Ap'u 48

A Sikup imhmah anr a natn a Susev'

(Isrel 11:21)

1Itauatah a si udlani lera, dui iamk ivr an a Susev', kavr ti a, “Parn, a tetiam im'at.” Laha, ilev' a natn dui arru, Manasa m'ei Ivrem kavrav'a m'er. 2Dui iamk ivr an a Sikup kavr ti a, “Palei, a natm Susev' ima asnm.” Laha, a Isrel irvrv hin kalak arna pas. 3#Ap'u 28:13,14.A Sikup ivr an a Susev' kavr ti a, “Atua Na Nut Hua Udlani iv'iv'en Hin asnk arna nut a Lus arna nadep' a Kenan kamhmah a kana, 4kavr ti a, ‘Hilaha Kana p'ani ti navam ipaiak, pavnelnal, a natm ipastudau. P'etu nadep' laha an a natm ipatauatah anh apavuadei ikahiris naran.’ 5V'eti hilaha a natn dui arru, a Ivrem m'ei a Manasa la ariak asnm arna nadep' a Itsip ha, itauamu a ti kana nma asnm arna nut a Itsip, arv'i nkak. Aparv'i nkak, karnap'ei a Rup'en m'ei a Simiun. 6Hir a natm la apaviak asnm ipatauatah anr ha apavv'i nkam, apavvr nahar ipatauatah anr tv'alr, sena ti nadep' ipav'i nkar. 7#Ap'u 35:16-19.Inep'a ti kana, naran nma dan a Patan, a Retsel irhap'ni asnk arna nut a Kenan, naran nrsapa navanel, naran nut isusupa mau a ti p'vier a Evrat. Laha, ntini arna navanel a Evrat, iv'i a P'etliem.”

8Laha, a Isrel ilar a natn dui a Susev' kavr ti a, “?Hir ak lah?”

9A Susev' ivr an a tetian kavr ti a, “Hir arv'i a natk, la Atua ittu sarei a kana ha, arna nut laha.” Laha, ivr ani, kavr ti a, “Nvrdaui, pauirmar asnk, kana p'emhmah anr.” 10Hilaha arm'aten a Isrel arprs, a ti hin ikaledu sei. Laha, ilav'r armima asnn, hin irav'r istudau. 11A Isrel ivr an a Susev', kavr ti a, “Kana nv'ah ti nkala nahm uam, v'eti a Mlin Eia iv'iv'en kana a natm.”

12Hin a Susev' ilev'lar dan a p't nut na plk tln a Sikup, kavsisihpu a nadep'. 13Laha, a Susev' ilev'p'lt anr, Ivrem arna m'ldaun iv'a arna m'ir nen a Isrel, hin a Manasa arna m'ir nen iv'a arna m'ldaun a Isrel, kani ti armima asnn. 14Hin a Isrel iah viviln a m'ldaun kataui arna ptn a Ivrem, la iv'i titiatah ha, katu m'ir nen arna ptn a Manasa, katu lm'an inep'a nut irni inap'ei, sena ti a Manasa iv'i titiamu. 15Laha, imhmah an a Susev' kavr ti a, “Nrn ti Atua, la a tetiak Epraham m'ei Aisak arlak mima asnn ha, Atua la ip'aur silv'ienak dav'a dav'a ier dika ha, 16aau, nrn ti Ensel, la ilev'la kana arna si stu udlani ha, ipamhmah anr malakal la arru ha. Nrn ti aparla nahak, m'a nahar a tetiak Epraham m'ei Aisak, kani ti hir apavlil kavnelnal mau arna nadep'.”

17Naran a Susev' ila ti a tetian itu m'ldaun arna ptn a Ivrem, iarn ip'as ani. Kalev'lua lm'an a tetian arna ptn a Ivrem ti ipataui arna ptn a Manasa. 18Laha, a Susev' ivr an a tetian, kavr ti a, “Ikahei, tatei, sena ti ki laha iv'i titiamu. Patu m'ldaum arna ptn.”

19V'eti a tetian ivri ikahei, kavr ti a, “Nrndaui, natk. Nrndaui. Hin nl nam'elan ipalil, v'eti, nvrdaui, titiatah nan ipalil kasiv'i, a natn apavrama kavnelnal arna v'anu udlani.”

20 # Isrel 11:21. Laha, imhmah anr arna napn lahara kavr ti a, “Arm'ertu a Isrel apavvr naham'i naran apavmhmah a m'ertu kavvr ti a, ‘Nrn ti Atua ipan nakm panap'ar a Ivrem m'ei a Manasa.’ ” Inap'i lera, itaui ti a Ivrem itauamu an a Manasa.

21Sarei, a Isrel ivr an a Susev' kavr ti a, “Palei, p'am'a ra. V'eti a Mlin Eia ipalak asnm'i, dav'a kauim'alet a kam'i ml arna nadep'ar a tetiam'i. 22Kana p'etu nut p'as ipamk anh, v'eti natu ki a tv'alm, nut nen nlev'lei arna nut Amur m'a tali hanak m'a tenpauiak.”

Currently Selected:

Ap'u 48: nmb

Highlight

Copy

Compare