Avruh 38
38
Avan tiv' na sakrivais
(Avruh 27:1-8)
1Sarei, a Pesalil ien tiv' iamk iv'i tiv' na si slm aali katau an Atua. Iani m'a nai iv'i akeisa. Tv'eliel ier tv'eliel iv'i mita iru m'a pnen. Tv'eliel uraur ier tv'eliel uraur iv'i mita iru m'a pnen. Inap'i lera, tv'eliel ier tv'eliel iru arnap'amk. Sarei, eia ier a nadep' ip'arei kav'i mita iamk m'a pnen. 2Arna kkan arv'a, itu kuman, v'eti iv'i nai iamk uaki. Sarei, itu aian v'il aranan, kahiris ani m'ei. 3Itu nut iamk a nv'n, a ti tih nap' nen ipars aranan. Sarei, ien savel nen, kan dis nen, kan nai la uk nen iak ha, m'a dis apatu ienap' a nln. Si udlani lera iani m'a aian v'il. 4Sarei, ien si iamk apatu nap' a sei aranan, iv'i aian v'il, kanep'a nit na tilau. Sarei, itaui a nv' nut eia na tiv' na si slm aali katau an Atua, a ti ipater a p't nut nen. 5Itu rin arv'a arna tv'eliel udlani, a ti apatu nai p'arei a nlr. 6Sarei, ilev' nai iv'i akeisa, katr nai p'arei, katau aian v'il aranar. 7Sarei, itu nai lera al rin arna tv'eliel arru na tiv' na si slm aali katau an Atua, a ti aparmani.
8 #
Avruh 30:18. Sarei ml, ien dis lil iamk m'a aian v'il, katu tln aranan, avv'i aian v'il. Ilev' aian v'il asnr artav'et la avp'lt kavm'akar a karliu na nmah kanuis na tamatan Atua ha.
Nut av'aran na Nmah Kanuis na Tamatan Atua
(Avruh 27:9-19)
9Sarei, a Pesalil ien nut av'aran na nmah kanuis na tamatan Atua. Iv'et kalik la ip'eset ha, kani ti ilal arna tv'eliel iv'a arna Saut. Ip'arei kaier mita inellm' (50). 10Ien nakal p'arei nen m'a nut adren nai a nln nakl m'a aian v'il arnelru (20). Itu uk arna nakal p'arei lera m'a sei iuadar uk lera arna nakal, v'eti iani m'a silva. 11Sarei ml, arna tv'eliel iv'a arna Nut, itu kalik p'arei ip'arei kaier mita inellm' (50). Nakal p'arei nen arnelru (20), m'a nut adren nai a nlr (la avani a aian v'il ha) arnelru (20). Itu uk arna nakal lera m'a sei iuadar uk lera arna nakal p'arei. Si lera iani m'a silva.
12Sarei, tv'eliel arna Ues inap'i laha. Itu kalik p'arei ip'arei kav'i mita inelru pln ilm' (25). Nakal p'arei nen inal, m'a nut adren nai a nlr nakl arnal. Itu uk arna nakal lera m'a sei iuadar uk lera arna nakal p'arei. Si lera iani m'a silva. 13Itu kalik p'arei arna tv'eliel iv'a arna Is, ip'arei kav'i mita inelru pln ilm' (25). 14Arna tv'eliel iamk na karliu, itu kalik p'arei ml. Tv'eliel ier tv'eliel iv'i mita isaru m'a pnen. Nakal nen artl, m'a nut adren nai a nlr nakl artl. 15Arna tv'eliel uraur, itu kalik p'arei ml. Tv'eliel ier tv'eliel iv'i mita isaru m'a pnen. Nakal p'arei nen artl, m'a nut adren nai a nlr nakl artl. 16Kalik p'arei udlani arna nut av'aran na nmah kanuis na tamatan Atua avanr m'a kalik p'as av'ati. 17Nut adren nai a nlr nakl iani m'a aian v'il. Uk arna nakal p'arei iani m'a silva. Sei iuada uk nakl iani m'a silva. Sarei, iani ti silva imlden nakal na nut av'aran na nmah kanuis na tamatan Atua.
