Livai 6
6
1 #
Nut Kaka 5:5-8. Laha, a Mlin Eia iv'ana m'ei a Musis, kavr ti a, 2“Ipavr ti m'ertu ien si stu, inep'a ti ien si stu arna nahn a Mlin Eia, inep'a ti ivr ti ipap'aur mamh si ipamk, v'aha itturan sera si iamk, v'aha iv'nah si iamk, v'aha ilev'la nav'et asn m'ertu arna navanel iaviviln, sarei kahap'il m'a tv'aln, 3v'aha ipavr ti ipasla sei iarndu ti ipapaslei itauamu, v'eti ihap'il kavr ti iapaslei, sarei katuran sei v'eti ihap'il--ipavr ti ien si stu kinkin la m'ertu irndu ti ipani v'eti iv'i si stu ha, 4sarei, sena ti iten sera si stu, laha mamihien nen itama sarei aranan, hin ipatum'alet a sei itv'nah sarei, v'aha sei itlev'la sarei arna navanel iaviviln, v'aha sei m'ertu ittu sarei ani a ti ipap'auri, v'aha sei itmln sarei v'eti itpasla sarei ml, 5v'aha sei itturan sarei, v'eti ihap'il. Ipatum'alet a ulien nen pr, katu pnen aranan ml. Ipatum'alet a sei a m'ertu la iv'i nkan itauamu ha, arna napn itu uvrin sena si stu ier m'ertu uraur.
6Ipauirv'a pua na sivsiv asn pris, ipalav'i asnr sivsivan, v'eti ikastu arna nut kinkin. Apaspan ulien nen kala ti iviviln, ipav'i uvrin sena si stu ier m'ertu uraur. 7Ipanap'i lera, pris ipani ti ipalak arna tamat m'ei Atua, aau, ipani arna nahn a Mlin Eia. Laha, ipalev'la si stuan, la iv'i si stu kinkin lera, ier m'ertu uraur nakl ha.”
Sei arpris apavani nakl
8Laha, a Mlin Eia iv'ana m'ei a Musis, kavr ti a, 9“Pav'ana hua m'ei a Erun, m'er a natn, kavr anr, kavr ti a, ‘V'nen hua laha ier uvrin aali. Uvrin aali ipater al nap' arna tiv' na sakrivais, lihat ipaier m'etav'aran. Nap' na tiv' na sakrivais ipav'en pr, ikahiris. 10Laha, pris ipatu klus aani a kalik, katu trasis p'arei aani a kalik, sarei, kalev'la tih nap' na uvrin aali, la nap' iel udlani arna tiv' na sakrivais ha. Sarei, ipataui asn tiv' na sakrivais. 11Sarei, ipalev'la klusan, katu klus uraur, sarei, kaua tih nap' lera av'aran na nut ahl nmah kanuis, ipav'a arna nut p'as ipamk. 12Naran lera, nap' ipav'en uam arna tiv' na sakrivais, akakam'ti. Pris ipatu rana nap' aranan arna m'etav'aran udlani. Ipatu mamh uvrin aali aranan, sarei, ipatu nap' a kris na uvrin sena tamat nakl. 13Nap' ipav'en arna tiv' na sakrivais ipel. Akakam'ti naran kinkin.
14V'nen hua laha ier uvrin iv'i uit: A natn a Erun apavtaui arna tiv' na sakrivais arna nahn a Mlin Eia. 15A pris ipalev'la pna uvrin iv'i uit al lm'an, ipav'i vlaua p'as, m'a ueil, m'a vrankinsens (la iter arna uvrin iv'i uit ha). Sarei, ipali arna tiv' na sakrivais, m'in ipap'eset, ipav'i sei akavnapn ani, kav'i sei atau an a Mlin Eia. 16Sarei, a Erun m'er a natn apavhan duanan. Apavhani m'a p'ret iis nen ihei, arna nut p'as iamk, aau, apavhani arna nut av'aran na nmah kanuis na tamatan Atua. 17Akatahpei m'a iis. Kana nttu sarei anr, ipav'i pna uvrin aali, kav'i suadar. Tim'ah lera iv'i si p'as iamk, inep'a nut uvrin sena si stu m'a uvrin sena si stu ier m'ertu uraur arp'as inap'ei. 18A natn a Erun udlani, la avv'i dui ha, apavhani. Ipav'i v'nen hua ipamk iarr uvrin aali, ipav'i sanar a netm'i apavtauatah a kam'i, ikahiris naran. M'ertu udlani avier si lera nakl apavmhmah a hir pr.’ ”
19Laha, a Mlin Eia iv'ana m'ei a Musis, kavr ti a, 20“Uvrin laha ipav'i uvrin a Erun m'er a natn apavtau an a Mlin Eia, ipatudina hin arna napn avisen ueil aranan a Erun. Arna napn udlani ipatu uvrin iv'i uit lita nen iparu. Ipatu pnen m'etav'aran m'a pnen lihat. 21Ipatahpei al ssv'en m'a ueil. Naran itm'ah sarei, pauirv'a eim. Pna uvrin iv'i uit lera, naran itm'ah sarei, pataui, laha, m'in ipap'eset ipav'a asn a Mlin Eia. 22Laha, a natn a Erun ki ipamk, nki la atvvisen ueil aranan ha, a ti ipaua m'lnen, hin ipataui ipav'i uvrin. V'nen lera iv'i v'nen hua arna nahn a Mlin Eia. Laha, apatu nap' a uvrin lera udlani, pnen ikahter ml. 23Aktu nap' a uvrin iv'i uit udlani pr, sena pris ha. M'ertu kinkin ikahani.”
24Laha, a Mlin Eia iv'ana m'ei a Musis, kavr ti a, 25“Pav'ana m'ei a Erun m'er a natn, kavr anr, kavr ti a, ‘V'nen hua laha ier uvrin sena si stu. Arna nut atrpep'n uvrin aali, apatrpep'n uvrin sena si stu. Ipav'i si p'as ipamk. 26Pris, la itaui iv'i uvrin sena si stu ha, ipahani. Apahani arna nut p'as ipamk, arna nut av'aran na nmah kanuis na tamatan Atua. 27M'ertu kinkin ikaier p'akn ipavr ti idamhmah sarei a hin. Sarei, naran di si kinkin irs arna klus kinkin, pasila klus la di sei irs aranan ha, pani arna nut p'as ipamk. 28Ipavr ti pasilei m'a naui vuv al dis aani a vdrei, pakapapr dis nen. V'eti ipavr ti ksilei m'a naui vuv al dis aani a aian v'il, pasila mamahi m'a nun, sarei, pasileluei al naui p'rei. 29Ardu udlani asnr arpris apavhani. Ipav'i si p'as ipamk. 30V'eti, ipavr ti uvrin sena si stu kinkin iv'i nki la atuirv'a sera din al nmah kanuis na tamatan Atua, a ti arm'ertu apavlak arna tamat m'ei Atua al nutet ha, akavhani pr. Apali al nap'.
Currently Selected:
Livai 6: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
