Avruh 40

Avhl Nmah Kanuis na Tamatan Atua

1Laha, a Mlin Eia ivr an a Musis, kavr ti a, 2“Arna napn itauamu na nal itauamu, pahl nmah kanuis na tamatan Atua (la iv'i nkar arm'ertu udlani ha). 3Patu pukiset na turanien a nln, katukar pukiset m'a kalik p'as. 4Pauirma tiv' na nahn Atua, katu mamh si udlani apatau aranan, kauirma lait avani a kul, kani ti nap' ipav'en al dis papa. 5Pauirma tiv' na sida p'as aali (la avani a kul ha), kataui ipamima asn pukiset na turanien, katu mamh kalik p'arei la iv'i liu na nmah kanuis na tamatan Atua ha. 6Sarei, patu tiv' na si slm aali katau an Atua asn liu na nmah kanuis na tamatan Atua (la iv'i nkar arm'ertu udlani ha). 7Sarei, patu dis lil a p't nut na nmah kanuis na tamatan Atua m'a tiv' na si slm aali katau an Atua, katu nauei a nln. 8Sarei, pahl nut av'aran na nmah kanuis na tamatan Atua, kani ti kalik p'arei ipalal kav'i liu na nut av'aran na nmah kanuis.

9Palev' ueil p'as avisani arna m'ertu, kavisani arna nmah kanuis na tamatan Atua, m'er si udlani iter a nln, a ti ipama kav'i si p'as, m'er si udlani auei a ti apam'akar m'ei nakl, apavv'i si p'sp'as. 10Sarei, pavisen ueil lera arna tiv' na sakrivais, m'a si udlani auei a ti apam'akar m'ei nakl. Ipanap'i lera, pani ti iv'i si p'as iamk, ipav'i tiv' na sakrivais kav'i sei ip'eset asn Atua. 11Sarei, pavisen ueil arna dis lil m'a tln, ipav'i si p'as asn Atua.

12Sarei, pani ti a Erun m'er a natn apavmima asn liu na nmah kanuis na tamatan Atua, kasilar m'a nauei. 13Sarei, patu klus p'sp'as aranan a Erun, kavisen ueil aranan, a ti ipama kap'as, a ti ipapata Kana arna parei na pris. 14Sarei, pauirmar a natn, katu klus p'arei aranar. 15Pavisen ueil aranar, inep'a nut kvisen ueil aranan a tetiar inap'ei, a ti apavpata Kana arna parei na pris. Naran kvisen ueil lera aranar, ipav'i si iamk ipap'tir dav'a ikahiris naran, ipaier a natr la apavtauatah anr ha, la apavsilv' uam ha.”

16A Musis iani inap'i lera, inep'a nut a Mlin Eia itvr sarei ani inap'ei, iani pr.

17Laha, itu hin, arna napn itauamu na nal itauamu, arna pai atahan, ihl nmah kanuis na tamatan Atua. 18A Musis ihl nmah kanuis, katu mamh sei adren nai a nln, kahl nakal, katu nai p'arei la avuada nakal ha, kahl nakal p'arei uraur ml. 19Sarei, a Musis itu mamh kanuis a ti ipav'i drl nmah kanuis, sarei katu sei la apavtavkar nmah kanuis ha, inep'a nut a Mlin Eia itvr sarei ani inap'ei. 20Sarei, ilav'r nav'et la turanienan Atua iter aranan ha, kataur a nl pukiset na turanien, katu mamh nai p'arei a ti aparman pukiset m'ei, katu napl na vtmien arna pukiset. 21Sarei, ilev' pukiset na turanien kauirma eim al nmah kanuis na tamatan Atua, katu mamh kalik p'arei a ti ipatukari, katukar pukiset na turanien, inep'a nut a Mlin Eia itvr sarei an a Musis inap'ei.

22Sarei, ilev' tiv' kataui al nmah kanuis, arna tv'eliel na nmah kanuis na tamatan Atua, nki iv'a arna Nut, v'eti av'aran na kalik p'arei itukar Nutet na Nutet. 23Sarei, itu mamh p'ret arna tiv', inep'a nut a Mlin Eia itvr sarei an a Musis inap'ei. 24Sarei, ilev' lait avani a kul kataui al nmah kanuis, arna tv'eliel na nmah kanuis na tamatan Atua, nki iv'a arna Saut. 25Sarei, ilav'r dis papa kani ti avv'en arna nahn a Mlin Eia, inep'a nut a Mlin Eia itvr sarei an a Musis inap'ei. 26Sarei, ilev' tiv' na sida p'as aali, la avani a kul ha, kataui al nmah kanuis na tamatan Atua, arna nah kalik p'arei itukar Nutet na Nutet.

27Sarei, itu nap' a sida p'as aranan, inep'a nut a Mlin Eia itvr sarei an a Musis. 28Sarei, itu mamh kalik p'arei, iani ti ilal a karliu na nmah kanuis na tamatan Atua. 29Sarei, ilev' tiv' na si slm aali katau an Atua, kataui a karliu na nmah kanuis na tamatan Atua, arna nut arm'ertu avp'lt nakl, kalev' si slm kali katau an Atua, kalev' uvrin iv'i uit kavtau an Atua, inep'a nut a Mlin Eia itvr sarei an a Musis inap'ei. 30Sarei, itu mamh dis lil a p't nut na nmah kanuis na tamatan Atua m'a tiv' na si slm aali katau an Atua, katu nauei a nln, a ti apavav m'ei. 31Laha, a Erun m'er a natn avrama kavsila lm'ar m'a tlr atlera. 32Avani naran avrav'a eim al nmah kanuis na tamatan Atua, kavani ml naran avmima asn tiv' na sakrivais. Avani inep'a nut a Mlin Eia itvr sarei an a Musis inap'ei.

33Ihl nut av'aran na nmah kanuis na tamatan Atua m'a tiv' na si slm aali katau an Atua, kani ti liu na nut av'aran lera ilal mamh. Inap'i lera, a Musis ihiris a parei.

P'knaran iamk itukar Nmah Kanuis na Tamatan Atua

(Nut Kaka 9:15-23)

34 # 1 Armlin 8:10,11; Aisaia 6:4; Esikiel 43:4,5; Rev 15:8. Laha, p'knaran iamk ima katukar nmah kanuis na tamatan Atua. Sarei, nmah kanuis na tamatan Atua ilini a si p'sp'asan a Mlin Eia. 35Laha, a Musis iarndu ti ipav'a eim al nmah kanuis na tamatan Atua, sena ti p'knaran lera iter aranan, ilini a si p'sp'asan a Mlin Eia. 36Inap'i lera, naran p'knaran iv'a eia, iahter ml arna nmah kanuis na tamatan Atua, arm'ertu a Isrel avp'tir kavv'el, kavsapa navanelar nakl. 37V'eti, ipavr ti p'knaran lera iter dei aranan, avlak uaki, ahavv'el. Avlaksrah napn a ti ipav'a eia ml. 38Sena ti p'knaranan a Mlin Eia iter arna nmah kanuis na tamatan Atua naran nut iren, sarei lihat, nap' iluluv'en aranan. Arm'ertu udlani a Isrel avlei nakl, naran avsapa navanelar kavv'el.

Currently Selected:

Avruh 40: nmb

Highlight

Copy

Compare