18Sarei, ien liu sena nut av'aran na nmah kanuis na tamatan Atua. Iani m'a kalik p'arei p'as av'ati. Iv'ati m'a tret iplu, kam'ielm't, kam'iel. Ip'arei kaier mita inal. 19Nakal p'arei nen arv'a, m'a nut adren nai a nlr nakl arv'a. Nut adren nai a nlr nakl iani m'a aian v'il. Sei avmlden nakal kavuada uk nakl avv'i silva, m'a uk arna nakal avv'i silva. 20Arnil la avuada mamh nahau na nmah kanuis ha, m'a nut av'aran nen, iani m'a aian v'il.
A Iv'amar ispan si udlani
21Si udlani lera, a Iv'amar, iv'i a natn a Erun iv'i pris, ispani. Ispan si udlani sena nmah kanuis na tamatan Atua, inep'a nut a Musis itvr sarei ani, a ti nl nam'elan a Livai apavan parei a nln. 22Laha, a Pesalil, a natn a Uri, iv'i a natn a Ur, arna nl nam'elan a Suta, ien si udlani a Mlin Eia itvr sarei an a Musis a ti ipani. 23Dui isr lm'an iv'i Ahuliap, a natn Ahisamak, arna nl nam'elan a Tan. Hin iv'i dui irndu mamh ti ipulul a v'nen arna nav'et v'aha nai, kav'ahur mamh navanel a ti apan sei nakl, karndu mamh ti ipav'et kalik p'arei p'as m'a tret iplu, v'aha im'ielm't, v'aha im'iel, sarei kam'akar ip'as m'a kalik p'as.
Kul, m'a silva, m'a aian v'il avuirma sena Nmah Kanuis na Tamatan Atua
24Naran arm'ertu atvuirma sera kul sena parei na nutet, avspani, kavla ti kilu nen iv'i 1,023. Naran avspani, avspan sekel nakl la avvr ti iv'i nav'et na nutet ha. 25#Avruh 30:11-16.Sarei, avspan silva la avlav'i asnr arm'ertu udlani ha. Avspani, kavla ti kilu nen iv'i 3,520. Naran avspan ki lera ml, avspan sekel nakl la avvr ti iv'i nav'et na nutet ha ml. 26#Mat 17:24.Avlev' silva lera, sena ti ardu udlani avuirma nav'et nahan iv'i peka iamk. Peka lera iv'i pna sekel iamk, sekel lera iv'i nki avvr ti iv'i nav'et na nutet hara. Naran avspanr arm'ertu, avspanr ardu uaki paiar itier inelru (20) kadav'a eia. Inap'i lera, avspanr avv'i 603,550. 27A Pesalil ilev' silva lera, avvr ti iv'i talen inelnal iv'amk (100), kan sei adren nai a nlr avnelnal iv'amk (100). Ianr sena nakal na nutet, m'a nakal na kalik p'arei p'as itukar nutet. Inap'i lera, talen na silva iamk ima kav'i sei adren nai a nln nakl. 28Sarei, duana silva iv'i sekel iv'i 1,755. Ilev' nki lera kan uk sanar nakal m'ei, kan sei avmlden nakal kavuada uk nakl m'ei, katu silva arna nakal nakl.
29Sarei, avspan aian v'il la avlav'i asnr arm'ertu udlani ha. Avspani, kavla ti kilu nen iv'i 2,472. 30A Pesalil ilev' aian v'il lera kan nut adren nai a nln nakl sena liu na nmah kanuis na tamatan Atua, kan tiv' na si slm aali katau an Atua, kan si lahara iv'i sei atu nap' a sei aranan, la inep'a nit na tilau hara. Sarei, ien si udlani uraur la auadei a ti apam'akar m'ei ha. 31Sarei ml, ien sei adren nai a nln na nut av'aran na nmah kanuis na tamatan Atua, m'a liu nen, m'a nil udlani la avuada mamh nahau na nmah kanuis ha, m'a nut av'aran nen.
Currently Selected:
Avruh 38: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
