ESAY 41
41
Israyel nen kaŋ ɗiggi ti Baa
1Nday kaalin wo, lag we seɗem ma coʼ sug ɓi!
Daga wer jar mo fer wo coɓ see ɓaara,
mo yaʼ wo le day mo wãã wo
so! Wùr mo ngaf de kããra jag kiida ɗa!
2Wose baa je ma nen wur botoŋn le maga á mo
a go bag jag mo ma keɗedn mo la?
Wose hay hã wer jar wo go ne hẽn
ɓi coo doo noga kol waŋre wo go ne hẽn gebeere la?
Moslam ɓen tay nen ɓaara go de siri.
Toŋwaa ɓen njegad ra go doo
fíi maga pud go nono.
3Á maŋ blam ɓaara de niigi, kal mbe hãy,
doo jobo baan gà. Ɓaale ɓe bay baa sir wa ɓuy.
4Wose hay joŋ ga fẽẽre sen mo joŋ wo mo la?
Diŋ je maga biŋ wer jar wo le hãã le ti tĩĩgi wer mono.
Ndi Manwur ndi diŋ je ma taŋgu no, day ndi joŋ ge yaŋ wo ti wur
mani jar ma peln wo wo pa.
5Jar ma ti kaali kon wo mokay hẽẽne caa ra go.
Jag sir tawge ɓuy daɗ wo. Saara yaɗ le day raw wo le.
6Á kay wo kããra day wosela ɓuy wii hẽn ɓe ga :
Coɓ nen ɓo!
7Je joŋren teŋ nen je yor fẽẽre no,
je ceɗ fẽẽren teŋ nen je torge no.
Á wãã ti mo ma de neɗgen gana :
Sen diŋ joŋre ma de ele!
Se raw ɓal sõõ ma de ceɗge de ponde
wo nen maga á mo brag go wa.
Joŋ hẽẽne wa so
8Ama ma ɓo ndo Israyel wejõõ ɓin mono,
ndo Jakob maga ndi hay baa mo go ɓi mono,
ndo ma ti wer mani Abraham bar ɓin mono,
9ndo maga ndi hay baa mo le ti jag sir tawge,
ga ndi ɗe mo le hãã ti tawge siri,
day ndi riŋ moge ga ndo diŋ wejõõ ɓi,
ndi de baa ndo ɓi day ndi tob ge ndo go gà mono.
10Joŋ hẽẽne wa werga ndi yaŋ de ɓo.
Ti bii mo hay go nen ɓo taʼ taʼ doo hẽẽne
wa werga ndi diŋ Baa ɓo no.
Ndi hã egre ne ndo, ndi caa war ɓo day
ndi kay mo de doo ɓi ma blaw jar go no.
11Ko ga sõõre wùu ti ɓaara yaŋ go day saara cog ti yaŋ
go gesiŋ, diŋ jar se maga hay sõõ wo ɓil mo ti mo ɓuy no.
Á dwas ge wo yaŋ go, taw ge wo go,
jar se maga gẽɗ wo jag ɓo mono.
12Ndo kiɗ gi ra yaŋ day ndo daʼ ge ra gà so hase,
jar se maga hay wo leɗ moge mono.
Á dwas ge wo go has tuu,
jar se maga hay wo dur moge mono.
13Werga ndi diŋ Manwuri,
Baa ɓo maga ɗaw doo ɓo go ciŋ
day wii mo ga : Joŋ hẽẽne wa,
ndi le de caa war ɓo mono.
Ndi caa war ɓo yaŋ
14Joŋ hẽẽne wa, ndo wel gogo mani Jakob no,
ndo Israyel ma bay egre no :
Ndi le de caa war ɓo. Mo nà diŋ wããre ma jag Manwuri,
je coo moge no, je ma bay ɗag ma Israyel no.
15Ko ga ndi kol mo yaŋ go doo fen ma ɓum coore ma defay
ma jag ndelem de ponde wo jag nono.
Ndo mbug gi húulì wo yaŋ go,
ndo sogoɗ ge nen ɓaara yaŋ go day ndo kol ge
húulì ma lublub wo yaŋ go doo fíi ma gefeŋ gefeŋ nono.
16Ndo faʼ ge ra yaŋ go day leege rawge yaŋ de ɓaara were,
degurleege dus gi ɓil ɓaara yaŋ go.
