ESAY 14
14
Sir Israyel fer yaŋ daʼ see ɓe
1Werga, Manwur ko ge decoo Jakob yaŋ,
doo ɓe fer yaŋ mbe leʼ ge ti Israyel pa,
day se fer ge yaŋ lag rage ti sir ɓaara no.
Jar dehãy tay ge wo yaŋ see ɓaara
day saara tay ge yaŋ go de tiŋ mani Jakob no.
2Jar dehãy horge ge wo ra yaŋ
day wo ge wo yaŋ de ɓaara ti sir ɓaara no.
Tiŋ mani Israyeln kol ge ra yaŋ go gebeere ɓe wo
de mayre gebeere ɓe ti sir mani Manwur no.
Á horge ge jar maga hay horge wo ra ti daŋgay yaŋ wo
day kaŋ ge wo põõre yaŋ ne jar joŋ bon ɓaaran wo ti.
Waŋ Babilon taw ge go
3Ti wur maga Manwur hã ge iggi we ne ndo
ti gayre ɓon wo de joŋge coo ɓon wo,
ti gebee ma kluu maga à hay kaŋ mo ti no,
4ndo ʼwaa ge siŋ se kayn la yaŋ ti waŋ Babilone.
Ndo wãã ge yaŋ ga :
May pa, je joŋ bon jarn yee nen we go!
Joŋge coo jarn taw we go!
5Manwur haw genày mani jar debaycõõren wo we go,
haw graw mani jar joŋ bon jarn wo we go.
6À ɓoʼ keŋ je maga hay mbar jar wo mbe ceɓ doo ɓil waŋ
day hay joŋ gebeere wer jar wo nen ɓil sõõge we go.
7Sirn ɓuy de daʼ iggi lay, go jam lay.
À ʼwaa siŋ jag ti fege.
8Koore sipres wo de koore seder ma Libaŋ wo draʼ
joŋ wo fruygi ti re maga caa ndo mono,
day wãã wo ga :
Hãã le ti wur maga ndo leʼ go gesiŋ mono,
je car kooren bay le age car wùr wa so.
9Jar ɓi tuu wo ɓuy fĩɗ wo kemãy kemãy ma yãã
waare ɓo de maga ndo wo wo mono.
Á pũy jar húulí wo go ne ndo de waŋre ma ti tamsirn wo ɓuy.
Á hoo waŋre ma ti wer jar wo ɓuy wo go ciŋ,
saara men paale waŋre ɓaaran wo go.
10Á wo ɓuy wãã wo wããre ma riŋ ndo ga :
Ndo, ndo kol go de hugli doo wùr no lay,
ndo kol go de maŋ wùr lay no!
11À srog wer jeʼerge ɓon wo go ɓi tuu húulí de
gẽẽge mandilna ɓon wo ɓuy.
Cogcõõre see wo wer ɓo sunug
sunugi, tunug kol wo diŋ fen laage ti ɓo no.
12May pa, ndo leʼ we le go ciŋ so, Gér ma sagge no!
Wel ma ti naage waa no!
Ndo maʼ gor we go gesiŋ so,
ndo je joŋ gebee wer jar wo no!
13Ɓil ɓo hay le riŋ moge ga :
Ndi ɗii gi yaŋ wo ciŋ,
ndi kaŋ ge ngel hayle ɓin yaŋ wo go ciŋ ti gér mani Baan wo.
Ndi hay ge wo ciŋ ti húulì maga Baa yiŋ wo wo go ni mono,
wo go nen gloŋhwede ma jag tawn wo go mono.
14Ndi ɗii gi yaŋ wo go ciŋ ti swaare wo
day ndi joŋ ge yaŋ go doo je ma ciŋ hããn nono.
15Ama à raw srog ndo wo go ɓil tuu húulí,
wo go ti tawge tuu ma wer gesiŋ ɓedew no.
16Jar maga nen ɓaara ko wo ndo, ngris wo,
kaŋ wo nen mo ti taʼ taʼa,
day wãã wo ga :
Ɓa mbe mo nà diŋ bloo se maga hay fĩɗ tamsiri,
hay ɓlag sir waŋre wo go,
17hay kol tamsir go diŋ puuli,
frum ɓi leege wo go hay bay men jar maga se horge ra
daŋgay wo go laage liŋ wa mbe mo yawla?
