Avruh 30

Tiv' na sida p'as aali

(Avruh 37:25-28)

1“Laha, pan tiv' na sida p'as aali ipamk. Pani m'a nai iv'i akeisa. 2Ipap'arei kav'i sentimita inellm' (50). Sarei, tv'eliel ipaier tv'eliel ipav'i sentimita inellm' (50) ml. Ipanap'i lera, tv'eliel ier tv'eliel iru aparnap'amk. Sarei, nut eia ier nut a nadep' ipap'arei kav'i mita ipamk. Pan kuman, v'eti pani m'a tiv', ipav'i nai ipamk uaki. 3Sarei, patu kul p'as aranan, arna nut eia nen, m'ei arna tv'eliel nen, m'ei arna kuman. Sarei, patu kul ipav'i naml pa, ipamldani. 4Sarei, a nv' naml pa lera, pan rin m'a kul iparu arna kkan iru. Pataur arna tv'eliel arru, apavv'i nut apatu nai a nln nakl a ti aparmani. 5Nai lera apavv'i nai iv'i akeisa. Sarei, patu kul aranar. 6Si lera, pataui asn kalik p'arei p'as la iter mima asn pukiset na turanien, asn napl na vtmien la iter eia na pukiset lahara, arna nut Kana p'ama asnm nakl.

7M'etav'aran udlani, a Erun ipatu nap' a sida la ip'eset ha. Naran ien parei kamhmah anr dis papa nakl, ipatu nap' a sida p'as aranan. 8Naran iuirv'a nap' a ti lait ipav'en al dis papa naran nut ilihat, ipatu nap' a sida p'as ml. Ipanap'i lera, m'i sida p'as lera ipaier a Mlin Eia. A netm'i udlani m'er a m'hip'm'i udlani apavuadei arna pai udlani ipama arna nl nam'elam'i. 9Matu sida p'as uraur aranan a ti ipav'i nkan Atua. Matu uvrin aali aranan, v'aha uvrin iv'i uit. Mavisen nauei aranan, inep'a ti iv'i nauei avisani katau an Atua. 10Laha, a Erun ipani ti arm'ertu apavlak arna tamat m'ei Atua, ipatu di sei atvrp sarei kavtau an Atua sena si stu arna kuman ipav'amk arna pai udlani. Ipav'amk arna pai udlani ipani ti pavlak arna tamat m'ei Atua. A netm'i udlani m'er a m'hip'm'i udlani apavuadei arna pai udlani ipama. Ipav'i si p'as ipamk asn a Mlin Eia.”

Nav'et apataui a ti apalak arna tamat m'ei Atua

11Laha, a Mlin Eia ivr an a Musis, kavr ti a, 12“Naran kspanr arm'ertu udlani a Isrel, pavr anr ardu udlani, a ti apavulla silv'ienar asn a Mlin Eia naran kspanr, a ti m'etien lil ikaiarr naran kspanr. 13#Avruh 38:25,26; Mat 17:24.M'ertu udlani kspanr apavtu nav'et ipav'i pna sekel ipamk (1,000 vt). Sekel lera avvr ti iv'i ‘nav'et na nutet’. Ipavr ti kiak a nav'et nahan iv'i kera inelru (20), ki lera iv'i pna sekel iamk, patau an a Mlin Eia. 14M'ertu udlani kspanr, ipavr ti paiar isiv' inelru (20), hir udlani apavuirma nav'et a ti apavtau an a Mlin Eia. 15M'ertu sian istudau ikauirma nav'et ilil kasiv' pna sekel lera. M'ertu sian ihei ipauirma pna sekel lera pr, ikasusupa aranan. Iv'i nav'et apavuirma kavtau an a Mlin Eia, a ti pavlak arna tamat m'ei a Mlin Eia. 16Laha, palev' nav'et na tamat m'ei Atua la arm'ertu a Isrel avuirma ha, katu mamahi, a ti ipav'i sena parei apani al nmah kanuis na tamatan Atua, a ti ipav'i si ipamk ipani ti arm'ertu a Isrel apavv'ahuri nakl, arna nahn a Mlin Eia. Ipanap'i lera, pavani ti pavlak arna tamat m'ei Atua.”

