Ap'u 46

A Sikup iv'el kadav'a a Itsip

(Avruh 6:14-25)

1Laha, a Isrel iv'el kaua sian udlani kadama a nut a Persipa karp si slm katau asn Atuan a tetian, iv'i Aisak. 2Sarei, Atua iv'ana m'ei a Isrel arna lihat, naran im'atr kala sei, kavr ti a, “Sikup, Sikup.” Hin ivrprani, kavr ti a, “Kana hilaha.”

3Laha, ivr ti a, “Kana nv'i Atua, kav'i Atuan a tetiam. Madedrn a ti pav'a a Itsip, sena ti Kana p'ani ti pama kav'i v'anu lil atlera. 4Kana p'av'a auei m'ah karv'a a Itsip, sarei, nvrdaui, p'auim'alet anh ml. Dav'a, a Susev' ipap'leskar m'atam naran pam'a.”

5Sarei, a Sikup iln nut a Persipa. Laha, a natn a Isrel avtaur a tetiar, iv'i a Sikup, m'er a natr papa m'er a naur al kat udlani la a Veru itap'er ha a ti aparmanr. 6#Parei 7:15.Laha, avlev' plukar, m'a siar udlani, la avlav'i arna nut a Kenan ha, kavv'el kavrav'a a Itsip. Hir a Sikup m'er a natn udlani avsapei. 7Avv'i a natn dui m'er a natr, dui m'a tav'et, m'er a natn tav'et. Iuirma hir udlani avrama arna nut a Itsip.

8Hir laha nahar a natn a Isrel, la avrav'a arna nut a Itsip ha, avv'i a Sikup m'er a natn. A Rup'en iv'i titiamu. 9A natn a Rup'en avv'i: a Hanuk, a Palu, a Esrun m'ei a Karmi. 10Hir a natn a Simiun avv'i a Semuel, a Samin, a Uat, a Sakin, a Suar m'ei a Saul, iv'i a natn a tav'et iamk a Kenan. 11A natn a Livai avv'i a Kersun, a Kuhat m'ei a Merari. 12A natn a Suta avv'i a Er, a Unan, a Sela, a Peres m'ei a Sera. V'eti a Er m'ei a Unan arm'a arna nut a Kenan. A natn a Peres arv'i a Esrun m'ei Amul. 13A natn a Isakar avv'i a Tula, a Puva, a Sup m'ei a Simrun. 14A natn a Sepulun avv'i a Seret, a Elun, m'ei a Salel. 15Arki laha avv'i a natn duian a Lia, la ilav'r asn a Sikup ha, arna nut a Patan Aram, m'ei a natn tav'et iv'i a Taina. A natn dui m'er a natn tav'et, la a Lia ilav'r ha, arneltl plen itl (33).

16A natn a Kat avv'i a Siviun, a Haki, a Suni, a Espun, a Eri, Aruti m'ei Areli. 17A natn Aser avv'i a Simna, a Isua, a Isui, a Peraia m'ei a v'nr, iv'i a Sera. A natn a Peraia avv'i a Hipa m'ei a Malkiel. 18Arki laha arnal lman ilm'sei ha avv'i a natn a Silpa la ilav'i asn a Sikup ha. Hin a Silpa iv'i vitar na m'akarien la a Lapan itau an a natn tav'et, iv'i a Lia ha.

19A natn a Retsel, iv'i a naun a Sikup, arv'i a Susev' m'ei a P'ensamin. 20#Ap'u 41:50-52.A natn iru ariak asn a Susev' arna nut a Itsip, arv'i a Manasa m'ei a Ivrem. A naun, iv'i Asenat, ilav'r, kav'i a natn a Putivera, iv'i dui lil na nmah tamatan atuar iamk arna nut a Un. 21Hir a natn a P'ensamin avv'i a Pela, a Peher, Aspel, a Kera, a Naman, a Ehi, a Rus, a Mupim, a Hupim m'ei Art. 22Arki laha arnal lman iv'a ha avv'i a natn a Retsel ilav'i asn a Sikup.

23A natn a Tan iv'i a Husim. 24A natn a Navtali avv'i a Sasel, a Kuni, a Seser m'ei a Silem. 25Arki laha avsaru ha avv'i a natn a Pilha, la ilav'r asn a Sikup ha. Hin a Pilha iv'i vitar na m'akarien la a Lapan itau an a natn tav'et iv'i a Retsel ha.

26M'ertu udlani la avsapei a Sikup kavrav'a a Itsip ha, kavv'i a natn inellm'sei pln ilm'sei (66). Arna ki laha ahaspanr a naur a natn a Sikup. 27#Parei 7:14.Laha, a natn a Susev', la ariak arna nut a Itsip ha, arv'i dui arru. Nelnal udlani arna nl nam'elan a Sikup, la avrav'a arna nut a Itsip ha, avnelsaru (70).

A Sikup ilak a Kusen

28Sarei, itap'ei a Suta itauamu asn a Susev' a ti ipav'iv'en navanel ipav'a a Kusen anr. Sarei, avrama arna nut a Kusen. 29Laha, a Susev' iendedp' katan kadav'a eia arna nut a Kusen a ti ipalei a tetian, iv'i a Isrel. Laha, iv'iv'en hin ani karav'dei kavalau ip'arei.

30Sarei, a Isrel ivr an a Susev' kavr ti a, “Hilaha nrndu ti p'am'a, sena ti ntla sera nahm, karndu ti nakm kdsilv' uam.”

31Sarei, a Susev' ivr anr tv'aln m'er nl nam'elan a tetian kavr ti a, “Kana p'av'a eia kavr an a Veru kavr ti a, ‘Artv'alk m'er nl nam'elan a tetiak, la avlak arna nut a Kenan ha, atvrama sarei asnk. 32Laha, dui nen avv'i ardu avp'aur sivsiv, sena ti iv'i pariar a ti avmsnen si slm, kavuirma sivsiv m'a pluk, m'a siar udlani.’ 33Dav'a, naran a Veru ipav'ara a kam'i kavr ti a, ‘?Kvan parei v'ata?’ 34Kam'i pavvr ti a, ‘Kam'em' la nvv'i m'ertu na pariam ha, nvp'aur si slm, naran nvv'i malakal dav'a ier hilaha. Kam'em' m'er a tetiam'em' nvnap'i lera.’ Ipanap'i lera hin ipam'ahu a ti pavlak arna nut a Kusen. Sena ti ardu a Itsip avlep'lar ardu avp'aur si slm.”

Currently Selected:

Ap'u 46: nmb

Highlight

Copy

Compare