Avruh 31
31
A Mlin Eia iv'ara an a Pesalil m'ei Ahuliap
(Avruh 35:30-35; 36:1)
1Laha, a Mlin Eia iv'ana m'ei a Musis, kavr ti a, 2“Palei, Kana ntv'ara sarei an a Pesalil, a natn a Uri, iv'i a natn a Ur, arna nl nam'elan a Suta, ntvr sera nahan. 3Nttu sera M'im'iln Atua ani, ilini ani, kattu sera v'ahien p'as ani, kani ti irndu sei istudau, kani ti irndu mamh ti ipam'akar kan sei istudau. 4Irndu ti ipan sei apala ti ip'eset nakl. Im'akar m'a kul, m'a silva, m'a aian v'il. 5Irndu ti ipatr mamh nav'et p'sp'as nakl, katu mamahr a ti apala ti avp'as. Irndu mamh ti ipatr nai ipap'as, kam'akar m'a sei istudau.
6Laha, palei, ntv'li sarei Ahuliap, a natn Ahisamak, arna nl nam'elan a Tan. Nttu sera v'ahien p'as a nlr m'ertu udlani avan parei m'a lm'ar inap'i lera, a ti apavan si udlani ntvr sarei anh a ti pani. 7Laha, apavan nmah kanuis na tamatan Atua, pukiset na turanienan Atua, napl na vtmien (la iter aranan ha), m'a napl v'aha tiv' uraur na nmah kanuis na tamatan Atua, 8m'a tiv' na nahn Atua (m'a sei apauei a ti apam'akar m'ei), m'a lait aani a kul (m'a sei apauei a ti apam'akar m'ei), m'a tiv' na sida p'as aali, 9m'a tiv' na sakrivais (m'a sei apauei a ti apam'akar m'ei), m'a dis lil m'a tln, 10m'a klus p'asan a Erun iv'i pris, m'a klusan a natn, a ti apavpata Kana arna parei na pris, 11m'a ueil apavisani arna m'ertu a ti ipan parei, m'a sida p'as apali al nutet. Si udlani ntvr sarei anh a ti pani, hir apavani.”
Napn iv'i Sapat iv'iv'en sei
12Laha, a Mlin Eia iv'ana m'ei a Musis, kavr ti a, 13“Pav'ana m'er arm'ertu a Isrel, kavr ti a, ‘Pavuada Sapatak udlani nakl, sena ti iv'i si iamk iv'iv'en sei asnk m'ei asnm'i. A netm'i udlani m'er a m'hip'm'i udlani apavuadei arna pai udlani ipama, a ti pavrndu ti Kana nv'i a Mlin Eia la iani ti kvp'as ha. 14Pavv'ahur Sapat kavuadei a ti ipav'i napnet, sena ti iv'i si p'as asnm'i. Ipavr ti m'ertu kinkin iutakm a napn lera, aparpep'ni pr. Ipavr ti m'ertu ien parei kinkin arna Sapat, apatrla m'ertu nen ikap'lt m'er m'ertuan ml. 15#Avruh 20:8-11; 23:12; 34:21; 35:2; Livai 23:3; TVH 5:12-14.Pavan parei arna napn ipalm'sei, v'eti saru nen iv'i Sapat. Pavrnrn kam'i arna napn lera, v'eti ipav'i napn p'as asn a Mlin Eia. Ipavr ti m'ertu ien parei kinkin arna Sapat, aparpep'ni pr. 16Ipanap'i lera, arm'ertu a Isrel apavv'ahur Sapat, kavuadei iv'i Sapat. A netm'i udlani m'er a m'hip'm'i udlani apavuadei arna pai udlani ipama, iv'i turanien iamk ipav'el kadav'a arna pai ipama uam. 17#Avruh 20:11.Iv'i si iamk idan asnk kav'iv'en sei anr arm'ertu a Isrel ikahiris naran, sena ti a Mlin Eia ien nut eia, kan nut a nadep' arna napn ilm'sei karnrn Hin arna napn saru, karn ip'as.’ ”
A Mlin Eia ihiris a v'nenan, v'eti arm'ertu avan si stu
(Tv'el V'nen Hua 9:6-29)
18Laha, naran ithiris a ti ipav'ana m'ei a Musis, itu nav'et iru ani, a ti aparv'i v'nen. V'nen lera Atua iulul ani m'a nirh lm'an.
Currently Selected:
Avruh 31: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