Dis lil

17Laha, a Mlin Eia iv'ana m'ei a Musis, kavr ti a, 18#Avruh 38:8.“Pan dis lil ipamk m'a aian v'il. Patu tln aranan, apavv'i aian v'il. Dis lil lera ipav'i sei aav' nauei nakl a nln. Pataui a p't nut na nmah kanuis na tamatan Atua m'a tiv' na si slm aali katau an Atua, sarei katu nauei a nln. 19Ipanap'i lera, a Erun m'er a natn apavsila mamh lm'ar m'a tlr atlera. 20Naran apavrav'a eim al nmah kanuis na tamatan Atua, apavav m'a nauei lera, a ti akavram'a. Apavani ipanap'i lera naran avrama asn tiv' na sakrivais a ti apavpatei Atua, naran avrama kaval sei katau an a Mlin Eia. 21Apavsila mamh lm'ar m'a tlr ipanap'i lera, a ti akavram'a. Ipav'i v'nen hua ipamk asnr ikahiris naran, ipav'i sanan a Erun m'er a natn udlani apavtauatah ani.”

Ueil p'as avisani arna m'ertu

(Avruh 37:29)

22 # Avruh 37:29. Sarei ml, a Mlin Eia iv'ana m'ei a Musis, kavr ti a, 23“Palev' ru nai p'as kinkin m'in p'as iak. Palev' ueil m'in ip'as, nahan iv'i mir, ipadv kav'i kilu ilm'. Sarei, palev' ru nai p'as m'in ip'eset, iv'i sinamun, iv'i pna nki itauamu, ipadv kav'i kilu iru m'a pnen. Sarei ml, palev' lamu m'in ip'as, ipadv kav'i kilu iru m'a pnen. 24Palev' ru nai p'as nahan iv'i mamak ipadv kav'i kilu ilm' (inep'a nut aspani al nutet), kalev' ueil na uliv ipav'i pna lita ipamk. 25Sarei, pan pumat p'as ipamk aani a ueil. Patup'lten si udlani lera, kani kasapa navanel m'ertu irndu mamh ti ipan pumat p'as nakl isapei. Inap'i lera, ipav'i ueil p'as apavisani arna m'ertu a ti ipan parian Atua.

26Pavisani arna nmah kanuis na tamatan Atua, kavisani arna pukiset na turanienan Atua, 27kavisani arna tiv' na nahn Atua, kavisani arna lait aani a kul m'a si udlani auadei a ti apam'akar m'ei, kavisani arna tiv' na sida p'as aali, 28kavisani arna tiv' na sakrivais, m'a si udlani auadei a ti apam'akar m'ei, kavisani arna dis lil m'a tln. 29Ipanap'i lera, patukarr a ti apavv'i nkan Atua, apavv'i sei p'sp'eset. Ipavr ti m'ertu kinkin ipaiarr, m'ertu nen idmhmah a hin itauamu pr. 30Sarei, pavisen ueil lera aranan a Erun m'er a natn, katukarr, a ti apavpata nahak arna parei na pris.

31Sarei, pav'ana m'er arm'ertu a Isrel, kavr ti a, ‘Si laha ipav'i pumat p'as ipamk aani a ueil m'in ipama asnk. A netm'i udlani m'er m'hip'm'i udlani apavuadei arna pai udlani ipama. 32Mavvisani arna p'ak m'ertu. Mavan pumat uraur inep'a nki laha, v'aha sei kvlav'i a ti pan pumat uraur inep'a nki laha. Iv'i si p'as iamk, kav'i si p'as asnm'i. 33Ipavr ti m'ertu kinkin ien pumat inap'i lera, v'aha itaui arna v'anudl kinkin, apatrla dui nen ikap'lt m'er m'ertuan ml.’ ”

34Laha, a Mlin Eia ivr an a Musis, kavr ti a, “Palev' ru nai p'as kinkin m'in ip'as. Palev' nki nahan iv'i stakti, m'a nki nahan iv'i unika, m'a nki nahan iv'i kalpanum. Patup'ltanr ru nai p'as lera m'a sida p'as iv'i vrankinsens. Apavradv kavnap'amk. 35Pani ti ipav'i pumat m'in ip'eset. Pani kasapa navanel m'ertu irndu mamh ti ipan pumat p'as nakl isapei. Pan mamahi, kani ti ipalvlvar, kav'i si p'as ipamk. 36Sarei, parp pnen m'a ama a ti ipamlmalv, kataui asn pukiset na turanien al nmah kanuis na tamatan Atua, arna nut Kana p'ama asnm. Ipav'i si p'sp'as asnm. 37Naran ktvan sera sida p'as lahara, arm'ertu apavrndu ti amavan nki ipanep'a sera nki nakm kten sarei. Ipav'i si p'as iamk asnm'i. 38Ipavr ti m'ertu kinkin ien sida p'as kinkin inep'a nki nakm kten sarei, a ti iparn m'in, apatrla dui nen ikap'lt m'er m'ertuan ml.”

Currently Selected:

Avruh 30: nmb

Highlight

Copy

Compare