Avruh 25
25
Arm'ertu a Isrel apavuirma sei sena uvrin nakl
(Avruh 35:4-9)
1Laha, a Mlin Eia ivr an a Musis, kavr ti a, 2“Pav'ana m'er arm'ertu a Isrel, a ti apavuirma uvrin asnk. Palev' sei asn m'ertu iuirma m'a nln ip'as a ti ipatu Kana. 3Palev' sei inap'i laha nakl: kul, silva, aian v'il, 4kalik iplu v'aha im'ielm't v'aha im'iel, kalik p'as, m'a nil nani, 5nila p'ak pua na sivsiv, avtu kala aranan a ti im'iel, nila p'ak sikau, m'a nai nahan iv'i akeisa, 6ueil sena lait, ru nai kinkin m'in p'as iak a ti apan ueil a ti apatau arna p'ak m'ertu, kan sei aali, m'in ip'as. 7Palev' nav'et p'as nahan iv'i uniks, m'er nav'et p'sp'as uraur a ti apavtaui arna klus na pris lil, iv'i ivut, m'ei arna sat na v'nen hua. 8Pam'ahu a ti apavan nutetak ipamk, a ti p'elak asnr. 9Ipanep'a nut Kana p'ev'iv'en anh, inep'a m'lk sei na nmah kanuis lil, m'a m'lk sei na si udlani patau a nln, pani ipanap'i lera pr.
Pukiset na Turanien
(Avruh 37:1-9)
10Apavan pukiset iamk, apavani m'a nai iv'i akeisa. Apavani ipap'arei ipaier mita iamk m'a pnen ipav'i sentimita iv'i 25. Tv'eliel ipaier tv'eliel ipav'i sentimita iv'i 75. Eia ipaier a nadep' ipap'arei kav'i sentimita iv'i 75. 11Patu kul p'as aranan, arna nut udlani. Pataui arna p'akn m'ei arna nut a nln. Patu kul ipanep'a naml pa, ipamldani. 12Pan rin ani a kul aparv'a sanan, kataur arna kkan arv'a. Patu rin iparu arna tv'eliel iamk katu rin iparu a tv'eliel uraur. 13Patr nai p'arei nen m'a nai iv'i akeisa, katu kul aranar. 14Patu nai p'arei nen al rin arna tv'eliel na pukiset, a ti aparmani nakl. 15Nai p'arei nen ipater al rin na pukiset, akalev'lei. 16P'etu turanien anh, sarei pataui al pukiset.
17 #
Isrel 9:5. Pan napl ipav'i napl na vtmien a kul uaki, ikap'lt m'a si uraur. Pani ipap'arei ipaier mita iamk m'a pnen ipav'i sentimita iv'i 25. Tv'eliel ipaier tv'eliel ipav'i sentimita iv'i 75. 18Pan ensel nahan iv'i serupim aparru. Panr m'a kul arpi m'a ama. Pataur a tv'eliel m'a tv'eliel na napl na vtmien. 19Patu serupim ipamk arna pnen, katu tv'aln arna pnen uraur. Pan serupim lera, v'eti aparp'lt m'a napl na vtmien arna pnen iru. 20Serupim lera aparah nil heiar eia a ti apartukar napl na vtmien m'a nil heiar. Nahr serupim aparp'a hir karp'a napl na vtmien. 21Patu napl na vtmien arna ual pukiset. Naran p'etu turanien anh, pataui al pukiset. 22Arna nut lera p'elah kav'ana mamh m'ah. P'elak eia na napl na vtmien, kalak a p't nut na serupim arru la avlak arna pukiset na turanien ha. P'etu v'nen hua udlani anh, katau anr arm'ertu a Isrel si udlani ip'lt m'a v'nen hua lera.
Tiv' na P'ret na Nahn Atua
(Avruh 37:10-16)
23Sarei, pan tiv' ipamk. Pani m'a nai iv'i akeisa. Pani ipap'arei ipaier mita iamk. Tv'eliel ipaier tv'eliel ipav'i sentimita iv'i 50. Eia ipaier a nadep' ipap'arei kav'i sentimita iv'i 75. 24Patu kul p'as aranan, arna nut udlani. Patu kul ipanep'a naml pa, ipamldani. 25Sarei, arna tiv' lera, patu dari aranan, v'eti ipasusupa uaki, tv'eliel ipaier tv'eliel ipanep'a lm'a m'ertu uaki. Sarei, patu naml pa ani a kul arna dari lera, ipamldani. 26Pan rin ani a kul arv'a sanan, kataur arna tln arv'a, arna kkan arv'a. 27Patu rin arna nut av'aran, a ti apatu nai p'arei nen a ti aparman tiv' m'er. 28Patr nai p'arei nen ipav'i akeisa, katu kul aranan. Aparman tiv' m'a nai lera. 29Pan dis, m'a vrahpen, m'a putel, m'a panikin a ti apatv'en nauei ani. Pan si udlani lera m'a kul p'as. 30#Livai 24:5-8.Laha, patu p'ret na nahn Atua aranan sanak, arna napn udlani.
Lait ani a Kul
(Avruh 37:17-24)
31Laha, pan lait aani a kul p'as. Pani m'a kul arpi m'a ama. Nut lil nen, m'a ranan, m'a dis atu nap' a nln, m'a sei inep'a nava nai, m'a plaua nen, pavan udlani a kul p'as ipamk. 32Ranan ipalm'sei, patu ranan apartl arna tv'eliel ipamk, katu ranan apartl arna tv'eliel uraur. 33Pan dis papa apartl m'a nava nai m'a plaua arna ranan ipamk, kan dis papa apartl m'a nava nai m'a plaua arna ranan uraur, pani apavnep'a ianei. Inap'i lera, ranan avlm'sei apavandan al lait lera. 34Sarei, arna lait patu dis papa apavnep'a ianei aparv'a. Navar m'a plauar apaviak. 35Patu nava nai ipamk a nv' rana nai arru karnap'amk, katu nava nai ipamk a nv' rana nai arru karnap'amk, katu nava nai ipamk a nv' rana nai arru karnap'amk. Ipanap'i lera, rana nai avlm'sei apavandan al lait. 36Navar m'a ranar apavnap'amk. Pan lait udlani m'a kul p'as iamk uaki, aparpi m'a ama. 37Pan dis papa apavsaru. Sarei, pauirma nap' a ti lait ipav'en, kani ti lait ipar arna nahn. 38Sei apatr kalik iv'a al ueil m'ei, apani a kul p'as. Dis ipater a nv' ueil, apani a kul p'as. 39Palev' kul p'as kilu nen ineltl (30) kan si udlani a kul lera. 40#Parei 7:44; Isrel 8:5.Arna m'lk sei nv'iv'en anh arna ptha lil, pani ipanap'i lera pr.”
Currently Selected:
Avruh 25: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
