ESAY 26
26
Siŋ blum no
1Ti wur sen mono à ʼwaa ge siŋ ma kay la yaŋ ɓil sir
Juda ga : Ɓi leege wùr ma de egre yaŋ.
Á hã pẽẽge ne wùr diŋ kor ma ti wùri, diŋ glig ma ti wùri.
2Buŋ we jag tiŋn wo go, daga wer jar ma keɗed maga hay
lag wo ti fen ma de deelen mo laa wo ni.
3Ndo hã jam ne je maga bay ndar gog ti ɗiggi ɓe wa mono,
wer maga a de kaŋ ɗiggi ɓe ti ɓo.
4Kaŋ we ɗiggi ɓay ti Manwuri sagsage werga Manwuri,
Manwur diŋ húulì ma nen kiŋgin wo ɓuy no.
5Á hay srog jar maga hay wo de laa tiŋ ciŋ ti ngel ma
de gẽẽre wo le go gesiŋ, fer ɓi leege maga hay go ciŋ ti
kããra go gesiŋ, hayn go de wer nen siri.
6Ɓi leege sen hay dag jar gayre wo ti,
hay dag jar hugli wo go de ɓaale ti.
Tosge jar ma keɗedn wo
7Faage mani je ma keɗedn diŋ de deele no.
Ndo maga ndo de deele, ndo ʼwũy faage go ne je ma keɗed no.
8Doo sen no so no wùr gor nà doo ɓo, O Manwuri!
De maga ndo kaŋ põõre we ne jar ti no, wosela
ɓuy ɗe ɗúu ɓo, fer ɗig ti ti ɓo lay.
9Nen ngel ma de suŋ mono, maysee ɓi de sãy ɓo ti,
nenterse ɓi le ɓil ɓi de kiɗ ndo lay. Werga, de maga
ndo kaŋ põõre we ne jar ma ti tamsir wo ti no, jar ma
ciŋ ti sir la had wo joŋ fẽẽre ti ngel ɓe.
10Hayga à ko decoo je ɓlagge we no, á had fen ma ti
ngel ɓen gà hã see ɓe go ne joŋge ɓlagge ɓil sir jar
ma de deele wo, day hoo sug ti kluu mani Manwurn gà.
11Manwuri, doo ɓo wo go ciŋ hãã, bay maga nen ɓaara baan
wa. Á ko ge wo yaŋ ga ndo de hun wer jar ɓon wo, day
sõõre joŋ ge ra yaŋ ti seno. Doo kay no so wùu roɗ ge
jar hee ɓon wo yaŋ go.
12Manwuri, ndo de hã jam ne wùri werga fẽẽre maga wùr
joŋ ra mo ɓuy no, bag jag ɓaara go ne wùr diŋ ndo.
13Manwuri, waŋre ma tigriŋ maga bay wo diŋ ndo wa hay
kol wo go wãã wããre wùri, ama joŋ ga wùr mo ɗe ɗúu ɓo
ɗa pa nà diŋ ndo boŋ tuu.
14Jar húulí fer wo le go ciŋ gà so, jar ɓi tuu fer wo le
go laage gà so lay. Doo kay nono, ndo raw urgi le,
ndo kal taw rage go, day ndo raw yee nen je ma
pel kããra ma honla ɓuy go.
15Ndo raw tes wer jar ɓon wo, O Manwuri!
Ndo tes wer jar ɓon wo, day ndo raw daʼ togoɗge.
Ndo yaʼ haagu ma ti sirn wo pel ni go ti ɓe kara ɓuy.
16Manwuri, á hay kiɗ wo ndo de maga re hay de caa rage
mono. Saara hay lag pel ɓo ɗeged lag tosge de maga ndo
hay kaŋ bon ne hara ti mono.
17Doo wãy de ɓiili maga leʼ biŋgi joŋ bone day ra doo
cege ɓiili ɓen nono,
wùr hay raw wo go see ɓo hãã Manwuri!
18Wùr hay far ɓiili, wùr joŋ bone day de maga wùr
wo biŋgi so mono, wùr biŋ diŋ leege.
Wer ɓe ga wùr joŋ diŋ joŋre maga hã pẽẽge ne tamsir gà
wùr biŋ jar ma tigriŋ wo ti tamsir ni gà so lay.
Birgi jar húulí wo
19Daga jar ɓo ma de húulí mo fer wo tenene!
Daga jar ɓi maga huɗ wo go mo laa wo le go ciŋ!
Pud we go ciŋ day joŋ we fruygi, nday jar ma nen sir no!
Werga, meebe mani ɓon diŋ meebe poɗage,
sir fer ge yaŋ le go laa jar ma de húulín wo.
20Wo we laage ɓil tiŋ naw ɓayn wo, nday jar mani ɓi no,
tẽg we jag tiŋn wo ti ɓay. Yoŋ we wo go ni semagga nen
maga bagge põõn mo taw go ɗa.
21Werga Manwur le go de kalge.
Á men ngel tiŋ ɓen le go ma joŋ bon jar ma ti
sir wo day tamsir naa ge nen húulí maga se id rage go,
yoŋ ge jag ti jar maga à hay id ra go gà lay.
Currently Selected:
ESAY 26: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
