ESAY 17
17
Re ma ti Damas wo de sir Israyele
1Re ti Damas.
Ko we ga Damas joŋ ge go diŋ ɓi leege draʼ gà so hase.
Nen bagge húulì ma de cor ɗugul ti tabul ɓen wo no gagag no.
2À tob ɓi leege ma ti prog Arowern wo we go,
à men ra we go ne horogre wo.
Á koln wo go diŋ ngel naw ɓaara day je duɗ rage bay wa.
3Kor ma de egre kiŋkiŋ ma Efrayim sen leʼ jag go so,
sir waŋ ma Damasn wo de te sir Siri ma lan wo lay.
Re maga caa ge ra diŋ te re maga dwas ge
togoɗge ma Israyeln go mo lay.
Kay diŋ jag Manwur Pantway no.
4Ti wur sen mono,
togoɗge mani Jakobn joŋ ge diŋ mopo gà so lay,
noo ma see ɓen õg ge go lay.
5Á joŋ ge nà doo ma ti wur weege ga jobo tay ti
coore wo go ti gesaŋ,
day je weegen we ti ɓen wo go nono.
Á joŋ ge doo maga jobo wo fleg blam coore
ɓil log mani jar Refayimn wo nono.
6Leʼge po gwaʼ ge wo see kããra ne mbag lag tuu
doo maga à jwaʼ koo Olifiye go nono,
ɓog noga swaʼ le de hagge tipẽẽge ɓe,
naa noga dwee go de hagge ti jag doo ɓe ma leʼgen wo lay.
Kay diŋ jag Manwuri, Baa ma Israyel no.
7Ti wur sen mono,
nen je tabayn kaŋ ge yaŋ ti je joŋ ge ɓe no,
day nen ɓe ko ge je ma bay ɗag ma Israyeln yaŋ.
8Nen ɓe kaŋ ge ti ngel siɗ jag maga se joŋ ra
de doo ɓe mo gà so hase.
Nen ɓe ko ge fen maga weere doo ɓe hay ʼwũyn wo ra,
ga diŋ koore ma de corge ne sõõ Aseran wo
de sõõ wurn wo mo gà so has lay.
9Ti wur sen mono,
à tob ge ɓi leege ɓe ma de egren wo yaŋ go doo ga
à hay tob yooway wo go de tipẽẽge ti húulì wo
go doo hẽẽne weere Israyel wo nono,
day sen joŋ ge diŋ re ma kluu debaŋ.
10Werga ndo yõõ ti go ti Baa ma hã pẽẽge ne ndo no,
ndo fer ɗig ti ti húulì egre ɓon gà.
Diŋ wersen so ga ndo yaʼ far payre koore ma ti ɗiggi ɓo,
ndo raw corge gesiŋ diŋ koore ma waare wo mono.
11Ti wur maga ndo hay peɗ ra mono,
ndo maʼ laɓ go ti ɓaara.
Toŋ ɓe tuu mbeere mo ɓon kal fuɗgi.
Ama ti wur weegen so mono,
ndo daʼ mopo doo ɓo gà werga á diŋ cege
maga guur-koo ɓe bay wa.
Põõn kluu debaŋ
12Re yaŋ! Jar wo ngaɓa wo de ngar jag doo
samge maarog wo nono,
á bũɗ wo doo ga bii ma kluuri swaa wo nono.
13Á diŋ jar po maga bũɗ wo doo swaage bii ma kluuri wo nono.
Manwur le de samge ne hara ti,
saara daŋ wo go hãã,
ɗee wo go doo fíi ma ti húulì maga leege hoon wer nono,
doo degurleege maga naa ɓurgi ciŋ pel leege baa nono.
14De maga wur de coŋge mono,
see ɓaara daŋ ra go day de maga ngel bay
teege ɗa mokay saara bay wa so!
Mono diŋ re maga caa ge jar joŋ bon naa wo mono,
diŋ fen maga a ge ne jar frum naan wo ti mono.
Currently Selected:
ESAY 17: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
