Livai 4
4
Uvrin sena Si Stu
1Laha, a Mlin Eia iv'ana m'ei a Musis, kavr ti a, 2“Pav'ana m'er arm'ertu a Isrel, kavr ti a, ‘Ipavr ti m'ertu kinkin ien si stu kaluvn a v'nen huan a Mlin Eia kinkin, v'eti iarndaui ti iten sera si stu, ipavr ti ien si kinkin iaviviln a ti apani, kan si kinkin inap'i lera, 3ipavr ti pris, la atvisen sera ueil aranan ha, ien si stu, kani ti mamihien sena si stu ima aranar arm'ertu, hin ipauirv'a uvrin ipamk asn a Mlin Eia sena si stuan. Ipav'i net pluk ipamk, v'eti ikastu arna nut kinkin, ipav'i uvrin sena si stu.
4 Laha, ipauirv'a pluk asn karliu na nmah kanuis na tamatan Atua, katu lm'an arna pt pluk lera, sarei katrp'ni arna nahn a Mlin Eia. 5Sarei, pris, la atvisen sera ueil aranan ha, ipalev' di pluk lera kinkin, kauirv'a al nmah kanuis na tamatan Atua. 6Pris ipadi nirh lm'an al di pluk, kavisen nut pa na nadei lera ipav'asaru arna nahn a Mlin Eia, arna nah kalik p'arei itukar nutet. 7Sarei, pris ipatu pna di pluk arna tiv' na sakrivais, arna kuman, la iter al nmah kanuis na tamatan Atua ha. Sarei, ipahsran duana di pluk arna nut auei na tiv' na sakrivais aali, la iter asn liu na nmah kanuis na tamatan Atua.
8Ipalev'lua kris na pluk lera udlani, ipav'i uvrin sena si stu. Ipalev'lua kris la itukar enn ha, m'a kris udlani iter arna enn, 9m'er nev'et lip nen arru, m'a kris iter arna si lera arna tv'eliel nar, m'a kris pa iuada rnen, la iter eia na nev'et lip nen ha. 10Apani ipanep'a nut aani m'a pluk iv'i sakrivais kav'i uvrin sena tamat. Laha, pris ipatu nap' ani arna tiv' na sakrivais aali. 11V'eti nila p'ak pluk lera, m'a p'akn udlani, m'a ptn, m'er tln, m'a v'atn, m'a nsn, 12pluk lera iparmani kadav'a av'aran na nut ahl nmah kanuis. Ipav'a arna nut tkv ihei, arna nut asran tih nap' nakl. Sarei ipatu nap' ani m'a rana nai. Aau, ipatu nap' ani arna nut asran tih nap' nakl.
13Laha, ipavr ti arm'ertu udlani a Isrel avan si stu, v'eti ahavrndu ti atvan sera si stu, iv'i sei arm'ertu adavlei, v'aha ipavr ti avan si iamk iluvn a v'nen huan a Mlin Eia, arna nut kinkin iaviviln a ti apani, v'eti mamihien sena si stu ima aranar, 14naran avrndu ti atvan sera si stu, sarei, arm'ertu udlani, la avp'lt ha, apavtu net pluk ipamk sena si stu lera, apavuirv'a al nmah kanuis na tamatan Atua.
15Sarei, arelta asnr apavtu lm'ar arna pt pluk lera arna nahn a Mlin Eia. Sarei apatrp'n pluk lera arna nahn a Mlin Eia. 16Sarei, pris, la atvisen sera ueil aranan ha, ipalev' di pluk lera kinkin, kauirv'a al nmah kanuis na tamatan Atua. 17Pris ipadi nirh lm'an al di pluk, kavisen nut pa na di lera ipav'asaru arna nahn a Mlin Eia, arna nah kalik p'arei itukar nutet.
