Revelesen 4

Napl p'as iter arna nut eia

1Pavrni, itauatah a si lera kana nklau kala ti aiela liu iamk arna nut eia. Laha, nadl nrni itauamu iv'ana m'a kana inep'a drl natav, ivr ti a, “Pama eia atlaha. Kana p'ev'iv'en anh sei ipatu hin pr ipatauatah.”

2 # Esikiel 1:26-28; 10:1. Ilahml sarei, M'im'iln P'as ima aranak. Laha, pavrni, nla napl p'as iamk iter arna nut eia. M'ertu iamk ilak arna napl p'as lera. 3M'ertu ilak aranan nla ti ier kam'iel, inep'a nav'et p'as iru, iv'i saspa m'a satias. Nev'iel imlden napl p'as, avrla ti iv'i nav'et p'as iamk ihshsen, nahan iv'i emral. 4Nla napl p'as inelru pln iv'a, (24) itertalu a napl p'as lil lera. Arna napl p'as lera elta arnelru pln iv'a (24) avlak aranan kavua klus tva m'a manu p'asan a mlin, iv'i kul, iter arna ptr. 5#Avruh 19:16; Rev 8:5; 11:19; 16:18; Esikiel 1:13; Rev 1:4; Sek 4:2.Nla ti nav'l ilev' m'aten dan arna napl p'as lil lahara, kadav'l. Laha, nrn nadl kinkin idan atlera, kala lait isaru iv'i nep'v'en iluluv'en arna nah napl p'as lil, avv'i M'im'iln Atua isaru.

6 # Esikiel 1:22. # Esikiel 1:5-10; 10:14. Arna nah napl p'as nla sei inep'a nata ilvlvar kanep'a klas kinkin, avr ti iv'i kristal. A p't nut na si udlani lera, si kinkin arv'a la avsilv' ha avlaktalu a napl p'as. M'atar istudau arna m'er m'a tahr. 7Nki itauamu inep'a laiun, tv'aln inep'a net pluk, nitlen nahn inep'a m'ertu, niv'an inep'a trvn itetv. 8#Esikiel 1:18; 10:12; Aisaia 6:2,3.Sei arv'a la avsilv' hara, hir udlani p'sev' nil heiar ilm'sei, m'atar inelnal arna p'akr m'a a nv' nil heiar. Ahavrnrn hir ren v'aha lihat, kavvr ti a,

“Hin uaki ip'as, ip'as, ip'as,

kav'i Mlin, kav'i Atua,

nut huan ilil kasiv' si udlani.

Hin ilak tituei kalak hilaha, ipama ml ipatauatah.”

9Naran sei arv'a la avsilv' hara avpatei a Mlin ilak arna napl p'as, kasilv' dav'a ikahiris naran, kavpatei, kavani ti nahan iv'a eia, kavvr ip'as ani, 10Arna naran lera, elta arnelru pln iv'a (24) hara avrars arna nahn a Mlin la ilak arna napl p'as ha, kavpatei a Mlin isilv' dav'a ikahiris naran, kavsran manu p'asar arna nah napl p'as, kavvr ti a, 11“U Mlin Eia, Nakm kviviln a ti m'ertu apavpatah kavani ti naham ipav'a eia kavlak a nv' nut huam. Sena ti Nakm kani ti si udlani ima katu hin itauamu, kadater hilaha, sena ti Nakm uaki krni.”

Currently Selected:

Revelesen 4: nmb

Highlight

Copy

Compare