Avruh 39
39
Avan klus a ti arpris apavuei nakl
(Avruh 28:1-43)
1Sarei, avlev' tret iplu, kam'ielm't, kam'iel, kan klus na parei p'as sanan a Erun, a ti ipan parei al nutet. Apavv'i klus p'sp'as, inep'a nut a Mlin Eia itvr sarei an a Musis inap'ei.
2Laha, a Pesalil ien sat iv'i ivut m'a tret iv'i kul, m'a nki iplu, m'a nki im'ielm't, m'a nki im'iel, m'a kalik p'as. 3Avlev' kul, kavthi m'a ama nakl, katri isusupa, avani ima kanep'a uaia, a ti apavv'ati m'a tret iplu, kam'ielm't, kam'iel, m'a kalik p'as. Avm'akar aranan ip'eset. 4Avlilai kalik iru a ti apartukar natavnan, kavani ti arp'lt mamh a nut iamk, tv'eliel iamk ip'lt m'a tv'eliel uraur. 5Sarei, avv'et sitrav iamk m'a kalik p'as arna ivut lera. Avani m'a tret iv'i kul, m'a nki iplu, m'a nki im'ielm't, m'a nki im'iel, m'a kalik p'as av'ati, inep'a nut a Mlin Eia itvr sarei an a Musis inap'ei.
6Sarei, avlev' nav'et p'as iv'i uniks, kulul a nahar a natr Isrel aranar, inep'a nut aulul a sei arna rin nakl, kavtukar nav'et p'as lera m'a kul. 7Sarei, a Pesalil itaur arna natavna sat iv'i ivut lahara, a ti aparv'i v'nen sanar arm'ertu a Isrel, inep'a nut a Mlin Eia itvr sarei an a Musis inap'ei.
8Sarei, ien sat na v'nen hua. Iani ip'eset, inep'a nut ien sat iv'i ivut inap'ei. Iani m'a tret iv'i kul, m'a nki iplu, m'a nki im'ielm't, m'a nki im'iel, m'a kalik p'as av'ati. 9Avtup'ltani dav'a ti tv'eliel nen iv'a avtinei inap'amk. Naran avtinei, ip'arei kav'i sentimita inal lman ilm' (15). Tv'eliel ier tv'eliel iv'i sentimita inal lman ilm' (15).
10Sarei, avtu mamh nav'et p'sp'as aranan, avspsapa hir nakl. Avlev' nav'et p'sp'as avv'i satias, m'a tupas, m'a emral, ki laha avv'i nav'et p'sp'as avtauamu. 11Arki avv'i tv'alr avv'i nav'et p'as iamk avr ti iv'i terkuis, m'a nki iamk nahan iv'i savaia, m'a taiman. 12Nitlen avv'i nav'et p'sp'as nahar avv'i sesin, m'a akat, m'a ametis. 13Niv'a nen avv'i perel, m'a uniks, m'a sasper. Avtukar nav'et p'sp'as udlani lera m'a kul.
14Sarei, avulul a nahar a natn a Isrel arna nav'et p'as lera, nahar inal lman iru (12), inep'a nut aulul a sei arna rin nakl. Avtu naha nki iamk arna nav'et p'as iamk, kasapar nl nam'el inal lman iru (12). 15Sarei, avan neiau a ti aparuada sat na v'nen hua, arna pnen, arnep'a nahau na kul p'as. 16Sarei, avan rin iru m'a si papa nakl ani a kul, kavtu rin iru lera arna pna sat na v'nen hua iru. 17Sarei, avlev' neiau iru avani m'a kul p'as, arnep'a nahau av'ri ip'eset, kavtaur aruada mamh rin iru arna pna sat na v'nen hua. 18Sarei, tv'eliel uraur na neiau iru lera, avani ti avuada mamh si papa ani a kul lahara, sarei, avtaur arna natavna sat iv'i ivut, arna nahn.
19Sarei, avan rin iru m'a kul, kataur arna tv'eliel m'a tv'eliel na sat na v'nen hua, arna tv'eliel dau nen, la iter arna m'er na sat iv'i ivut lahara. 20Sarei, avan rin iru uraur ml, kataur a nv' ivut lera, arna nut iv'a arna nah m'ertu, arna nut alilai ani, asn sitrav avani m'a kalik p'as arna ivut. 21Sarei, avhuda sat na v'nen hua m'a rin nakl arp'lt m'a rin na sat iv'i ivut. Avani m'a tret p'as iplu. Avhudei eia na sitrav aani a kalik p'as, a ti sat na v'nen hua ipap'lt mamh m'a sat iv'i ivut, inep'a nut a Mlin Eia itvr sarei an a Musis inap'ei.
