Rum 13
13
Pavlak a nv' kavman
1M'ertu udlani apavlak a nv' kavman pr. Sena ti kavman kinkin ihei Atua iataui. Kavman udlani avp'tir sena ti Atua itaur. 2Sena si lera, ipavr ti m'ertu kinkin ipap'tir kamlen kavman, hin ip'tir kamlen sei Atua itaui. Laha, Atua iputakm anr m'ertu avp'tir kavmlen kavman. 3Sena ti m'ertu avan si p'as akavdedrn a kavman, v'eti m'ertu avan si stu apavdedrn ani. Ipavr ti kaarn ti padedrn a kavman, pan si p'as. Laha, kavman ipani ti naham ipav'a eia. 4Sena ti kavman iv'i m'ertu na m'akarienan Atua a ti ipamhmah anh. V'eti ipavr ti pan si stu, padedrn ani. Sena ti kavman iaua tali lil sena si kaka, sena ti iv'i m'ertu na m'akarienan Atua a ti ipav'iv'en nl reran Atua katu m'lna si stu m'ertu avani anr.
5Sena si lera, pavlak a nv' kavman pr. Imav'i sena ti kvdedrn a nl reran Atua uaki, v'eti sena ti pavlak ms arna v'ahienam'i. 6#Mat 22:21; Mak 12:17; Luk 20:25.Sena si lera pavul takis, sena ti m'ertu nen avv'i m'ertu na m'akarienan Atua a ti apavan pari lera nakl. 7Sena si lera, pavtu sei anr m'ertu iviviln a ti pavtau anr. Ipavr ti iv'i takis la kavman ivr anr m'ertu ha, pavuli pr, v'aha ipavr ti iv'i takis na si udlani, pavuli pr. Pavlak a nv' m'ertu iviviln a ti pavlak a nv'n, kavani ti naha m'ertu ipav'a eia, ipavr ti iviviln a ti ipav'a eia.
Pavlap'sp'as a kam'i
8Mavlev' si kinkin asnr m'ertu ipater, v'eti si iamk uaki ipater. Iv'i ti pavlap'sp'as a kam'i. Sena ti m'ertu ilap'as a tv'aln, ien sei v'nen hua ivri. 9#Avruh 20:14; TVH 5:18; Avruh 20:13; TVH 5:17; Avruh 20:15; TVH 5:19; Avruh 20:17; TVH 5:21; Livai 19:18.Sena ti naran Paivul ivr ti a, “Mav'nah tav'et, v'aha tav'et imav'nah dui, marpep'n m'ertu, mav'nah sei, mavrur tv'alm kahap'il ani, marn sia tv'alm,” v'aha ipavr ti v'nen hua uraur kinkin iak uam, pla v'nen hua udlani lera iter arna v'nen hua iamk, ivr ti a, “Palap'as a tv'alm inep'a ti iv'ih.” 10Naran m'ertu ilap'as a tv'aln, iutakm ani. Sena si lera, naran m'ertu ilap'as a tv'aln, ien sei v'nen hua ivri.
Pavua su naur iv'i a Mlin Lilad a Iesu Kristu
11Pavan si lera sena ti kvrndu naran laha. Hilaha iv'i naran pavthal ml arna m'etrienam'i, sena ti naran na ti Atua ipalev'la nakd imima mau, isiv' naran nvv'ahi itauamu. 12M'alk itv'i ti ipahiris, nut ren ipama ipalahml. Sena si lera p'vsran pari na m'alk kavua su naur na nut ren. 13P'kld ikviviln pr, ipaviviln a nut ren. M'avp'lt asn tim'ah stu kinkin, kavkasmn ptd, kavm'nm'n. M'avan si stu m'a tav'et m'a si stu uraur ml inap'i lera. Nld imapr tv'ald, m'avv'lv'al. 14V'eti pavua su naur iv'i a Mlin Lilad a Iesu Kristu. Maran navanel a ti paran sei p'akm'i irni.
Currently Selected:
Rum 13: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia