Rum 14
14
Mavv'ana hua m'er tv'elm'i
1 #
Kulusi 2:16. Ipavr ti m'ertu kinkin iahua arna v'ahienan, pavlav'i uaki asnm'i, v'eti imav'i ti pavv'lv'al m'ei sena v'ahienan. 2Sena ti m'ertu kinkin iv'ah ti iviviln a ti ipahan si udlani, v'eti tv'aln la iahua ha, ihan sei isi al pitvet uaki. 3M'ertu ihan si udlani imasip'len m'ertu la iahan si udlani ha, v'aha m'ertu iahan si udlani imav'ana hua m'a m'ertu ihan si udlani, sena ti Atua itlev' sarei. 4?Nakm kv'i ak, hin kv'ana hua m'a m'ertu na m'akariena m'ertu uraur? Sena ti hin ipap'tir v'aha ipars arna nahn a mlinan uaki. Hin ipap'tir, sena ti a Mlinad irndu ti ipani ti ipap'tir.
5M'ertu iamk iv'ah ti napn iamk ilil mau kasiv' teruraur, v'eti tv'aln iv'ah ti napn udlani inap'amk uaki. Ip'as a ti m'ertu udlani p'sev' iparndu mamh v'ahienan. 6M'ertu iv'ah ti napn kinkin ilil, iani ilil a ti nahan a Mlin Lilad ipav'a eia, v'aha m'ertu iav'ah ti napn kinkin ilil kasiv' teruraur, ien si lera a ti ipani ti nahan a Mlin Lilad ipav'a eia. M'ertu ihatat, ihatat a ti nahan a Mlin Lilad ipav'a eia, sena ti ivr ip'as an Atua sanan. V'eti m'ertu iahatat, hin iahatat, a ti ipani ti nahan a Mlin Lilad ipav'a eia, kavr ip'as ani. 7Sena ti m'ertu kinkin iahmk asnd isilv' sena hin uaki, v'aha im'a sena hin uaki. 8Sena ti ipavr ti nvsilv', nvsilv' sanan a Mlin Lilad, v'aha ipavr ti nvram'a, nvram'a sanan a Mlin Lilad. Sena si lera, ipavr ti nvsilv', v'aha nvram'a, nvv'i m'ertuan a Mlin Lilad.
9Sena ti a Kristu im'a sena si lera, kathal ml kasilv', a ti ipav'i Mlinar m'ertu avram'a m'er m'ertu avsilv'. 10#2 Kurin 5:10.?V'eti nakm kv'ana hua m'a tv'alm sena v'ata, v'aha ksip'len tv'alm sena v'ata? Sena ti nakd udlani p'vp'tir arna nahn a Kristu naran ipav'ana hua m'a m'ertu. 11#Aisaia 45:23.Sena ti Paivul ivr ti a, “A Mlin Eia ivr ti a, Nvrdaui, inep'a nut nsilv' inap'ei, m'ertu udlani apavsisihpu asnk kavvrp'ep'ei arna nm'ar a ti Kana nv'i Atua.”
12Sena si lera, nakd udlani p'vamk p'sev' p'vvr an Atua nut nvsilv' inap'ei. 13Sena si lera m'avv'ana hua m'a nakd ml, v'eti p'vv'ahur si laha, a ti m'ertu kinkin imatu sei arna navanela tv'aln a ti ipatitihap'el aranan kadars.
Mautakm a tv'alm
14Kana nrndu ti np'lt m'ei a Mlin Lilad a Iesu, sena si lera nkalalau a tim'ah kinkin. V'eti ipavr ti m'ertu kinkin iv'ah ti ipalalau a tim'ah kinkin, hin ipalalau ani pr. 15V'eti ipavr ti tv'alm irn istu sena ti nakm khan tim'ah kinkin, nakm kaasapa navanel na vtmien ml. Mautakm a tv'alm, la a Iesu itam'a sarei sanan ha, sena ti nakm khan tim'ah kinkin uaki. 16Sena si lera, mam'ahu a ti m'ertu apavla pari p'asam kavvr ti iv'i si stu. 17Sena ti v'anuan Atua iav'i tim'ah v'aha nauei, v'eti iv'i p'kl viviln m'a tamat, kav'i ti m'ertu apavrn ipap'as arna M'im'iln P'as. 18Sena ti naran m'ertu kinkin ien pariana Kristu arna si lera, Atua irn ip'as, laha m'ertu avv'ah ti ien si p'as.
19Sena si lera, nakd p'vsapa navanel ipani ti tamat ipap'tir, kavsapa sei ipamhmah a tv'ald. 20Mautakm a parian Atua sena tim'ah uaki. Tim'ah udlani ip'as uaki, v'eti ipavr ti m'ertu kinkin ipars sena tim'ah ihani, iv'i si stu asnn. 21Ip'as a ti mahan m'it, v'aha mam'n naui m'iel, v'aha si kinkin la ipani ti tv'alm ipars, v'aha ipatitihap'el aranan, v'aha ipani ti ikahua ml ha. 22?Nakm v'ahienam ip'tir ihua arna si lera? Ip'as a ti nakm uaki parndu v'ahienam lera m'ei Atua. M'ertu la iav'ana hua m'a hin arna sei im'ahu ani ha, iparn ipap'as. 23V'eti m'ertu iarndu nut inap'ei, kahani uam, hin Atua ipav'ana hua m'ei, sena ti iahani arna v'ahien p'as. Sena ti si udlani navani arna v'ahien p'as iv'i si stu.
Currently Selected:
Rum 14: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia