà ɓuy mono.
10Á hay coo jag Manwur nen maga se mo kaŋ bon ne hẽn ti twore kaŋ.
Day blam maga se hã see ɓe we
go ma sii jag ma maŋ re ɓlagge go ne jar ti no,
wejõõ Manwur daʼge weere yaŋ,
naw ɓen yaʼ ge yaŋ wo pel ni
day se joŋ ge dage Manwurn yaŋ go ti ngel ɓe ɓuy.
11Blam bon ma ti maysee ɓen mono,
ɓil ɓe joŋ ge yaŋ go feh ti leʼ ge joŋre ɓe no.
Wejõõ ɓi ma keɗedn kol ge jar maga kon ge wo yaŋ go keɗede,
day se maŋ ge põõre ɓlagge ɓaaran yaŋ ti ɓe.
12Diŋ wersen ndi hã ge jar yaŋ ne hẽn doo debaŋ.
Á ɓes ge fẽẽre yaŋ de jar egre
wo wer maga á hã see ɓe go de see ɓe tuu ma huugi
day à hay keen go yoo jar maga re de baa rage mono,
wer maga á hay hoo ɓlagge ma jar debaŋ ti ɓe
day tos ti jar maga re de baw rage mono.
Currently Selected:
ESAY 53: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
