Abharuumi 7

Abheekirisya bhatakubhoywa na ebhiraagiro bhya Muusa

1Abhayiri bhaani, enaayika na emwe abhaanu bhanu omumenya kisi ebhiraagiro bhya Muusa. Omumenya ati omuunu kaakenwa okuruubha ebhiraagiro omwanya gwone gunu kaabha achaari muwanga. 2Siga neeresye omusango ogwo kwa echijekekanyo. Echiraagiro echeeresya ati, omugasi atakwikirisibhwa okusiga omurume waaye omwanya gunu omurume waaye kaabha achaari muwanga. Nawe araabha omurume waaye afuuwe, niwo kaabha na obhwitaage, echiraagiro echo chitakumubhoya rindi. 3Kurwa ejo, akatwarwa na omurume owundi omwanya gunu omurume waaye achaari muwanga, kaabha omuromerwa. Nawe araabha omurume waaye ꞉aafuuwe, echiraagiro echo chitakumubhoya rindi, kaatura okutwarwa na omurume owundi, noorwo atakubha omuromerwa.

4Abhayiri bhaani, emisango ejo nikwo kutyo jiri kw‑imwe wone. Noorwo emwe mutakubhoywa rindi na ebhiraagiro bhya Muusa, kwa okubha mufuuwe aamwi na Kirisito ku‑musarabha. Woori emwe muri bhaanu bha Kirisito unu ꞉aasuuruuywe okusooka mu‑bhafuuwe, korereki obhurame bhweswe bhubhe na amatwasyo ga ekisi inguru ya Nyamuwanga. 5Omwanya gunu obhusimukwa bhweswe bhwa echibhiibhi bhwariga nibhuchitunga, ebhiraagiro ꞉bhyakorere okurigira kweswe okubhiibhi kubhe na amanaga muno kw‑iswe, nichirigira okukora ebhibhiibhi omwanya gwone. Okuruubhana na ogwo, orufu ruri‑wo. 6Chaariga chibhoyerwe na ebhiraagiro, nawe woori chifuuwe aamwi na Kirisito, kutyo, ebhiraagiro ebhyo bhitakuchibhoya rindi. Woori chitakukorera Nyamuwanga ku‑njira ya kara ya okuruubha ebhiraagiro bhinu ꞉bhyakaamirwe, tari ku‑njira inyaaya ya okutangasibhwa na Mwoyo Mweru.

Ebhibhiibhi ebhimenyekana kwa echiraagiro

7Woori chaayike ki? Chaayike ati, ebhiraagiro ni bhibhiibhi? Wuri, noorwo na akatyari! Nawe araabha ebhiraagiro bhitaakabheeye‑wo, nitaakamenyere ati ebhibhiibhi ni bhiinu ki. Araabha chitaakabheeye‑wo echiraagiro chinu echaayika ati, “Waasiga okurigira echiinu cha oweejaanyu,”#7:7 Ringira Okwimuka 20:17; Orwichuko rwa Ebhiraagiro 5:21. nitaakamenyere ati okurigira echiinu cha omuunu owundi, ni kukora echibhiibhi. 8Nawe ebhibhiibhi nibhiimusya okurigira okubhiibhi kwa mbaga nyafu mu‑mwoyo gwani ku‑njira ya echiraagiro echo. Araabha echiraagiro chikabha chitari‑wo, echibhiibhi echibha chitari na amanaga. 9Ku‑mwanya gunu naariga nichaari kumenya echiraagiro echo, naariga niikaaye rwa kutyo naariga nineenda. Nawe omwanya gunu ꞉naamenyere echiraagiro, ebhibhiibhi nibhibha na amanaga muno, nibhindeetera orufu. 10Nindora ati echiraagiro chinu chaariga chiri‑wo inguru ya okunnaana obhuwanga, ꞉chaandeetereeye orufu. 11Okutura ku‑chiraagiro echo, echibhiibhi nichibhona omwanya gwa ekisi gwa okunjiga, na okundeetera orufu. 12Noorwo kutyo, jibhe abhweru ati, ebhiraagiro ni bhyeru, na amaragiriro wone ni meeru, ni ga obhurengeresi, ka wone ni ga ekisi era.

13Nawe araabha nikwo kutyo, angu, echiinu cha ekisi echo nicho ꞉chaandeetereeye orufu? Wuri, noorwo na akatyari! Echibhiibhi nicho ꞉chaandeetereeye orufu ku‑njira ya echiraagiro chinu chiri cha ekisi. Bhwariga bhuri bhutinge bhwa Nyamuwanga ati echiraagiro chibhe nicheeresya abhwerubhweru ati, echibhiibhi ni chiinu echibhiibhi muno.

14Chimenyere ati echiraagiro ꞉chaareeterwe na Mwoyo wa Nyamuwanga, nawe anye ku‑bhusimukwa bhwani bhwa echibhiibhi, niri mugaya wa echibhiibhi. 15Anye nitakusombookerwa jinu enikora, kwa okubha jinu eneenda okukora, nitakujikora. Tari jinu nitakwenda kata, nijo enikora. 16Araabha enikora emisango jinu nitakwenda, ogwo ogweresya ati, eniikirisya ati ebhiraagiro ni bhya ekisi. 17Awo owubha nitari anye unu enikora ebhibhiibhi, tari ni chibhiibhi chinu chiri mu‑mwoyo gwani. 18Nimenyere ati, mu‑mwoyo gwani, ku‑bhusimukwa bhwani bhwa echibhiibhi, chitari‑mo echiinu choonechoone cha ekisi. Eneenda okukora gwa ekisi, nawe nitari na obhuturo bhwa okugukora. 19Omusango gwa ekisi gunu eneenda okukora, nitakugukora. Tari bhujabhi bhunu nitakwenda okukora, nibhwo enikora. 20Woori, araabha enikora jinu nitakwenda nikore, awo nitari anye unu enikora ebhibhiibhi, tari ni chibhiibhi chinu chiri mu‑myoyo gwani.

21Mbe, naasombookerwa ati, omwanya gunu eneenda okukora echiinu cha ekisi, enibha ninkururwa okukora echiinu echibhiibhi. 22Ebhiraagiro bhya Nyamuwanga, enibhyenda kwa omwoyo gwani. 23Nawe naasombookerwa ati ebhiwuga bhya omubhiri gwani, ebhibha nibhitungwa na amanaga ga ebhibhiibhi bhinu ebhiyaajana na obhwiganirisya bhwani bhwa ekisi. Echo nicho echinkora nibhe omugaya wa ebhibhiibhi bhinu bhiri mu‑bhiwuga bhyani. 24Jirimbona anye! Niga unu arinchungura okusooka mu‑bhusimukwa bhwani bhwa echibhiibhi chinu echindeetera orufu? 25Enisiima Nyamuwanga, kwa okubha omwene niwe anchunguuye, okutura ku‑Yeesu Kirisito, Raatabhugenyi weeswe.

Kurwa ejo, anye omwene, enikorera emirimu ebhiraagiro bhya Nyamuwanga mu‑bhwiganirisya bhwani, nawe ku‑bhusimukwa bhwani bhwa echibhiibhi, enikoreraga emirimu echibhiibhi.

Currently Selected:

Abharuumi 7: jit

Highlight

Copy

Compare