Revelesen 11

M'ertu arru arvrp'ep'a v'nenan Atua

1 # Esikiel 40:3; Sek 2:1,2. Sarei, atu kana v'iep' iamk iv'i tintin, laha ensel ip'tir kavr ti a, “Pap'tir katina nmah tamatan Atua m'a nev'etet m'er m'ertu udlani avpatei Atua a nln. 2#Luk 21:24.V'eti paln nl naml itertalu a nmah tamat, matinei. Sena ti attu sarei al lm'ar v'anudl. Hir apavpas v'anu p'asan Atua dav'a ipaier nal ipanelv'a pln iparu (42). 3Laha, Kana p'etu nut hua anr m'ertuak arru a ti aparvrp'ep'a v'nenak arna napn avv'i 1,260, karua selpak naran apavani.”

4 # Sek 4:3,11-14. Hir arv'i nai iru iv'i uliv, karv'i lait iru arp'tir arna nahn Atua, iv'i Mlin na nadep'. 5Ipavr ti m'ertu kinkin irn ti iputakm anr, v'eti nep'v'en ipadan al navar kalr m'ertu avlep'lar. Ipavr ti m'ertu kinkin irn ti iputakm anr, akrrpi iknap'i lera pr. 6#1 Armlin 17:1; Avruh 7:17-19; 1 Sam 4:8.Nut huar iak a ti aparp'leskar p'knaran na ti nu ikahau naran arvrp'ep'a v'nenan Atua. Nut huar iak a ti aparvav nauei ipav'i nadei, karutakm a nadep' a der udlani arna naran udlani hir uaki arrni.

Avrpep'n m'ertu arru arvrp'ep'a v'nenan Atua

7 # Taniel 7:7; Rev 13:5-7; 17:8; Taniel 7:21. Sarei, naran apavhiris a ti apavvrp'ep'a v'nenar, si dm la ipadan al tah lil ip'arei dav'a ha, ipan naur m'er kasiv'r karpep'nr. 8#Aisaia 1:9,10.Laha, p'akr aparm'la arna navanel na v'anu lil la avri arna v'nen tutuah iv'i a Satam m'ei a Itsip ha, iv'i nut avtau a Mlin Lilad arna su lamu. 9Laha, arna napn ipatl niv'en iv'i pnen, m'ertu avandan a nut udlani, m'ertu avlak arna nl nam'el udlani, m'ertu avv'ana arna v'nen udlani, m'er m'ertu avandan arna v'anu udlani, apavla p'akr, v'eti akavm'ahu a ti apatinr. 10Laha, m'ertu avlak arna nadep' apavrn ipap'as ipastudau sanar kavan tim'ah kavtuvn a sei anr tv'alr, sena ti pruvet arru hara aranp'ilanr m'ertu avlak arna nadep'.

Atua iani ti m'ertu arru lahara arsilv' ml karv'a arna nut eia

11 # Esikiel 37:10. Sarei, naran napn itl niv'en iv'i pnen iv'siau, Atua itep'a nalen na silv'ien iv'a a nlr, laha hir arp'tir arna tlr. Laha, m'ertu avlar kavdedrn istudau. 12#2 Armlin 2:11.Sarei, avrn nadl lil idan eia kavr anr kavr ti a, “Parma eia atlaha.” Sarei, arv'a eia al p'knaran tva. Laha, m'ertu udlani la avlep'lar ha avp'ar. 13#Rev 6:12; 16:18.Arna m'etaneiel lera nami lil imi. Laha, snal na si udlani arna v'anu lil irs. Nami imi karp m'ertu avv'i tausen isaru (7,000). Laha, duanar avdedrn kavani ti nahan Atua na nut eia iv'a eia.

14Tv'el der ihiris. Pavrni, ikap'arei nitla der ipama.

Saru na ensel iv natavan

15 # Avruh 15:18; Taniel 2:44; 7:14,27. Sarei, saru na ensel iv natavan. Laha, nadl lilil kinkin avandan arna nut eia, avvr ti a, “V'anu udlani arna nadep' laha atvrama kavv'i v'anuan a Mlin Eia m'ei a Kristuan. Hin ipav'i Mlin dav'a dav'a ikahiris naran.” 16Laha, elta arnelru pln iv'a (24) la avlak arna napl p'asar arna nahn Atua ha, avrars arna nahr kavpatei Atua kavvr ti a, 17“U Mlin Atua, nut huam ilil kasiv' si udlani. Nakm klak hilaha, kalak tituei, palak uam arna naran ipama. Nvvr ip'as anh, sena ti Nakm ktlev' sera nut hua lilam kav'i Mlin. 18#Npin 2:5; 110:5; Npin 115:13.V'anu udlani nlr irer. Hilaha nl reram ima, iv'i naran na ti pav'ana hua m'er m'ertu avram'a, kav'i naran na ti patu ulienar anr m'ertuam avv'i m'ertu na v'nenam, m'er m'ertu p'asam, m'er m'ertu udlani avdedrn a naham, nki avsusupa, nki avlil, kav'i naran na ti putakm a m'ertu avutakm a nadep'.”

19 # Rev 8:5; 16:18; Rev 16:21. Laha, aiela nmah tamatan Atua iter arna nut eia. Sarei, ala pukiset na turanienan al nmah tamatan, laha nav'l iv'l kalev' m'aten. Arn nadl kinkin, nami imi, nu lil iu iv'i ptir ais.

Currently Selected:

Revelesen 11: nmb

Highlight

Copy

Compare