Revelesen 8

Saru na luk, m'a sei aval sida p'as a nln, iv'i kul

1Naran iela saru na luk, nadl kinkin ihei arna nut eia dav'a ier pna m'etaneiel iamk. 2Sarei, nla ensel isaru la avp'tir arna nahn Atua hara. Laha, atu natav isaru anr. 3#Emus 9:1; Avruh 30:1,3.Sarei, ensel uraur ima kap'tir asn nev'etet, kaua sei la aval sida p'as a nln ha, iv'i kul. Laha, atu sida p'as istudau ani a ti ipali arna nev'etet, iv'i kul, la iter arna nah napl p'as ha, a ti ien ipav'a asn Atua kap'lt m'a tamatar m'ertuan Atua udlani. 4Laha, ie sida p'as ieli idan arna lm'an ensel kap'lt m'a tamatar m'ertuan Atua kadav'a eia arna nahn Atua. 5#Livai 16:12; Esikiel 10:2; Avruh 19:16; Rev 11:19; 16:18.Sarei, ensel lera ilev' sei aval sida p'as a nln, kalev' nep'v'en iter arna nev'etet katau a nln kasrani arna nadep'. Laha, nadl kinkin iak, nav'l iv'l kalev' m'aten, nami imi.

6Laha, ensel isaru la avua natav isaru hara avandedp' hir a ti apaviv natav.

Ensel itauamu iv natavan--Nai m'a nina ihapu

7 # Avruh 9:23-25; Esikiel 38:22. Sarei, ensel itauamu iv natavan, laha asran ptir ais m'a nep'v'en auhei m'a nadei irs arna nadep'. Dav'a nitla nai udlani arna nadep' ihapu m'a nina udlani ihshsen ihapu.

Tv'el ensel iv natavan--Pna nata ima kav'i nadei

8Sarei, tv'el ensel iv natavan. Laha, asran si kinkin inep'a ptha lil ihapu a nep'v'en irs al nata. Laha, pna nata iamk ima kav'i nadei, pnen iru iter. 9Laha, nitla si udlani isilv' al nata im'a, nitla nauak udlani al nata ihapu.

Nitla ensel iv natavan--Nitla nauei arna nadep' ima kav'i naui haau

10 # Aisaia 14:12. Sarei, nitla ensel iv natavan. Laha, msi lil iamk irs dan eia kar istudau inep'a lait, kadars arna nitla naui lilil m'a nitla nauei udlani itpeia dan al nadep'. 11#Seremaia 9:15.Naha msi lera avr ti iv'i Si Haau. Laha, nitla nauei udlani lahara ima kav'i naui haau, dav'a m'ertu istudau avram'a sena naui haau.

Niv'a ensel iv natavan--Nitla neiel m'a nal m'a msi im't

12 # Aisaia 13:10; Esikiel 32:7; Suil 2:10,31; 3:15. Sarei, niv'a ensel iv natavan. Laha, pna neiel iamk im't, pnen iru iter, pna nal iamk im't, pnen iru iter, nitla msi udlani im't. Sena si lera, nut iahren nakl arna pna napn iamk, v'eti arna pnen iru nut iren. Lihat inap'i lera.

13Sarei, nla trvn iamk itetv eia arna p'knaran, kavr a nadl lil kavr ti a, “Uei, uei, uei, der ipastudau ipaier m'ertu avlak arna nadep', naran ensel itl la adaviv natavar ha, apavivi.”

Currently Selected:

Revelesen 8: nmb

Highlight

Copy

Compare