Livai 5
5
Uvrin sena si stu
1Ipavr ti m'ertu ien si stu sena ti iv'rn a m'ertu uraur ien turanien iamk, ipavr ti itla sera sanan, v'aha itrndu sanan, v'aha ihei, ipavr ti iavrp'ep'ei, mamihien sena si stu ipater aranan sanan. 2Ipavr ti m'ertu ier si iamk la istu arna nahn a Mlin Eia ha, ipavr ti iv'i p'ak si slm la istu arna nahn a Mlin Eia ha, v'aha p'ak pluk la istu arna nahn a Mlin Eia ha, v'aha p'ak sei iharev' arna v'atn la istu arna nahn a Mlin Eia ha, laha, iarndaui, hin ikstu pr arna nahn a Mlin Eia, mamihien sena si stu ipater aranan sanan. 3V'aha, ipavr ti ier si kinkin, la istu arna nahn a Mlin Eia ha, arna p'ak m'ertu kinkin, v'eti iarndaui, naran itrndu sarei, mamihien sena si stu ipater aranan sanan. 4V'aha, ipavr ti m'ertu kinkin ituran a si kinkin, v'eti iav'ahur mamh sei ivri, arna nut v'ata ituran ani, a ti ipan si p'as v'aha si stu, v'eti iarndaui, naran itrndu sarei, mamihien sena si stu ipater aranan sena si lera nakl. 5Laha, ipatu hin, naran mamihien iter aranan sena si stu udlani lera kinkin, hin ipavrp'ep'a ti iten sera si stu arna nut lera.
6Sarei, ipauirv'a uvrin sena si stuan asn a Mlin Eia, sena si stu iten sarei. Ipauirv'a prapar na sivsiv, v'aha net sivsiv, v'aha net nani ipamk, ipav'i uvrin sena si stu. Ipanap'i lera, pris ipani ti ipalak arna tamat m'ei Atua, sena ti ien si stu. 7Ipavr ti iarndu ti ipauirv'a net sivsiv, ipauirv'a navimar iparu, v'aha vntau iparu. Nki ipamk ipav'i uvrin sena si stu, tv'aln ipav'i uvrin aali. 8Sarei, ipauirv'a asn pris. Hin ipatu nki ipamk ipav'i uvrin sena si stu, ipani ipatauamu. Laha, ipalev'la ptn kavap'ri, v'eti ikatrususi. 9Sarei, ipavisen pna di uvrin sena si stu arna tv'eliel na tiv' na sakrivais, kahsran duana din arna nut auei na tiv' na sakrivais. Ipav'i uvrin sena si stu. 10Sarei, ipatu tv'aln ipav'i uvrin aali, inep'a nut attu sarei a ti apani ipanap'ei. Inap'i lera, pris ipani ti ipalak arna tamat m'ei Atua, kalev'la si stuan.
11V'eti, ipavr ti m'ertu iten sera si stu iarndu ti ipauirv'ar navimar arru v'aha vntau arru, ipauirv'a vlaua p'as, ipav'i lita iru. Ipav'i uvrin sena si stu. Ikatu ueil aranan, v'aha vrankinsens, sena ti iv'i uvrin sena si stu. 12Sarei, ipauirv'a asn pris. Sarei, pris ipalev'la pnen al lm'an, iv'i pnen akavnapn ani. Sarei, ipatu nap' ani arna tiv' na sakrivais, ipanep'a nut atu uvrin aali asn a Mlin Eia nakl. Ipav'i uvrin sena si stu. 13Ipanap'i lera, pris ipani ti ipalak arna tamat m'ei Atua, sena si stu iani arna nut lera nakl. Laha, ipalev'la si stuan. Sarei, pnen ipav'i nka pris, ipav'i uvrin iv'i uit.’ ”
Uvrin sena si stu ier m'ertu uraur
14Sarei, a Mlin Eia iv'ana m'ei a Musis, kavr ti a, 15“Ipavr ti m'ertu ien si stu ier m'ertu uraur, inep'a ti ikasmni arna sei iarr si p'sp'asan a Mlin Eia, ipauirv'a pua na sivsiv ipamk asn a Mlin Eia, ipav'i uvrin sena si stu ier m'ertu uraur. Ipalev' pua na sivsiv lera asnr sivsivan, v'eti ikastu arna nut kinkin. Ipaspan ulien nen m'a sekel iv'i silva, ipanep'a sera uliena sekel na nutet. Ipav'i uvrin sena si stu ier m'ertu uraur. 16Ipatum'alet a sei, sena ti iutakm a m'ertu arna nut ier si p'sp'as lahara. Sarei, ipatu pnen ml aranan, katau a pris. Ipanap'i lera, pris, sena ti ilev' pua na sivsiv, iv'i uvrin sena si stu ier m'ertu uraur, ipani ti ipalak arna tamat m'ei Atua, kalev'la si stuan.
17Ipavr ti m'ertu ien si stu, kan si kinkin iluvn a v'nen huan a Mlin Eia, ipavr ti iarndaui, v'eti iten sera si stu uam, mamihien nen ipater aranan sanan. 18Ipauirv'a pua na sivsiv asn pris, ipalav'i asnr sivsivan, v'eti ikastu arna nut kinkin. Apaspan ulien nen kala ti iviviln ani, ipav'i uvrin sena si stu ier m'ertu uraur. Ipanap'i lera, pris ipani ti ipalak arna tamat m'ei Atua, sena ti iarndu ti ien si stu, ikasmni, v'eti iarndaui. Laha, ipalev'la si stuan. 19Iv'i uvrin sena si stu ier m'ertu uraur. Iten sera si stu arna nahn a Mlin Eia pr.”
Currently Selected:
Livai 5: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
