Livai 3
3
Uvrin sena Tamat
1Ipavr ti uvrin m'ertu iuirv'a iv'i uvrin sena tamat, ipavr ti ilav'i asnr pluk, ipav'i pua v'aha prapar, v'eti ikastu arna nut kinkin, ipav'i uvrin ipatau an a Mlin Eia. 2Laha, ipatu lm'an arna pt sei iuirv'a iv'i uvrin. Ipatrp'ni asn karliu na nmah kanuis na tamatan Atua. Sarei, arpris, avv'i a natn a Erun, apavvisen din arna nut udlani arna tiv' na sakrivais. 3Sarei, ipatau uvrin ipav'i uvrin sena tamat, ipav'i uvrin aali asn a Mlin Eia. Ipalev'lua kris la itukar enn ha, m'a kris iter arna enn, 4m'er nev'et lip nen arru, m'a kris iter arna si lera arna tv'eliel nar, m'a kris pa iter eia na rnen. 5Sarei, a natn a Erun apavtu nap' ani arna tiv' na sakrivais, arna sakrivais aali, la iter arna rana nai la iter arna nap' ha. Iv'i uvrin aali, kav'i sei m'in ip'eset iv'a asn a Mlin Eia.
6Ipavr ti uvrin m'ertu iuirv'a iv'i uvrin sena tamat, ipavr ti ilav'i asnr sivsiv, ipav'i pua v'aha prapar, v'eti ikastu arna nut kinkin, ipav'i uvrin itau an a Mlin Eia. 7Ipavr ti ilev' net sivsiv a ti ipav'i uvrinan, ipataui ipav'i uvrin arna nahn a Mlin Eia. 8Laha, ipatu lm'an arna pt sei iuirv'a iv'i uvrin. Ipatrp'ni asn karliu na nmah kanuis na tamatan Atua. Sarei, arpris, avv'i a natn a Erun, apavvisen din arna nut udlani arna tiv' na sakrivais. 9Sarei, ipatau uvrin ipav'i uvrin sena tamat, ipav'i uvrin aali asn a Mlin Eia. Ipalev'lua kris nen, m'a kris na vlin udlani, ipalev'luei asn su dun. Ipalev'lua kris la itukar enn ha, m'a kris iter arna enn, 10m'er nev'et lip nen arru, m'a kris iter arna si lera arna tv'eliel nar, m'a kris pa iter eia na rnen. 11Sarei, pris ipatu nap' ani arna tiv' na sakrivais, ipav'i tim'ah. Iv'i uvrin aali asn a Mlin Eia.
12Sarei, ipavr ti uvrin iuirv'a iv'i nani, ipataui ipav'i uvrin arna nahn a Mlin Eia. 13Ipatu lm'an arna ptn. Ipatrp'ni asn karliu na nmah kanuis na tamatan Atua. Sarei, a natn a Erun apavvisen din arna nut udlani arna tiv' na sakrivais. 14Sarei, ipatu uvrinan, ipav'i uvrin aali asn a Mlin Eia. Ipalev'lua kris la itukar enn ha, m'a kris iter arna enn, 15m'er nev'et lip nen arru, m'a kris iter arna si lera arna tv'eliel nar, m'a kris pa iter eia na rnen. 16Sarei, pris ipatu nap' ani arna tiv' na sakrivais, ipav'i tim'ah. Iv'i uvrin aali kav'i sei m'in ip'eset. Kris udlani iv'i nkan a Mlin Eia. 17V'nen hua laha ipav'i v'nen ipamk ipater ikahiris naran, asnr a netm'i, la apavtauatah a kam'i ha, arna nl nam'elam'i udlani: mkavhan kris m'a di sei.’ ”
Currently Selected:
Livai 3: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
