Ap'u 43

Artv'aln a Susev' avm'alet m'ei a P'ensamin

1V'eti m'em'erien ilil arna nadep'. 2Dav'a ti naran atvhan sera uit udlani la avuei dan a Itsip ha, a tetiar ivr anr kavr ti a, “Pavm'alet ml kavul tim'ah pa kinkin.”

3V'eti a Suta ivrprani, kavr ti a, “Dui nen iv'ana hua m'a kam'em' kavr ti a, ‘Mkavla nahk, ipavr ti mkavrama m'a titiatah nam'i.’ 4Ipavr ti patep'a titiatah nam'em' ipasapa kam'em', p'vrav'a eia kavul tim'ah nam. 5V'eti ipavr ti mkatap'ei, kam'em' nkavrav'a eia, sena ti dui lera ivr a kam'em' kavr ti a, ‘Mkavla nahk, ipavr ti mkavrama m'a titiatah nam'i.’ ”

6Laha, a Isrel ivr ti a, “?Inap'i hin kvutakm a kana, kavvrp'ep'ei a dui nen kavvr ti titiatah nam'i iak?”

7Laha, avvr ani kavvr ti a, “Dui nen imimani ihua a kam'em', kavrur kam'em' m'a nl nam'elad, kavr ti a, ‘?A tetiam'i idsilv' uam? ?Kam'i tv'elm'i uraur iak?’ Laha, nvvrprani sena ti imimani. ?P'vrndaui ipanap'i a ti ipamimani kavr ti p'vuirv'a titiatah nam'em' auei?”

8Sarei, a Suta ivr an a tetian, iv'i a Isrel, kavr ti a, “Patep'a malakal ipasapa kana. Laha, p'vp'tir kavv'el, a ti p'vsilv'. Imahei ti nakm, kam'em' m'er a netm'em' udlani p'vram'a. 9Pataui arna lm'ak, kana p'ep'auri, pamimani ml asnk. Ipavr ti nkauirma ml asnm ipap'tir arna nahm, ipav'i si stuak arna nahm ikahiris naran. 10Idvr ti m'avkanut, hilaha ndvm'alet idv'aru ra.”

11Sarei, a tetiar, a Isrel, ivr anr kavr ti a, “Ipavr ti ipanap'i lera pr, pavan si lera. Pavlev' nava p'as na nadep' atlaha kavtaui al natenam'i kavuirv'a kavtau a dui nen. Ipav'i pumat p'as kinkin, ns sukapak kinkin, ru nai kinkin m'in p'as iak, ueil m'in ip'as iv'i mir, pistas, m'a ianei. 12Pavlev' nav'et uraur ml, kavlev'm'alet a nav'et kvuirma ml al pn natenam'i, nsarei avvnapn ani uaki. 13Kavlev' titiatah nam'i m'a kam'i, kavp'tir kavv'el kavm'alet ml asn dui nen. 14Laha, nrn ti Atua Na Nut Hua Udlani, ipani ti dui nen iparn ipap'as a kam'i, kam'ahu a ti tv'elm'i uraur ipamam'alet ml m'ei a P'ensamin. Ipavr ti a natk ipahiris udlani asnk, ipahiris.”

15Sarei, ardu nen avlev' sei apavtuvn ani kavlev' nav'et inap'amk iv'aru kavp'tir kavrav'a eia a Itsip m'ei a P'ensamin kavp'tir arna nahn a Susev'. 16Naran a Susev' ila ti avrama m'ei a P'ensamin ivr a m'ertu ip'aur nmahan, “Palav'r ardu laha apavrama a utak, kavrp si slm kavandedp'i a ti p'vhani, sena ti ardu lera apavhatat m'a kana lihalm'au.” 17Sarei, dui nen iani inep'a nut a Susev' ivri inap'ei, sarei kalav'r ardu nen kavrav'a eiman a Susev'.

18Laha, ardu nen avdedrn sena ti avlav'r avrav'a al nmahan a Susev', kavvr ti a, “Si lera iv'i sena nav'et la nvuam'alet ml al natenad itauamu. Hin ilev' nakd a ti p'vrama eiman a ti apavrndu ti apavuada nakd kavlev' nakd kani ti p'vv'i m'ertu na parian, kavlev' tukiad.”

19Naran avla dui ip'aur nmahan a Susev', avv'ana m'ei asn pn liu na nmah, 20kavvr ti a, “Mlin, kam'em' nvrama itauamu tituei a ti p'vul tim'ah. 21V'eti dav'a, naran nvier nmaha v'anudl, kaviela natenam'em', kam'em' udlani p'sev' nvla uliena tim'ah iter udlani al pn natenam'em' ml. Hin nvuim'alet ml asnm ha. 22Laha, nvuirma nav'et ml al lm'am'em', a ti p'vul tim'ah ml. Navrndu m'ertu nen itum'alet a nav'et al natenam'em'.”

23V'eti ivr ti a, “Nlm'i imahms, mavdedrn. Atuam'i, kav'i Atuan a tetiam'i, ittu sera si p'sp'as al natenam'i. Kana ntlev' sera nav'etam'i.” Sarei, ilev' a Simiun iv'a av'aran asnr.

24Laha, dui nen ilav'r avrav'a al nmahan a Susev' katu nauei anr. Sarei, avsila tlr. Laha, imsnen tukiar. 25Sarei, avandedp' sei apavtuvn an a Susev' naran ipama lihalm'au, avrn v'nen ti apavhatat asnn.

26Sarei, naran a Susev' ima a utan, avlev' sei al lm'ar, la apavtuvn ani ha, kavuirv'a eim asnn, kavsisihpu a nadep' arna nahn. 27Sarei, imiman anr kavr ti hir avlak p'as v'aha ihei, kavr ti a, “?A tetiam'i ip'as, dui tarep' la kvvruri hara, isilv' uam?”

28Laha, avvrprani kavvr ti a, “A tetiam'em', iv'i dui na pariam, hin ihua kasilv' uam.” Laha, aviaul kavsisihpu asnn.

29Sarei, a Susev' ila tv'aln, iv'i a P'ensamin, a natn a unian, kavr anr kavr ti a, “?Aulera iv'i titiatah dau nam'i lahara kvvruri hara?” Kavr ti a, “Natk, nrn ti Atua ipamhmah anh.” 30Laha, a Susev' irakn a ti ipapasla nut ipavalau, sena ti nln ilini a tklien sena tv'aln. Laha, kadav'a eiman kavalau atlera. 31Sarei, kasila nahn kadama av'aran kauada nln kavr ti a, “Pavuirma tim'ah.”

32Laha, avtu tim'ah an a Susev', hin iamk p'sev', kavtau anr tv'aln udlani arna nut uraur. Ardu a Itsip, la avhatat m'ei ha, avtau anr arna nut uraur ml, sena ti ardu a Itsip akavhatat m'er ardu a Isrel, sena ti iv'i sei avlep'lei. 33Laha, avani ti tv'aln a Susev' avlak arna nut iviviln a paiar. Titiamu itauamu, titiatah itauatah. Laha, avkluklau hir. 34Sarei, ilev' tim'ah katau anr, v'eti nan a P'ensamin avtaui iv'alm' arna nar tv'aln. Laha, avan tim'ah m'ei a Susev' kavm'n nauei kavrn ip'as.

Currently Selected:

Ap'u 43: nmb

Highlight

Copy

Compare