Avruh 37
37
Avan sei apavtaui al Nmah Kanuis na Tamatan Atua
(Avruh 25:10-40; 27:1-8; 30:1-10)
1Sarei, a Pesalil ien pukiset iamk, m'a nai iv'i akeisa. Iani ip'arei kaier mita iamk m'a pnen iv'i sentimita iv'i 25. Tv'eliel ier tv'eliel iv'i sentimita iv'i 75. Eia ier a nadep' ip'arei kav'i sentimita iv'i 75. 2Itu kul p'as aranan, arna nut udlani. Itaui arna p'akn m'ei arna nut a nln. Itu kul inep'a naml pa, imldani. 3Ien rin m'a kul arv'a sanan, kataur arna kkan arv'a. Itu rin iru arna tv'eliel iamk katu rin iru arna tv'eliel uraur. 4Itr nai p'arei nen m'a nai iv'i akeisa, katu kul aranar. 5Sarei, itu nai p'arei nen al rin arna tv'eliel na pukiset, a ti aparmani nakl. 6Sarei ml, ien napl na vtmien m'a kul p'as. Iani ip'arei kaier mita iamk m'a pnen iv'i sentimita iv'i 25. Tv'eliel ier tv'eliel iv'i sentimita iv'i 75. 7Ien ensel nahan iv'i serupim iru. Ianr m'a kul aarpi m'a ama. Itaur a tv'eliel m'a tv'eliel na napl na vtmien. 8Itu serupim iamk arna pnen, katu tv'aln arna pnen uraur. Ien serupim lera, v'eti arp'lt m'a napl na vtmien arna pnen iru. 9Serupim lera arah nil heiar eia a ti apartukar napl na vtmien m'a nil heiar. Nahr serupim arpep'a hir karp'a napl na vtmien.
10Sarei, ien tiv' iamk, kani m'a nai iv'i akeisa. Iani ip'arei kaier mita iamk. Tv'eliel ier tv'eliel iv'i sentimita iv'i 50. Eia ier a nadep' ip'arei kav'i sentimita iv'i 75. 11Itu kul p'as aranan, arna nut udlani, katu kul inep'a naml pa, imldani. 12Sarei, itu dari aranan, v'eti isusupa uaki, tv'eliel ier tv'eliel inep'a lm'a m'ertu uaki. Sarei, itu naml pa aani a kul arna dari lera, imldani. 13Sarei, ien rin aani a kul arv'a sanan, kataur arna tln arv'a, arna kkan arv'a. 14Itu rin arna nut av'aran, a ti apatu nai p'arei nen a ti aparman tiv' m'er. 15Sarei, itr nai p'arei nen m'a nai iv'i akeisa, katu kul aranar. Nai lera avv'i a ti aparman tiv' m'er nakl. 16Ien dis, m'a svun, m'a dis ipatukar sei, m'a putel a ti apatv'en nauei anr. Ien si udlani lera m'a kul p'as.
17Sarei ml, ien lait iamk, kani m'a kul p'as. Iani m'a kul aarpi m'a ama. Nut lil nen, m'a ranan, m'a dis atu nap' a nln, m'a sei inep'a nava nai, m'a plaua nen, ien udlani m'a kul iamk uaki, la ahatrpapri ha. 18Ranan avlm'sei. Itu ranan itl arna tv'eliel iamk, katu ranan itl arna tv'eliel uraur. 19Ien dis pa itl m'a nava nai m'a plaua arna ranan iamk, kan dis pa itl m'a nava nai m'a plaua arna ranan uraur, kani avnep'a ianei. Inap'i lera, ranan avlm'sei avandan al lait lera. 20Itu dis papa arv'a la avnep'a ianei ha arna lait. Navar m'a plauar aviak. 21Itu nava nai iamk a nv' rana nai iru la arnap'amk ha, katu nava nai iamk a nv' rana nai iru la arnap'amk ha, katu nava nai iamk a nv' rana nai iru la arnap'amk ha. Inap'i lera, rana nai avlm'sei avandan al lait. 22Navar m'a ranar avnap'amk. Ien lait udlani m'a kul p'as iamk uaki, aarpi m'a ama. 23Sarei, ien dis papa isaru, kan sei apatr kalik iv'a al ueil, kan dis ipater a nv' ueil. Ianr udlani m'a kul p'as. 24Ilev' kul p'as kilu nen ineltl (30) kan si udlani a kul lera.
25Sarei, ien tiv' na sida p'as aali iamk. Iani m'a nai iv'i akeisa. Ip'arei kav'i sentimita inellm' (50). Sarei, tv'eliel ier tv'eliel iv'i sentimita inellm' (50) ml. Inap'i lera, tv'eliel ier tv'eliel iru arnap'amk. Sarei, eia ier a nadep' ip'arei kav'i mita iamk. Ien kuman, v'eti ianr m'a tiv', inep'a ti iv'i nai iamk uaki. 26Sarei, itu kul p'as aranan, arna nut eia nen, arna tv'eliel nen, m'a kuman. Sarei ml, itu kul inep'a naml pa, imldani. 27Sarei, a nv' naml pa lera, itu rin m'a kul iru arna kkan iru. Itaur arna tv'eliel iru, a ti apavv'i nut apatu nai a nln nakl a ti aparmani. 28Sarei, itr nai p'arei nen, m'a nai iv'i akeisa. Sarei, itu kul aranar.
29 #
Avruh 30:22-38. Sarei ml, ien ueil p'as a ti apavisani arna m'ertu a ti ipan parian Atua, kan sida p'as m'a ru nai m'in ip'as. Ien si lera kasapa navanel m'ertu irndu mamh a ti ipan pumat p'as nakl isapei.
Currently Selected:
Avruh 37: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
