Ap'u 44

Panikinan a Susev'

1Laha, a Susev' itu v'nen a dui ip'aur nmahan kavr ti a, “Panen natenar ardu laha ipalini a tim'ah ipaviviln a nki avrndu ti apavuei, katu nav'etar al pn natenar udlani. 2Katu panikinak ml, iv'i nki avani a silva, al pn natena titiatah, m'a nav'etan na uit.” Laha, iani inep'a nut ivri inap'ei. 3M'etav'aran nrnren, avtap'er ardu lahara avrahum'alet ml, hir m'er tukiar. 4Naran atvln sera v'anu lil kavv'el ip'hp'h pa, hin a Susev' ivr a dui ip'aur nmahan kavr ti a, “Pap'tir kasapar ardu lera. Sarei, naran paiarr, pamiman anr, kavr ti a, ‘?Inap'i hin kvtum'alet si stu a si p'as? 5?Kaavrndu ti panikin iv'i nki a mlinak im'nm'n a nln, kav'i nki irndu sei aranan? Kvan si stu naran kvan si lera.’ ”

6Sarei, iarr arna navanel kavr v'nen lera anr. 7Laha, avvr ani kavvr ti a, “?Mlinak, inap'i hin kvr v'nen lera? Imahei ti m'ertuam apavan si stu ipanap'i lera. 8Palei, nvuim'alet dan a Kenan nav'et lahara nvlei al pn natenam'em'. ?Inap'i hin ml p'vv'nah silva v'aha kul al nmahan a mlinam? 9Ipavr ti papaslei asn kam'em' kinkin ipamk, parpep'ni, katu kam'em' p'vv'i m'ertu na m'akarienan a mlinak.”

10Laha, ivr ti a, “Aau, ipanep'a nut kvvri inap'ei. Dui apapasla panikinak asnn, hin ipav'i dui na m'akarienak, v'eti akav'ana hua m'a kam'i sena si stu kinkin.” 11Ilalahml sarei avkasr natenar arna nadep', hir udlani aviela natenar. 12Laha, iklau mamh, itauamu arna titiamu kahiris arna titiatah, dav'a kapasla panikin al natenan a P'ensamin. 13Sarei, aviapapr klusar, laha hir udlani p'sev' avtum'alet a natenar arna tukiar kavm'alet ml arna v'anu lil.

14Laha, a Suta m'er tv'aln avrama al nmahan a Susev'. Hin iliak uam. Sarei, avsisihpu a nadep' asnn. 15Laha, a Susev' ivr anr kavr ti a, “?Kvan v'ata? ?Kaavrndu ti dui lil ipanep'a kana nviak a navanel a ti p'vrndu sei itu hin?”

16Laha, a Suta ivr ti a, “?P'vvr v'ata anh, mlinak? ?P'vvrm'alet a v'nen v'ata ml anh? ?P'van v'ata kavviviln arna nahm? Atua itpasla sera si stuam'em' la nvv'i dui na m'akarienam ha. Kam'em' hilaha nvv'i dui na m'akarienan a mlinak, kam'em' m'a dui atpasla sera panikinam asnn.”

17V'eti hin ivr ti a, “Imahei. Nkahani iknap'i lera. Dui asnm'i la iua panikinak ha, hin uaki iamk ipav'i dui na pariak. V'eti kam'i udlani pavrav'a eia ml asn a tetiam'i arna tamat.”

18Sarei, a Suta imima asnn kavr ti a, “U mlinak, nmiman anh, pam'ahu a kana, nv'i dui na m'akarienam, a ti p'evr si ipamk anh. Nlm imahrer a kana, nv'i dui na m'akarienam, sena ti nakm klil kanep'a sarei a Veru. 19Nakm, kv'i mlinam'em', kmiman a kam'em', nvv'i ardu na m'akarienam, kavr ti a, ‘?Kam'i a tetiam'i v'aha tv'elm'i kinkin iak asnm'i?’ 20Laha, nvvr anh, kv'i mlinam'em', kavvr ti a, ‘Kam'em' a tetiam'em', iv'i dui tarep' iliak m'ei a natn, la iak asnn naran hin ittrtarep' dau ha. Hin iv'i malakal uam. Tv'aln itam'a sarei. Asnr a natn a unian, hin uaki iamk idsilv' uam. Laha, a tetian ilap'as ani istudau.’ 21Laha, kvr a kam'em', nvv'i dui na m'akarienam, kavr ti a, ‘Pauirma hin auei ipama asnk, a ti p'elei.’ 22V'eti kam'em' nvvr anh, kv'i mlinam'em', kavvr ti a, ‘Malakal lera ikaln a tetian. Idvr ti idlni, a tetian idam'a.’ 23V'eti nakm kvr a kam'em', nvv'i dui na m'akarienam, kavr ti a, ‘Ipavr ti titiatah nam'i ikasapa kam'i kadama auei atlaha, mkavla nahk ml.’

24Dav'a, naran nvrav'a eia ml asn a tetiam'em', iv'i dui na m'akarienam, nvvr v'nen ani, la nakm, kv'i a mlinam'em', kvr a kam'em' hara. 25V'eti a tetiam'em' ivr ti a, ‘Pavm'alet ml kavul tim'ah nad ipasusupa.’ 26V'eti kam'em' nvvr ti a, ‘Nkavrav'a auei ipavr ti titiatah nam'em' ikasapa kam'em'. P'vv'el uaki ipavr ti titiatah nam'em' ipasapa kam'em'. Sena ti nkavla nah dui lahara, idvr ti titiatah nam'em' ikasapa kam'em'.’ 27Sarei, a tetiak, iv'i dui na m'akarienam, ivr a kam'em' kavr ti a, ‘Kvrndu ti a nauk ilev' dui pa iru asnk. 28Laha, nki iamk iln kana, kani ti nvr ti a, “Nvrdaui, si dm kinkin iatpapr sarei.” Laha, nalei ml dav'a ier dika. 29V'eti ipavr ti pavlev'la ki laha ml asnk, laha ti der ipaiari, kam'i pavani ti kana, la nilk iuvuvar ha, p'ern istu ipastudau dav'a kadam'a.’

30V'eti hilaha, ipavr ti p'em'alet ml asn a tetiak, iv'i dui na m'akarienam, hin ipam'a, naran ipala ti malakal iasapa kam'em', sena ti silv'ienan iterp'lt m'a silv'iena malakal lahara. 31Laha, kam'em', la nvv'i dui na m'akarienam ha, p'vani ti a tetiam'em', iv'i dui na m'akarienam, la niln iuvuvar ha, iparn istu ipastudau dav'a kadam'a. 32Sena ti kana, nv'i dui na m'akarienam, nturan asn a tetiak, sena malakal nen, kavr ti a, ‘Ipavr ti nauim'alet ml asnm, ipav'i si stuak arna nahn a tetiak dav'a ikahiris naran.’ 33Sena si lera nmiman anh, pam'ahu a ti kana p'eua m'lna malakal laha kalak kav'i dui na pariam, la kv'i a mlinak ha, kam'ahu a ti malakal nen ipav'a eia m'er tv'aln. 34?Sena ti kana p'av'a eia asn a tetiak ipanap'i, ipavr ti malakal laha ikasapa kana? Imahei ti p'ela der ipama aranan a tetiak.”

Currently Selected:

Ap'u 44: nmb

Highlight

Copy

Compare