Ap'u 47
47
A Sikup m'ei nl nam'elan avlak arna nut a Kusen
1Sarei, a Susev' iv'a kavr an a Veru kavr ti a, “A tetiak, tv'alk udlani, sivsivar m'a plukar m'a siar udlani avandan arna nut a Kenan. Hilaha, parn, avlak arna nut a Kusen.” 2Hin ilav'r ardu arlm' asn tv'aln kav'iv'en an a Veru. 3Sarei, a Veru ivr anr tv'aln kavr ti a, “?Kvan parei v'ata?” Avvrpren a Veru kavvr ti a, “Kam'em' nvv'i m'ertu na pariam kavv'i dui nvp'aur si slm. Kam'em' m'er a tetiam'em' nvnap'i lera.”
4Laha, avvri ml an a Veru kavvr ti a, “Kam'em' nvrama a ti p'vlak arna v'anu laha. Sena ti nina uadar si slmar m'ertu na pariam ihei arna nut a Kenan, sena ti m'em'erien ihuadau. Sena si lera nvmiman anh a ti pam'ahu a ti m'ertu na pariam apavlak arna nut a Kusen.”
5Laha, a Veru ivr an a Susev' kavr ti a, “Hin a tetiam m'er tv'alm avrama asnm. 6Nadep' a Itsip udlani itapar arna nahm'i. Pani ti a tetiam m'er tv'alm apavlak arna nadep' p'as isiv' nut uraur. Pani ti apavlak arna nut a Kusen. Laha, ipavr ti asnr, parndu ti hir kinkin avrndu mamh pariar, pataur a ti apavp'aur si slmak.”
7Sarei, a Susev' iuirma a tetian, iv'i a Sikup, kani ip'tir arna nahn a Veru. Laha, a Sikup imhmah an a Veru. 8Laha, a Veru ivr an a Sikup, kavr ti a, “?Paiam iv'a?”
9A Sikup ivrpren a Veru kavr ti a, “Napn na paiak naran nv'i v'anudl uaki arna nadep' ka, atvier sera pai inelnal iv'amk pln ineltl (130). Napn na paiak arna silv'ienak ahavp'arei, kavstu. Ahavier napn na pai na silv'ienar m'ertarep'ak, naran hir avv'i v'anudl arna nadep' ka.” 10Laha, a Sikup imhmah an a Veru, sarei karuh kaln nahn a Veru.
11Sarei, a Susev' iani ti a tetian m'er tv'aln avua nadep' p'as arna nut a Itsip, nut nen iv'i Ramsis, inep'a nut a Veru itaui inap'ei. 12A Susev' imsnen a tetian a tim'ah, m'er tv'aln, m'er arm'ertu al nmahan a tetian, isapa nut armardel avnelnal inap'ei.
A Susev' ien pari p'as arna naran na m'em'erien
13Tim'ah ihishiser arna nadep' udlani, sena ti m'em'erien ilil ihua ihuadau, iani ti arm'ertu arna nut a Itsip m'er arm'ertu a Kenan avla ru nai iruru sena m'em'erien. 14A Susev' itup'lten nav'et udlani avpaslei arna nut a Itsip m'ei a Kenan, sena uit la atvul sarei ha. Itauatah iuirv'a nav'et al nmah lilan a Veru.
15Naran nav'et ihiris a Itsip m'ei a Kenan, ardu a Itsip avrama asn a Susev' kavvr ti a, “Patu kam'em' tim'ah kinkin. ?Krn ti p'vram'a arna nahm, sena ti nav'etam'em' ihiris?”
16A Susev' ivrm'alet anr kavr ti a, “Ipavr ti nav'etam'i ihiris, pavtu kana si slmam'i, a ti p'etu kam'i tim'ah ipav'i m'lnen.” 17Laha, avuirv'a si slmar asn a Susev', laha itu tim'ah anr iv'i m'lna husar, sivsivar, naniar, plukar m'a tukiar. Arna pai lahara itu tim'ah anr iv'i m'lna si slmar.
18Naran pai lahara ithiris avm'alet ml atahan kavvr ani kavvr ti a, “Nkavtutuan si lera asnm, mlin lil, ti nav'etam'em' itv'el udlani, m'a si slmam'em' itv'i udlen nkam. Mlin lil, hilaha si ml p'vtu anh ihei, v'eti p'akm'em' mau iter, m'a nadep'am'em'. 19Mani p'vram'a, v'eti pan si kinkin. Mani ti nadep'am'em' ipam'tm't. Pul kam'em' m'a nadep'am'em' p'vv'i m'lna tim'ah ha. Kam'em' p'vv'i m'ertu na parian a Veru, ti hin ipaua nadep'am'em'. Patu kam'em' uit, ipani ti p'vsilv' katu kam'em' m'at nen ti p'vlaui arna nadep'am'em'.”
20Laha, a Susev' iul nadep' udlani arna nut a Itsip iv'i nkan a Veru. M'em'erien ihua ihuadau kani ti dui udlani arna nut a Itsip avulul a nadep'ar. Lahara nadep' udlani ima kav'i nkan a Veru. 21Ien m'ertu udlani avlak arna pna nut a Itsip m'a pnen avrama arna v'anu lil. 22V'eti iaul nadep'ar prisar; hir ahavulul a nadep'ar sena ti a Veru itu nav'et apavhatat ani anr.
23A Susev' ivr anr nelnal, “Palei, hilaha ntul sera kam'i m'a nadep'am'i sanan a Veru. Nava nai pavlaui al namlam'i hilah. 24Naran uit itarep', naran na ti kam'i pavner nava uit ipalm', pavtu nki ipamk an a Veru nakl. Kam'i kavua nava ki ipav'a ti pavlaui, ipav'i suadam'i, la kvlak al nmah iamk ha.”
25Hir avvrprani kavvr ti a, “Klev'la kam'em' arna m'ien. Nakm kv'i mlinam'em', ipavr ti parn ip'as a kam'em', p'vv'i m'ertu na parian a Veru.” 26Laha, a Susev' ien v'nen hua laha iter arna nut a Itsip ier dika, ti arna nki ipalm' a Veru ipaua nki ipamk, v'eti si lera ikaier arprisar, nadep'ar iav'i nkan a Veru.
A Susev' ituran sei asn a Sikup
27Laha, arm'ertu a Isrel avlak arna nadep' a Itsip, arna v'anu a Kusen. Siar inelnal arna nadep' lera, hir avrama kavnelnal istudau. 28A Sikup ilak arna nadep' a Itsip pai inal lman isaru (17). Laha, pai na silv'ienan a Sikup ier inelnal iv'amk pln inelv'a pln isaru (147). 29#Ap'u 49:29-32; 50:6.Napn itmima ti a Isrel ipam'a, laha, iv'ara an a natn iv'i a Susev' kavr ani, kavr ti a, “Hilaha ipavr ti krn pan si p'as a kana, nvrdaui, patu lm'am a nv' pnakk, kan sei ipap'as kaviviln a kana. Nvrdaui, matin kana arna nut a Itsip. 30Kana nrn p'em'la m'er a tetiak nakl, parman kana dan a Itsip katin kana arna nut atintin m'ertu.” Hin a Susev' ivrprani, kavr ti a, “Kana p'en sei nakm kvri.”
31Hin a Sikup ivri kavr ti a, “Paturan asnk.” Laha, ituran asnn. Sarei, ti a Sikup iaul katu tamat arna nut iululn arna ptn.
Currently Selected:
Ap'u 47: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
