Rum 12
12
P'vtu p'akd an Atua
1Sena si lera, tv'alk, nmimani ihua a kam'i, sena ti Atua irn istu a kam'i, a ti kam'i pavtu p'akm'i la isilv' ha, asn Atua, kavv'i m'ertu p'asan la Atua iparn ip'as a kam'i ha. Ki lera iv'i m'akarienduan Atua, la pavpatei aranan ha. 2Mavnep'a m'ertu na nadep' ka, v'eti pavuraur udlani, sena ti v'ahienam'i im'dah, a ti pavrndu sei Atua irni, iv'i si p'as, kav'i sei Atua irn ip'as ani, kaviviln udlani.
Nut hua Atua ituvn a m'ertuan a ti apavan parian
3Sena ti kana nvr a kam'i udlani arna vtmienan Atua la itu kana ha, a ti mavv'ah ti kvlil kavsiv' nut iviviln a kam'i inap'ei. V'eti pavv'ahur kam'i arna navanel viviln, inep'a nut Atua itu v'ahien p'as a kam'i udlani p'sev' inap'ei. 4#1 Kurin 12:12.Sena ti p'akd iamk uaki, v'eti nin istudau. Nin udlani lera, pariar iururaur. 5Nakd nvnap'i lera. Nvstudau, v'eti nvp'lt m'ei a Kristu arna p'akn iamk, kavp'lt m'er tv'ald inep'a nut nid udlani avp'lt arna p'akd inap'ei. 6#1 Kurin 12:4-11.Atua ituvn a si ururaur ip'sev' a nakd udlani arna vtmienan. Sena si lera, ipavr ti itu nut hua a m'ertu kinkin a ti ipavrp'ep'a v'nenan, ipavrp'ep'ei pr ipaviviln a nut Atua ittuvn sarei a v'ahien p'as ani inap'ei. 7V'aha ipavr ti itu nut hua a m'ertu kinkin a ti ipasr lm'a tv'aln, ipasr lm'a tv'aln pr, v'aha ipavr ti iv'i ti ipav'iv'en sei anr, ipav'iv'ani pr. 8V'aha ipavr ti Atua itu nut hua a m'ertu kinkin a ti ipav'ana m'a tv'aln kani ti ipap'tir arna v'ahienan, ipani pr. V'aha ipavr ti iv'i ti ipatuvn a sei a tv'aln, ipatau ani arna vtmien. V'aha ipavr ti iv'i ti ipap'aur sas, ipam'akar ani ipahua pr. V'aha ipavr ti iv'i ti ipamhmah a tv'aln, ipani karn ip'as ani pr.
P'kl Kristindau
9Mavlap'as a tv'elm'i kavhap'il ani uaki. Pavlep'la si stu kavuada si p'as. 10Pavlap'sp'as a kam'i inep'a ti kvv'i tiamk aranan a Kristu, kavani ti nahar tv'elm'i ipav'a eia kasiv' nkam'i. 11Np'm'i imastu arna pariam'i. Pavrn nam'er arna nlm'i a ti pavm'akaran a Mlin Lilad. 12Kam'i pavrn ip'as sena ti kvtrah turanienan Atua. Nlm'i ipap'arei naran der ipaier kam'i, pavuada p'kl ti pavtu tamat ipel. 13Pavvsvsen sei anr m'ertuan Atua ahaviak a sei, kavlev' tv'elm'i apavrama al nmaham'i.
14 #
Mat 5:44; Luk 6:28. Pavmiman an Atua a ti ipamhmah anr m'ertu avtp'ev' kam'i. Aau, pavmimani a ti ipamhmah anr, v'eti mavmimani a ti iputakm anr. 15Pavrn ip'as m'er m'ertu avrn ip'as, kavtakal m'er m'ertu avtakal. 16#V'nen 3:7.Kam'i pavamk arna v'ahienam'i m'er tv'elm'i. Mavukl kam'i sena ti kvrndu sei, v'eti pavp'lt mamh arna pariar m'ertu ahavlil. Mavv'ah ti kvrndu sei istudau.
17Ipavr ti m'ertu kinkin iutakm a kam'i, mavtum'alet a si stu ani ml, v'eti pavv'ahur ti pavsapa navanel iviviln arna nah nelnal. 18Ipavr ti navanel iak, pavandinei a ti pavlak arna tamat m'er m'ertu udlani. 19#TVH 32:35.Tv'alk nlap'as a kam'i istudau, ipavr ti m'ertu kinkin iputakm a kam'i, mavtum'alet a si stu ml ani, v'eti pavlni a ti Atua ipatum'alet ani ml, sena ti Paivul ivr ti a, “Iv'i pariak uaki a ti p'etu m'lna si stu,” a Mlin Eia ivri. 20#V'nen 25:21,22.Sena si lera, “Ipavr ti m'ertu ilep'lah irn nam'er, pamsnani. Ipavr ti irn navan, patu nauei ani. Sena ti ipavr ti pan si lera, inep'a ti kutakm ani katu var nap' iv'en arna ptn.”
21Mavm'ahu a ti si stu ipasiv' kam'i, v'eti pavsiv' si stu arna si p'as.
Currently Selected:
Rum 12: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia