Ap'u 45

A Susev' iv'iv'en hin anr tv'aln

1 # Parei 7:13. V'eti a Susev' ikauadadr nln ml arna nahr dui avp'tirtalu ani kav'ara eia, kavr ti a, “Pavani ti nelnal udlani apavruh arna nahk.” Laha, dui kinkin iap'tirtalu naran a Susev' ivrp'ep'a hin anr tv'aln. 2Kavalau lil eia, laha ardu a Itsip avrni, m'er arm'ertu avlak al nmahan a Veru.

3Sarei, a Susev' ivr anr tv'aln kavr ti a, “Kana nv'i a Susev'. ?A tetiak idsilv' uam?” V'eti artv'aln akavvrprani, sena ti avrdus nlr ani. 4Laha, a Susev' ivr anr tv'aln, kavr ti a, “Nvrdaui, pavmima asnk.” Laha, avrama asnn. Sarei, ivr ti a, “Kana nv'i a Susev' kav'i tv'elm'i, la kvulul ani iv'a a Itsip ha. 5V'eti hilaha mavrn istu ml, v'aha nlm'i imahrer a kam'i ml, sena ti kvulul a kana nma atlaha. Sena ti Atua itep'a kana ntauamu a kam'i arna ti p'euada silv'ienar m'ertu. 6Sena ti m'em'erien itater sarei pai iru, v'eti pai ilm' iter uam a ti akavukl nadep', akavhl sei. 7V'eti Atua itep'a kana ntauamu a kam'i a ti p'ep'aur a netm'i arna nadep', kani ti kam'i m'er a netm'i udlani pavsilv' sena pari lilan. 8V'eti iav'i kam'i kvtep'a kana nma atlaha, v'eti iv'i Atua. Laha, Hin iani ti nnap'ei a tetian a Veru kav'i mlina nmahan udlani m'a mlin arna v'anu udlani a Itsip.

9 # Parei 7:14. Pavrakn kavrav'a asn a tetiak kavvr ani kavvr ti a, ‘A natm, iv'i a Susev', ivri inap'i laha, “Atua iani ti nv'i mlin arna nut udlani a Itsip. Pama auei karakn dama asnk. 10Nakm palak arna nut a Kusen, kalak mima asnk. Nakm m'er a natm m'er a m'hip'am udlani, m'a sivsivam udlani, plukam udlani, m'a siam udlani. 11Laha, arna nut lera p'ep'aurh. Sena ti pai na m'em'erien arlm' idater uam. Imahei ti nakm, m'er nelnal al nmaham, siam udlani ikahei ml.” ’

12Laha, pavlei, kam'i udlani m'a tv'alk dau, iv'i a P'ensamin, kvlei a m'etam'i ti kana nv'ana m'a kam'i a navak uaki. 13Hilaha pavvr an a tetiak nut nlil inap'ei arna nut a Itsip, m'a si udlani ktvla sarei, kavrakn kavuirma ipama atlaha.”

14Sarei, iv'a karav'da tv'aln iv'i a P'ensamin arna natavnan katakal. Laha, a P'ensamin irav'dei arna natavnan katakal. 15Sarei, irav'r tv'aln udlani katakal m'er. Sarei, artv'aln avv'ana m'ei.

16Laha, arn v'nen al nmahan a Veru, ivr ti a, “Tv'aln a Susev' avrama.” Laha, a Veru m'er m'ertuan avrn ip'as. 17Sarei, a Veru ivr an a Susev' kavr ti a, “Pavr anr tv'alm', ‘Pavan si laha. Pavtu tim'ah arna tukiam'i kavv'el kavrav'a arna nut a Kenan. 18Pavlev' a tetiam'i m'er nl nam'elam'i udlani kavrama asnk. P'etu nadep' a kam'i ip'as kasiv' nadep' udlani a Itsip. Laha, pavhan navan ip'as kasiv' nava pitvet udlani. 19Ntu v'nen a kam'i. Pavan si laha. Pavlev' kat dan a Itsip sanar a netm'i m'er a naum'i kavuirma a tetiam'i kavrama atlaha. 20V'eti mavv'ahur siam'i, sena ti si p'sp'as udlani arna nut a Itsip iv'i nkam'i.’ ”

21Sarei, a natn a Sikup avani inap'i lera. Laha, a Susev' itu kat anr inep'a nut a Veru itu v'nen inap'ei, katu tim'ah apavhani arna navanel. 22Itu klus anr udlani p'sev', v'eti itu nav'et inelnal iv'atl (300) m'a klus ilm' ml an a P'ensamin. 23Katep'a tuki arnal avrav'a asn a tetian, kavua si p'sp'asan a Itsip, m'a prapar na tuki ml arnal avua uit, p'ret m'a tim'ah ml la hir asn a tetian apavhani arna navanel ha. 24Laha, itap'er tv'aln avv'el, kavr anr kavr ti a, “Mavrn istu arna navanel.”

25Sarei, avln nut a Itsip kavrav'a eia asn a tetiar, iv'i a Sikup, arna nut a Kenan. 26Kavvr ani kavvr ti a, “A Susev' idsilv' uam, kav'i kavman arna nut a Itsip udlani.” Avvri, laha a Sikup irdus nln katah, sena ti iav'ah v'nenar. 27Laha, avvr si udlani a Susev' ivr anr ani. Sarei, naran ila kat udlani a Susev' itap'ei a ti apavlav'i, nln a Sikup, iv'i a tetiar, ima kap'as ml. 28Sarei, a Isrel ivr ti a, “Ima ra. A natk, a Susev' idsilv' uam. P'av'a kalei ipatauamu, sarei kadam'a.”

Currently Selected:

Ap'u 45: nmb

Highlight

Copy

Compare