Ama ma ɓo ndo joŋ ge fruygi yaŋ wer Manwuri,
ndo togoɗ ge see ɓo yaŋ
wer je ma bay ɗag ma Israyel no.
Puulin kol ge yaŋ diŋ sir ma de ele
17Jar gayre wo de jar coo wo de kiɗ bii day se bay wa.
Kiŋ ɓaara hig go doo jwaale. Ndi Manwur,
ndi laa ge jag ɓaara yaŋ,
ndi Baa mani Israyeln ndi tob ge ra go gà.
18Ndi joŋ ge yaŋ ga bii mo yor le go nen duguɗgin wo,
ga gedel mo hay wo ɓil log wo. Ndi kol ge laalen yaŋ go
diŋ mangloŋ, ndi kol ge sir ma bay biin yaŋ go diŋ pyewre wo.
19Ndi peɗ ge koo sedere, koo gasiya,
koo mirte wo de koo Olifiye wo yaŋ ɓil puuli no,
ndi cor ge koo siprese,
koo orme wo de koo buwis wo yaŋ jag taʼ boŋ ɓuy ti laale no.
20Sen nà nen maga á mo ko wo de nen ɓaara,
mo daʼ wo wer ɓe, mo kaŋ wo nen ɓaara taʼ taʼ day mo
laa wo wer ɓe ɓuy ga doo Manwur hay joŋ fẽẽre sen wo,
ga je ma bay ɗag ma Israyeln hay joŋ ra.
Sõõre bay wo diŋ mopo wa
21Nday baa mani wer jarn wo,
wãã we wããre go ti see ɓay so!
Wããn diŋ Manwuri.
Joŋ we fen maga kaŋ nen yaŋ ga
nday yaŋ cwãy go ɗala,
wããn diŋ waŋ ma ti sir Jakob no.
22Daga á mo joŋ wo fen po day mo sii wo fen
maga joŋ ge yaŋ wo pel ɗa so la.
Fẽẽre maga hay joŋ wo le ti tĩĩgi wer mono,
wãã we ne wùr ti maga á hay wo
diŋ maysela ɗala ni wùr coʼ sug ɓe de el
ma daʼ wer go ne fen maga joŋ ge le blam ɓe
noga wãã we ne wùr ti wur ma pel wo ɗala.
23Sii we fẽẽre maga joŋ ge wo yaŋ ti wur
ma blam taw ɗala ni wùr ko ge yaŋ so ga nday diŋ baa wo.
Joŋ we mbay mopo ma de el noga de ɓlagge nen
maga wùr buŋ nen wùr go day wùr ɓuy kon ɓuy ɗala.
24Koɗa, nday bay diŋ mopo wa hase,
day joŋre ɓayn go has de daŋ hasn pa.
Je maga yãã we ga nday mo hay diŋ
baa se mbuɗ sõõre see ɓe.
25Ndi hay baa bloon le nen ɓaŋ gloŋhwede,
á a le nen wur botoŋ day se ɗe diŋ ɗúu ɓi.
Á dag jar seege de kããran wo go ti doo pãy nono,
doo pãy maga je booge waŋn nono.
26Wose hay wããn le go taŋgu ti tĩĩgi wer nen
maga wùr mo daʼ wer go ne hẽne,
noga le go taŋgu ɓaa nen maga wùr wãã
ga á ti ngel ɓe so la? Jobo bay de wããge ɓe wa,
jobo bay de wãã mopo ga à mo laan so wa, jobo boŋ
bay de laa wããre ɓayn wo wa hase.
27Ama ma ɓi ndi diŋ je maga ndi hay wãã taŋgu ne jar
Siyoŋ wo ga á wo mo joŋ no, á wo mo joŋ no mono.
Ndi de hã je ɓoʼ soole fruygi ne Jerusalem.
28Ndi ko nene, jobo bay boŋ wa,
bay boŋ yoo baa sen wo ga wãã ɗiggi ɓe go lay
noga yiŋ jag ti mopo maga ndi wii jag ɓe ti ɓe lay nà wa.
29Koɗa á wo ɓuy bay wo diŋ mopo wa hase, joŋre ɓaaran
bay wo diŋ mopo meʼ draʼ wa lay.
Sõõre ɓaaran wo diŋ mo ma nen leege,
wo diŋ ngel de koɗe.
Currently Selected:
ESAY 41: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