22Sarei, a Pesalil ien klus p'arei ip'lt m'a sat iv'i ivut m'a tret p'as av'ati, tret lera iplu. 23Avtri a p't nut nen, a ti pt m'ertu iuei ipav'a a nln. Inap'i lera, inep'a sat aani a aian. Avlilai ani ip'as, avani ti ihua, a ti akaiapri. 24Arna nut auei na klus p'arei, asn nut atvlilai ani, avtu paplimus pa, avplu, kavm'ielm't, kavm'iel. 25Sarei, avtu pel (la drln iak ha) avani a kul a p't nut nar paplimus udlani la avrater a nut auei na klus p'arei ha. 26Inap'i lera, avtaur inap'i laha: paplimus iamk, sarei pel iamk, sarei paplimus iamk ml, sarei pel iamk ml, kavsapa nut avlilai ani, kavhiris ani. Klus p'arei lera iv'i klus a Erun ipauei kapatei Atua, inep'a nut a Mlin Eia itvr sarei an a Musis inap'ei.
27Sarei, avan sat na m'la, kavv'ati ip'eset, sanan a Erun m'er a natn, 28kavan manau m'a kalik ip'eset, m'a manu p'as uraur avani m'a kalik p'as, m'a trasis avani m'a kalik p'as. 29Sarei, avv'et sitrav iamk m'a kalik p'as kavani m'a tret iv'i kul, m'a nki iplu, m'a nki im'ielm't, m'a nki im'iel, m'a kalik p'as av'ati, inep'a nut a Mlin Eia itvr sarei an a Musis inap'ei.
30Sarei, avan si iamk iv'i sei atu v'nen ivrp'ep'a sei aranan. Avani m'a kul. Sarei, avulul a si laha aranan, inep'a nut aulul a sei arna rin nakl: SI P'SP'AS IV'A ASN A MLIN EIA. 31Sarei, avlev' nahau iplu, kahaui arna manuan a Erun, arna nah manau lera, inep'a nut a Mlin Eia itvr sarei an a Musis inap'ei.
Avhiris a si udlani sena Nmah Kanuis na Tamatan Atua
(Avruh 35:10-19)
32Inap'i lera, avhiris a parei a ti apavan nmah kanuis na tamatan Atua. Arm'ertu a Isrel avan si udlani a Mlin Eia itvr sarei an a Musis a ti apavani. 33Laha, avuirma si udlani asn a Musis. Avuirma nmah kanuis na tamatan Atua, m'a nmah nen m'a sei itukari nakl, m'a rin na kul a ti apavuada kalik p'arei udlani, m'a nakal, m'a nai p'arei sena nakal, m'a nakal p'arei, m'a sei adren nai a nln, 34m'a nila p'ak pua na sivsiv la avtu kala aranan a ti im'iel ha, m'a nila p'ak sikau lahara, m'a kalik p'arei itukar nutet, 35m'a pukiset na turanienan Atua, m'a nai aparmani m'ei, m'a napl na vtmien, 36m'a tiv' na nahn Atua, m'a nai aparmani m'ei, m'a si udlani auadei a ti apam'akar m'ei. 37Avuirma lait aani a kul p'as, m'a nap' nen (al dis papa, la avtu mamahr ha), m'a si udlani auadei a ti apam'akar m'ei, m'a ueil sanan.
38Sarei ml, avuirma tiv' na sida p'as aali (la avani a kul ha), m'a ueil la apavisani arna m'ertu ha, m'a sida p'as nen, m'a kalik p'arei ip'eset iv'i liu na nmah kanuis na tamatan Atua, 39m'a tiv' na si slm aali katau an Atua (la avani a aian v'il ha), m'a si lahara apatu nap' a sei aranan, la iv'i aian v'il kanep'a nit na tilau ha. Avuirma nai aparmani m'ei, m'a si udlani auadei a ti apam'akar m'ei, m'a dis lil, m'a tlr nakl, 40kavuirma kalik p'arei p'as sena nut m'ertu apavp'tir nakl, m'a nakal nen, m'a sei adren nai a nln, m'a kalik p'arei ipav'i liu na nut lera, m'a nahau nen, m'a nil a ti apavuada mamh nahau, m'a si udlani auadei a ti apam'akar m'ei al nmah kanuis na tamatan Atua, la iv'i nmah kanuis arm'ertu avp'lt nakl a nln ha. 41Sarei ml, avuirma klus m'ertu apavuei naran apavm'akar al nutet, m'a klus p'sp'as sanan a Erun iv'i pris, m'a klusan a natn dui, a ti apavpatei Atua arna parei na pris.
42Arm'ertu a Isrel avhiris a parei udlani, inep'a nut a Mlin Eia itvr sarei an a Musis inap'ei. 43Laha, a Musis ip'a si udlani avani, kala ti atvani inep'a nut a Mlin Eia itvr sarei anr inap'ei. Laha, a Musis imhmah anr.
Currently Selected:
Avruh 39: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
