Avruh 32
32
Net pluk a Erun iani m'a kul
(Tv'el V'nen Hua 9:6-29)
1 #
Parei 7:40. Laha, naran arm'ertu avla ti a Musis ikanut, idasiris arna ptha lil, avp'lt a nut iamk kavrama asn a Erun, kavvr ani, kavvr ti a, “Pap'tir, pan atua kinkin sanad, a ti apavtauamu a nakd. A Musis lera, iv'i dui la ilev'la nakd arna v'anu a Itsip ha, navrndu v'ata iani.” 2Laha, a Erun ivr anr, kavr ti a, “Pavlev'la hapir aani a kul la avrater al drlnar a naum'i m'er a natm dui m'er a natm tav'et ha, kavuirma asnk.” 3Sarei, arm'ertu avlev'lar hapir aani a kul la avrater al drlnar ha, kavuirv'a asn a Erun.
4 #
1 Armlin 12:28; Parei 7:41. Sarei, ilev'la kul lera al lm'ar, kam'akar m'ei m'a nap' m'a talei iviviln a aian nakl, sarei iani ti ima kanep'a sera net pluk. Sarei, avvr ti a, “!Si laha iv'i atuam'i, arm'ertu a Isrel, la ilev'la kam'i arna v'anu a Itsip ha!” 5Inap'i lera, naran a Erun ilei, ien nev'etet asnn. Laha, a Erun iv'ana eia, kavr ti a, “M'ih ipav'i tim'ah lil sanan a Mlin Eia.” 6#1 Kurin 10:7.Sarei, m'ih nen, avthal ren kavrp si slm a ti apavali, kavuirv'a sei apavtau an Atua sena tamat. Laha, arm'ertu avlakp'lt a ti apavhatat kavm'nm'n, sarei avp'tir kavduduvah.
7Sarei, a Mlin Eia ivr an a Musis, kavr ti a, “!Pav'el, pav'a auei! Sena ti arm'ertuam la ktlev'la sarar arna v'anu a Itsip ha atvutakm sarei a hir. 8Atvln sera navanel nvr anr a ti apavsapei. Atvan sera net pluk iamk m'a kul sanar, katvpata sarei, katvrp sera si slm kavtau ani, kavvr ti a, ‘!Si laha iv'i atuam'i, arm'ertu a Isrel, la ilev'la kam'i arna v'anu a Itsip ha!’ ” 9Sarei, a Mlin Eia ivr an a Musis, kavr ti a, “!Ntla sarar arm'ertu laha, nrndu ti avv'i pthua dau! 10Inap'i lera, mauada Kana, a ti nl rerak ipama kalil asnr, p'utakm anr a ti akavsilv' ml. V'eti p'ani ti nakm pama kav'i v'anu lil ipamk.”
11 #
Nut Kaka 14:13-19. Sarei, a Musis imimani ihua asn a Mlin Eia iv'i Atuan, kavr ti a, “?Mlin Eia, nl reram ima kalil asnr m'ertuam, la ktlev'la sarar arna v'anu a Itsip m'a nut huam ha, sena v'ata? 12Arm'ertu a Itsip apavvr ti a, ‘Ilev'lar a ti iputakm anr, karpep'nr arna ptha lilil, kahiris anr a ti akavsilv' ml arna nadep' ka.’ ?Nakm pani ipanap'i lera sena v'ata? Pavavh, a ti nl reram ipav'a a nadep'. Parn istu anr arm'ertuam, mautakm anr. 13#Ap'u 22:16,17; 17:8.Mavnapn an a Epraham, Aisak, m'ei a Isrel, la avv'i m'ertu na m'akarienam ha, sena ti ktturan sarei anr m'a naham prki, katvr sarei anr, kavr ti a, ‘Kana p'ani ti a natm apavnelnal ipastudau, ipanep'a sera msi na nut eia. Nadep' udlani, la ntvrur sarei m'ah ha, p'etau an a natm udlani apavtauatah anh, a ti ipav'i nkar, ikahiris naran.’ ” 14Laha, a Mlin Eia irn istu anr m'ertuan, iautakm anr ml.
