Revelesen 10

Ensel hua iamk ima dan eia kaua puk pa

1Sarei, nla ensel hua uraur ima dan eia kaua p'knaran tva iamk, inep'a ti iv'i klusan, nev'iel iter arna ptn. Nahn inep'a neiel, tln inep'a nakal iv'i nep'v'en. 2Iua puk pa iamk al lm'an itiela sarei, katu m'ldu tln arna nata, m'ir nen arna nadep'. 3Kav'ara eia a nadl lil, inep'a drl laiun im'dr. Iv'ara, sarei nav'l isaru iv'l kav'ana arna nadl isaru. 4Naran nav'l isaru atvv'ana sarei arna drlr, nrn ti p'ulul ani, v'eti nrn nadl iamk idan eia kavr a kana kavr ti a, “Patutuan v'nen udlani nav'l isaru ivrp'ep'ei, maulul ani.”

5 # Avruh 20:11; TVH 32:40; Taniel 12:7; Emus 3:7. Laha, ensel la nla ti ip'tir arna nata m'a nadep' hara, iah m'ldu lm'an iv'a eia, 6Kavrdaui arna nahan a Mlin la isilv' dav'a ikahiris naran ha. Hin ien nut eia m'a si udlani iter aranan, kan nadep' m'a si udlani ilak aranan, kan nata m'a si udlani iter a nln. Ivr ti a, “Napn ithiris.” 7V'eti naran saru na ensel irn ti ipiv natavan, v'nen tutuahan Atua ipama katu hin inep'a ti itvrp'ep'a sarei anr m'ertu na m'akarienan, avv'i dui na v'nenan.

A Sun ihan puk pa

8 # Esikiel 2:8—3:3. Laha, nadl la ntrn sarei hara, idan eia kav'ana m'a kana ml, kavr ti a, “Pav'a kalev' puk pa atiela sarei, iter al lm'a ensel la ip'tir arna nata m'a nadep' ha.”

9Sarei, nv'a asn ensel kavr ani, kavr ti a, “Patu kana puk pa lera.” Ivr a kana kavr ti a, “Palav'i kahani. Al v'atm parn ti ipahaau, v'eti al navam ipalalm kanep'a ns sukapak.”

10Sarei, nlev' puk pa al lm'a ensel kahani. Laha, nrn ti ilalm al navak inep'a ns sukapak, v'eti naran nthan sarei, ilahml sarei nrn ti v'atk ihaau. 11Laha, ivr a kana ml kavr ti a, “Nakm pavrp'ep'a v'nenan Atua ml a nah m'ertu ipastudau, v'anu ipastudau, m'ertu v'nenar ipastudau, m'er mlin ipastudau.”

Currently Selected:

Revelesen 10: nmb

Highlight

Copy

Compare