18Kidolgi waŋre ma ti wer jar wo ɓuy suɗ
mbaara go ti twore so,
wosela ɓuy liŋ ni ɓe.
19Ama ma ɓon,
à ɓoʼ ndo wo go hãã see tipaale mani ɓon doo
mbarga maga à cwaa ɓiili ɓe go nono,
doo húulí maga à id ra de moslam day à sor ti
ɓaara mbe wo hãyhãy ti jeʼãy ma ɓi tuu húulín nono,
doo húulí maga à dagn go ti nono.
20À tay tuu ɓon de ɓaara gà werga ndo ɓlag sir ɓon go,
ndo taw jar sir ɓon wo go.
À tĩĩ gi re jar debaycõõren wo ge jag gà so hase.
21Kiɗ we faage ma taw weeren wo go wer
ɓlagge pããre ɓaaran wo!
Daga á mo hoo wo go ciŋ ma yãã tamsiri
noga ma baa ɓil ɓe go de hun wa so!
22Wããre ma jag Manwur Pantwayn ga :
Ndi ur gi yaŋ go ciŋ ti re ɓaara.
Ndi caa ge wer ɗúu Babilon yaŋ wo go
de fẽẽre maga gwaʼ wo ɓil ɓe ni mono,
de weere ɓen wo, de wer mani ɓen wo.
Kay diŋ jag Manwuri.
23Ndi koln ge yaŋ go diŋ ngel gecemgecem wo,
kol ndo go diŋ fuli.
Ndi torn ge yaŋ go de getagle ma ɓlag jar no.
Kay diŋ jag Manwur Pantway no.
Sir Asiri hoɓ ge go
24Manwur Pantwayn hay hãʼ go haʼge ga :
Kidolgi á joŋ ge doo maga ndi hay ɗign nono,
fen maga ndi hay bag jag ɓe le go ɓil ɓi nduu gi kidolgi.
25Ndi ndreɗ ge je Asirin yaŋ go ɓil sir mani ɓi no,
ndi dagn ge yaŋ go ti ciŋ ti húulì mani ɓin wo.
À maŋ ge jug ɓe ma soolen ge go ne jar ɓin wo ti,
à srog ge fen põõre ɓe ma jag bay ɓaaran yaŋ go.
26Mono diŋ fen maga ndi bag jag ɓe le go
ɓil ɓi ma joŋ tamsir de ɓe mono.
Mono diŋ doo ɓi maga ndi maŋ ciŋ see wer jar wo ɓuy mono.
27Manwur Pantwayn go de bag jag re sen ɓil
ɓe day wose dign ge yaŋ la?
Doo ɓe go de maŋge ciŋ day wose fern yaŋ go gesiŋ la?
Re ti jar Filistẽẽ wo
28Nen kiŋgi maga waŋ Akas huu mono,
à raw wãã re se kayn la ga :
29Nday jar Filistẽẽn ɓuy,
joŋ we fruygi ti maga graw maga hay mbar
nday haw we go mo wa.
Werga cwen biŋ gi nà diŋ bondro day jorge maga
á jor mono diŋ manmbuyuri mopo ma de graŋ ti.
30Mo so no jag weere mani jar gayren daʼ ge wo rege
ɓaaran yaŋ, jar coo daʼ ge wo ngel lagge yaŋ go flãy.
Ama ndi taw ge wer mani ɓon wo yaŋ go de koŋne,
day fen ɓo po ɓuy maga sen gwaʼge mono, à ʼwarn ge go.
31Jag tiŋ no, law see ɓo!
Ndo ɓi leege no, cag go de roo!
Seal mbo go so, sir Filistẽẽn ɓuy!
Werga cug po yaŋ le de naage nen ɓaŋ gloŋhwede,
jobo yoo jar mani je heen ga cel go bay wa.
32À fer wããre ne jar soole ma ti wer jar sen wo nà gahãyla?
Ga Manwur hay ɓoʼ wer Siyoŋ day jar gayre ma yoo jar ɓen
daʼ ge wo ngel yãã waŋ nà ni.
Currently Selected:
ESAY 14: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