18Sarei, pris ipatu pna di pluk arna tiv' na sakrivais, arna kuman, la iter al nmah kanuis na tamatan Atua. Sarei, ipahsran duana di pluk arna nut auei na tiv' na sakrivais aali, la iter asn liu na nmah kanuis na tamatan Atua. 19Ipalev'lua kris na pluk lera udlani, katu nap' ani arna tiv' na sakrivais. 20Ipani m'a pluk lera ipanep'a nut iani m'a pluk iv'i uvrin sena si stu, aau, ipani ipanap'i lera. Inap'i lera, pris ipani ti apavlak arna tamat m'ei Atua, ipalev'la si stuar. 21Sarei, apavrman pluk lera, kavrav'a a nut av'aran na nut avhl nmah kanuis, kavtu nap' a pluk ipanep'a nut avtu nap' a pluk itauamu inap'ei. Ipav'i uvrin sena si stu sanar arm'ertu udlani.
22Naran mlin iamk iten sera si stu kinkin, katluvn a sera v'nen huan a Mlin Eia, iv'i Atuan, v'eti iarndaui, ipavr ti ien si kinkin iaviviln a ti apani, laha, iten sera si stu pr, 23v'aha, ipavr ti ien si stu, sarei karndaui, ipauirv'a net nani ipamk, ikastu arna nut kinkin, ipav'i uvrin sanan. 24Laha, ipatu lm'an arna pt nani lera, katrp'ni arna nut atrp'n uvrin aali arna nahn a Mlin Eia. Ipav'i uvrin sena si stu. 25Sarei, pris ipatu pna di pluk arna tiv' na sakrivais, arna kuman. Sarei, ipahsran din arna nut auei na tiv' na sakrivais aali. 26Sarei, ipatu nap' a kris nen udlani, inep'a nut aani m'a kris na sakrivais iv'i uvrin sena tamat. Ipanap'i lera, pris ipani ti ipalak arna tamat m'ei Atua, kalev'la si stuan.
27 #
Nut Kaka 15:27,28. Naran m'ertu kinkin iten sera si stu, katluvn a sera v'nen huan a Mlin Eia, iv'i Atuan, v'eti iarndaui, ipavr ti ien si kinkin iaviviln a ti apani, laha, iten sera si stu pr, 28v'aha, ipavr ti ien si stu, sarei karndaui, ipauirv'a net nani ipamk, v'eti ipav'i prapar nen, ikastu arna nut kinkin. Ipav'i uvrin sena si stu iani. 29Laha, ipatu lm'an arna pt si slm iv'i uvrin sena si stu, katrp'n uvrin sena si stu lera arna nut atu uvrin sena si stu nakl. 30Sarei, pris ipatu pna di nani lera arna tiv' na sakrivais, arna kuman. Sarei, ipahsran din arna nut auei na tiv' na sakrivais aali. 31Sarei, ipalev'lua kris nen udlani, inep'a nut aani m'a kris na sakrivais iv'i uvrin sena tamat. Sarei, ipatu nap' ani arna tiv' na sakrivais, m'in ipap'eset ipav'a asn a Mlin Eia. Ipanap'i lera, pris ipani ti ipalak arna tamat m'ei Atua, kalev'la si stuan.
32Ipavr ti iuirv'a net sivsiv, a ti ipav'i uvrin sena si stu, ipauirv'a prapar nen, ikastu arna nut kinkin. 33Laha, ipatu lm'an arna pt si slm iv'i uvrin sena si stu, katrp'ni, ipav'i uvrin sena si stu, arna nut atrp'n uvrin sena si stu nakl. 34Sarei, pris ipalev' pna di sei iv'i uvrin sena si stu, kataui arna tiv' na sakrivais, arna kuman. Sarei, ipahsran din arna nut auei na tiv' na sakrivais aali. 35Sarei, ipalev'lua kris nen udlani, inep'a nut aani m'a kris na sivsiv, iv'i sakrivais kav'i uvrin sena tamat. Sarei, pris ipatu nap' ani arna tiv' na sakrivais, inep'a nut aani m'a sakrivais aali katau an a Mlin Eia. Ipanap'i lera, pris ipani ti ipalak arna tamat m'ei Atua, kalev'la si stuan.
Currently Selected:
Livai 4: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