15Laha, a Musis ivav hin, kav'el kasiris arna ptha, kauada nav'et arru la arv'i v'nen hua ha al lm'an. Naran ala nav'et lera, ala ti aulul a sei arna tv'eliel iru, arna tv'eliel iamk m'a tv'eliel uraur. 16Atua ien nav'et lera. V'nen iter arna nav'et iv'i v'nenan Atua. Atua iulul a sei, kakrisi arna nav'et. 17Laha, naran a Susua iv'rn a drlr arm'ertu naran avv'ara eia, ivr an a Musis, kavr ti a, “Drl naur iendan arna nut arm'ertu avhl nmah kanuis.” 18V'eti ivr ani, kavr ti a, “Drl lera iav'i nkar arm'ertu avmlen hir. Iav'i drlr m'ertu avtakal sena ti m'ertu uraur iutakm anr. Kana nv'rn a drlr m'ertu avhai.” 19Laha, itu hin, iv'amk m'a ti a Musis imima asn nut avhl nmah kanuis, ila net pluk lahara, kala ti arm'ertu avan naval. Sarei, nln a Musis irer istudau, laha isranr nav'et arru ardapapri arna nut auei na ptha lil. 20Sarei, ilev' net pluk la avani ha, katu nap' ani, sarei kani ti idapapri, kassrani al nauei, kani ti arm'ertu a Isrel avm'n nauei lera.
21Laha, a Musis ivr an a Erun, kavr ti a, “?Arm'ertu laha avan v'ata anh, a ti kuirma si stu lil laha aranar?” 22Laha, a Erun ivr ti a, “Mlin, nl reram imahua parndau. Nakm krndaur arm'ertu laha, a ti avrn ti apavan si stu nakl. 23Sena ti avv'ana m'a kana, kavvr ti a, ‘Pan atua sanad, a ti apavtauamu a nakd, sena ti a Musis lera, iv'i dui ilev'la nakd arna v'anu a Itsip, navrndu v'ata iani.’ 24Sarei, nvr anr, kavr ti a, ‘Ipavr ti m'ertu kinkin iak a kul, ipalev'lei. Inap'i lera, avuirma asnk, sarei nsrani al nap'. Laha, net pluk lera iendan al nap'.’ ”
25Laha, naran a Musis ila ti arm'ertu avmalmal (sena ti a Erun iten sarei a ti avmalmal a ti apavmamih asnr arm'ertu avmlanr), 26ip'tir asn karliu na nut avhl nmah kanuis, kavr ti a, “?Hin ak ip'tir m'ei a Mlin Eia? M'ertu nen ipama asnk.” Laha, arm'ertu a Livai avp'lt kavrav'a asnn. 27Sarei, ivr anr, kavr ti a, “A Mlin Atua a Isrel ivri inap'i laha, ‘Ardu udlani apavlev' tali hanar, kadav'a arna nl nam'el udlani kahiris a nut arm'ertu avhl nmah kanuis aranan. Apavtrpep'nr tv'alr, kavrpep'nr ardu avlap'as anr, kavrpep'nr ardu avlak mima asnr nakl.’ ” 28Sarei, arm'ertu a Livai avani inep'a nut a Musis ivr anr a ti apavani ipanap'ei. Arna napn lera, ardu, la avrs a nadep' ha, avv'i 3,000. 29Sarei, a Musis ivr anr, kavr ti a, “Dika laha, pavtukar kam'i a ti pavv'i nkan a Mlin Eia, a ti ipamhmah a kam'i, sena ti ktvmlen sarar a netm'i m'er tv'elm'i.”
30Laha, arna m'ih nen, a Musis iv'ana m'er arm'ertu, kavr ti a, “Kam'i ktvan sera si stu istudau. Hilaha, kana p'ava eia asn a Mlin Eia. Kam'i ktvan sera si stu, v'eti nsarei p'ani ti pavlak arna tamat m'ei Atua.” 31Sarei, a Musis im'alet asn a Mlin Eia, kavr ti a, “Usa, arm'ertu laha atvan sera si stu lil iamk, katvan atuar m'a kul. 32#Npin 69:28; Rev 3:5.V'eti, pamhmah a si stuar. Ipavr ti ikahei, ntu tamat anh, palev'la nahak al pukam la ktulul sarei ha.” 33Sarei, a Mlin Eia ivr an a Musis, kavr ti a, “M'ertu ien si stu kamlen kana, p'elev'la nahan al pukak. 34V'eti nakm pav'el, kav'av'ar arm'ertu, a ti apavier nut Kana ntvr sarei anh. Palei, Enselak ipatauamu anh. V'eti arna napn a ti p'ama, p'ama a ti si stuar ipam'alet aranar.”
35Laha, a Mlin Eia itep'a m'etien stu lil iarr arm'ertu, sena ti avan net pluk lera, iv'i nki a Erun iani.
Currently Selected:
Avruh 32: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
