ESAY 19
19
Re maga caa Ejipte mono
1Re ti sir Ejipte.
Ko we, Manwur go de ɗiigi ti swaare ma
ɗeege depardayn wo.
Á le de age Ejipte.
Baa ma Ejipte maga bay wo diŋ Baa wa daɗ wo doo
ɓe day jiili jar Ejipte wo go de caa bii.
2Ndi grag ge je Ejipte yaŋ go de fẽẽre durgi
see kan ɓe je Ejipte no,
day saara dur gi kããra yaŋ.
Wosela ɓuy dur hẽn ɓe, wosela ɓuy dur
bar ɓe, ɓi leege dur gi ɓi leege,
sir waŋ dur gi de sir waŋ.
3Twar mani Ejipten taw ge mbe go de see ɓe tuu,
ndi ɓlag ge ɗiggi ɓaara ma de eln yaŋ go.
Á wiɗ gi wo jag baa maga bay wo diŋ
Baa wa wo yaŋ de jar sogway wo,
wiɗ wo jag jar wãɗ wããre de jar húulí wo yaŋ de jar halge wo.
4Ndi hã ge Ejipte yaŋ go ne waŋre ma de hãã wo doo,
waŋ ma de hun joŋ ge waŋ yaŋ ti ɓaara.
Kay diŋ jag Waŋkluu Manwur Pantway no.
5Bii ma ɓil maarogn õg ge wo yaŋ go,
maarog ma de pããgen hig gi yaŋ go kaŋkraŋ.
6Bii maarog ma de pããgen buugi wo yaŋ go,
jag doo Niln õg wo yaŋ go day hig wo yaŋ go fǐiri biin wo
de gusurn lwaɗ wo yaŋ go.
7Fíi ma ti jeŋ Niln ɓuy hãã wo go ti ngel maga á kal
wo nen maarog ma kluu ni mono,
fen po ɓuy maga à joʼ ge ti jeŋ Niln ni mo ɓuy hig gi go,
dwas ge go, day yee ge nen go.
8Jar bag cẽẽ ndum gi wo yaŋ day jar maga ɓod wo tiɗeb
nen Niln mo ɓuy joŋ ge wo yaŋ go nen lawge.
Jar maga lag wo bay nen bii caa ge wo jiili yaŋ go lay.
9Jar maga joŋ wo joŋre saale lẽẽ wo de jar maga ɓod wo
õõbe ma de piiri joŋ ge wo go nen sõõre.
10Fẽẽre maga hay wo kay sirn leɗ wo yaŋ go
gesiŋ, jar maga joŋ wo joŋre ti solay mo ɓuy car wo jiili yaŋ go.
11Weere biŋni ma Sowann wo diŋ jar po ma bay ti wo,
jar ɗeŋ ma bag yaŋ ne Farawoŋ ɓoʼ wo diŋ
faare wããre loɗge.
Joŋge joŋge so ga nday yoo wii Farawoŋn ga :
Wùr diŋ weere jar ma deŋ wo,
weere waŋre ma ɓaaɓaa wo le so la?
12Jar ɓo ma de ko reen wo gen so la?
Á mo naa wo nen re wo go ne ndo day
à mo ko fen maga Manwur Pantway hay bag
jag ɓe le go ɓil ɓe ti Ejipte go so.
13Weere biŋni ma Sowan wo go de loɗge,
weere biŋni ma Nofn jãɗ wo see ɓaara,
waŋre ma ti ɓĩĩni ma Ejipten yee wo Ejipte go.
14Manwur kaŋ cege kiɗ ti go ti holaŋ ɓaara ma
maʼ nen ti jar Ejipte wo go ti joŋre ɓaaran wo
ɓuy doo je ma de taage yee go nen duggi ɓe nono.
15De sen Ejipte kãã ge ma joŋ fen maga ti wo de waale,
jag doo gomo wo de fǐiri bii joŋn wo draʼ gà.
Jar Ejipte daɗ ge wo yaŋ pel Waŋkluu
16Ti wur sen ni mono,
sir Ejipte kol ge yaŋ go doo naare wo nono.
Á daɗ ge yaŋ day hẽẽne caan ge yaŋ go
de maga se ko ge doo
Manwur Pantway de maŋge ciŋ kay fĩɗgi de see ɓe mono.
17Sir Juda joŋ ge yaŋ diŋ fen joŋ hẽẽne ne Ejipte.
Wosela ɓuy maga ɗen ge we de jag ɓe mono,
caa ge hẽẽne yaŋ go wer re maga Manwur
Pantway bag jag ɓe le go ɓil ɓe ti Ejipte mono.
18Ti wur sen mono,
ɓi leege joŋ ge yaŋ wo dwee ɓi sir
Ejipte ga wãã ge wo diŋ jag Kanaan,
day haʼ ge wo yaŋ de Manwur Pantway no.
À ɗe ge maapo boŋ yoo ɓaara yaŋ ga Yir-Haheres.
19Ti wur sen mono,
ngel siɗ jag ne Manwur joŋ ge yaŋ wo ɓil sir Ejipte day
à boo ge mo ma ra ɗúu Manwur yaŋ wo ti haagun wo.
20Sen joŋ ge diŋ fen kaŋ nene,
diŋ sedewa ma Manwur wo ɓil sir Ejipte de maga
á rage wo ne Manwur ti doo jar joŋ bon ɓaaran wo,
de maga se ɓoʼ ge je yãã rage le ne ra day se oo ge
wer ɓaara ma yãã rage go mono.
21Manwur naa ge nen see ɓe yaŋ go ne jar Ejipte wo,
day jar Ejipte ko ge wo Manwur yaŋ go ti wur seno.
Saara joŋ ge peele yaŋ ne hẽn de siɗgi jag wo de hãge,
hã ge wo jag yaŋ ne Manwuri,
day saara bag ge jag ɓaara ge go.
22Mo so no Manwur mbar ge jar Ejipte wo yaŋ,
á mbar ge ra yaŋ ama se pẽẽ ge ra go.
Jar Ejipte hã ge wo ɓil yaŋ ne Manwuri
day se yãã ge jag ɓaara yaŋ,
pẽẽ ge ra go.
23Ti wur sen mono,
faage ur gi yaŋ le Ejipte wo go Asiri.
Jar Asiri wo ge wo Ejipte,
jar Ejipte wo ge wo Asiri lay
day jar Ejipte wo de jar Asiri joŋ ge wo peele yaŋ ne Manwuri.
24Ti wur sen mono,
Israyel joŋ ge yaŋ diŋ sir ma de swaʼ yoo Ejipte wo
de Asiri maga tamsir ɓuy woo ge wo wer ɓaara,
25diŋ sir maga Manwur kaŋ ge bosaʼ ne hara ti
diŋ de wãã ge ga :
Bosaʼ ti Ejipte, sir jar ɓin wo, ti Asiri joŋre maga ndi joŋ de doo ɓi,
ti Israyel, tway mani ɓin mono.
Currently Selected:
ESAY 19: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
