Abharuumi 6

Yeesu niwe ꞉aayigire amanaga ga ebhibhiibhi

1Woori chaayike ki? Angu, chigenderere okukora ebhibhiibhi, korereki Nyamuwanga agenderere okuchiyaana obhwitiriranya bhwaye bhwafu muno? 2Wuri, noorwo na akatyari! Eswe chaabha rwa abhafuuwe ku‑misango ja okukora ebhibhiibhi. Kurwa ejo, chitakutura okugenderera okwikara rindi mu‑bhibhiibhi. 3Mumenye ati, omwanya gunu ꞉chaabhatiijiibhwe, ꞉chaagwateene na Kirisito Yeesu mu‑kufwa kwaye. 4Omwanya gunu ꞉chaabhatiijiibhwe, chaariga wuti chifuuwe na okusiikwa aamwi nage, korereki rwa kutyo Kirisito ꞉aasuuruuywe okusooka mu‑bhafuuwe ku‑managa maafu ga Raata Nyamuwanga, nyabhuriko, noorwo eswe chiture okurama obhurame obhuyaaya. 5Rwa kutyo ꞉chaabheeye na obhumwi na Kirisito mu‑kufwa kwaye, kutyokutyo chirisuuruka rwa omwene. 6Echimenya ati bhumuunu bhweswe bhwa kara ꞉bhwafuuwe aamwi na Kirisito ku‑musarabha, korereki amanaga ga echibhiibhi mu‑myoyo jeeswe gaasiga okuchitunga rindi, na okuchikora chibhe abhagaya bha echibhiibhi. 7Omuunu akamara okufwa, aabha omuunu omwitaage chimwi okusooka mu‑managa ga echibhiibhi. 8Woori kwa okubha ꞉chaafuuwe aamwi na Kirisito, echiikirisya ati chiriikara aamwi nage. 9Echimenya ati Kirisito ꞉aasuurukire okusooka mu‑bhafuuwe, na atarifwa rindi. Orufu rutari na obhuturo rindi inguru yaaye. 10Omwanya gunu ꞉aafuuwe, ꞉aafuuwe rumwi era inguru ya okuyiga amanaga ga ebhibhiibhi. Woori ni muwanga, na eekaaye inguru ya Nyamuwanga. 11Emwe wone, mubhega nimwirora wuti ꞉mwafuuwe aamwi nage, na echibhiibhi chitakutura okubhatunga rindi. Kutyokutyo, mubhega nimwirora wuti woori muri bhaanga, na muramire inguru ya Nyamuwanga, kwa okubha na obhumwi na Kirisito Yeesu.

12Kurwa ejo, mwasiga okwikirisya echibhiibhi chitunge emibhiri jeemwe jinu ejifwa. Mwasiga okwikirisya okukururwa na okurigira okubhiibhi kwa emibhiri jeemwe. 13Mwasiga okwikirisya ebhiwuga bhyonebhyone bhya emibhiri jeemwe bhikore emirimu inguru ya echibhiibhi rwa ebhikorero bhya obhujabhi, tari mwisoosye ku‑Nyamuwanga. Mwirore ati muri bhaanu bhanu bhasuuruuywe okusooka mu‑bhafuuwe, na okwingisibhwa mu‑bhuwanga obhuyaaya. Mwisoosye ku‑Nyamuwanga, na ebhiwuga bhyone bhya emibhiri jeemwe bhibhe nibhimukorera emirimu rwa ebhikorero bhya obhurengeresi. 14Echibhiibhi chitaribhatunga rindi, kwa okubha mutakutangasibhwa na obhuturo bhwa ebhiraagiro, tari omutangasibhwa na obhwitiriranya bhwa Nyamuwanga.

Obhwitiriranya bhwa Nyamuwanga obhureterera abheekirisya okukora obhurengeresi

15Woori chaayike ki? Angu, chigenderere okukora ebhibhiibhi, kwa okubha chitakutangasibhwa na obhuturo bhwa ebhiraagiro, tari echitangasibhwa na obhwitiriranya bhwa Nyamuwanga? Wuri, noorwo na akatyari! 16Mutakumenya ati, mukeesoosya ku‑muunu na okukora jinu keenda, niwo omubha nimumugayuka rwa abhagaya bhaaye?#6:16 Ringira Yowana 8:34. Mbe, araabha mukabha nimwisoosya okugayuka echibhiibhi, muribha abhagaya bha echibhiibhi, na amatwasyo gaacho ni rufu. Nawe mukabha nimwisoosya okugayuka Nyamuwanga, muribha abhakosi bha Nyamuwanga, na amatwasyo gaaye ni bhurame bhwa obhurengeresi. 17Kara, emwe mwariga muri bhagaya bha echibhiibhi. Nawe enisiima Nyamuwanga, kwa okubha woori mweekirisya na emyoyo jeemwe joone okugayuka ameeyigisyo ga echimari ganu ꞉mwaramiiye. 18Enisiima Nyamuwanga, kwa okubha abhasuruumuuye okusooka mu‑mboyero ja echibhiibhi, musige okubha abhagaya bha echibhiibhi rindi. ꞉Aabhasuruumuuye, neeya ˆnaabhakora okubha abhakosi bhaaye, korereki mukorega emisango ja obhurengeresi. 19Naasimura na emwe ku‑chijekekanyo echo cha obhugaya, kwa okubha emwe mutari bhaangu okumenya chinu enaayika. Kara, mwariga nimusoosya ebhiwuga bhyone bhya emibhiri jeemwe okukora emisango emijabhi, mwariga muri bhagaya bha ebhibhiibhi, na ebhibhiibhi bhyemwe ꞉bhyeyongesiisye muno. Nawe woori, mubhe nimwisoosya ku‑Nyamuwanga ebhiwuga bhyone bhya emibhiri jeemwe, mubhe abhakosi bha emisango ja obhurengeresi, korereki mukorere emirimu Nyamuwanga kwa omwoyo gwone.

20Kara, omwanya gunu mwariga muri bhagaya bha echibhiibhi, mwariga muri na obhwitaage bhwa okusiga okukora emisango ja obhurengeresi. 21Nawe angu, ꞉mwabhwene omuriiro ki okuruubhana na ebhikorwa bhyemwe ebhijabhi, bhinu woori ebhireterera murore jiswaro? Gutari‑mo omuriiro gwonegwone! Emisango ejo ejireeta orufu rwa akajaanende koone. 22Woori musuruumuuywe na Nyamuwanga okusooka mu‑bhugaya bhwemwe bhwa echibhiibhi. Ka wone, abhakorere okubha abhakosi bhaaye, na okuruubhana na ejo mubhwene omuriiro. Omuriiro ogwo ni kukorera emirimu Nyamuwanga kwa omwoyo gwone na ku‑bhuteero ni kuramira obhuwanga bhwa akajaanende koone. 23Omuunu woonewoone unu ari mugaya wa echibhiibhi, omuyeero gwaye ni rufu rwa akajaanende koone. Nawe eswe, Nyamuwanga kaachiyaana obhuwanga bhwa akajaanende koone. Obhuwanga obhwo bhutari muyeero, tari ni chiyaanwa chinu echiramira okutura ku‑Kirisito Yeesu, Raatabhugenyi weeswe.

Currently Selected:

Abharuumi 6: jit

Highlight

Copy

Compare