Avruh 24

A Musis m'er arelta avrav'a arna ptha lil iv'i Sainai

1Laha, a Mlin Eia ivr an a Musis, kavr ti a, “Pama eia asn a Mlin Eia, nakm m'ei a Erun, a Netap, Apihu, m'er arelta a Isrel la avnelsaru (70) ha, kavpata nahak, v'eti pavlak au. 2A Musis ipamamk kamima asn a Mlin Eia, v'eti hir uraur akavmima. Arm'ertu akavsapei kavrav'a eia.”

3Laha, a Musis ima asnr arm'ertu kavrp'ep'a v'nen udlani m'a v'nen hua udlani a Mlin Eia itvr sarei ani. Sarei, arm'ertu udlani avvrprani, kavvrp'ep'a v'nen iamk uaki, kavvr ti a, “Kam'em' p'van si udlani a Mlin Eia itvr sarei ti p'vani.” 4Sarei, a Musis iulul a v'nenan a Mlin Eia udlani. Sarei, ithal m'etav'aran nrnren, kahl nev'etet iamk arna pna ptha, kah nav'et inal lman iru (12), sena ti nl nam'el a Isrel inal lman iru (12). 5Sarei, itap'er malakal kinkin avv'i ardu a Isrel, a ti apavan uvrin aali, kavrp pluk ipav'i uvrin sena tamat, ipav'a asn a Mlin Eia. 6Laha, a Musis ilev' pna di pluk kataui al dis kinkin. Duanan ivisani arna nev'etet. 7Sarei, ilev' Puk na Turanien kavrp'ep'a v'nen iter a nln. Arm'ertu avv'rn ani, kavr ti a, “Si udlani a Mlin Eia itvr sarei, kam'em' p'vani pr, p'vsapa v'nen hua udlani.” 8#Mat 26:28; Mak 14:24; Luk 22:20; 1 Kurin 11:25; Isrel 10:29; Isrel 9:19,20.Laha, a Musis ilev' di pluk, kavisani aranar m'ertu, kavr ti a, “Di pluk laha iv'i turanien a Mlin Eia iani m'a kam'i. V'nen udlani laha iv'iv'en si lera a kam'i.”

Arna ptha lil m'ei Atua

9Sarei, a Musis iv'a eia m'er a Erun, a Netap, m'ei Apihu, m'er arelta a Isrel avnelsaru (70). 10Laha, avlei Atua a Isrel. A nv' tln, avla ti nadep' inep'a sera savaia, nav'et lera ip'eset kanep'a sera p'knaran eia. 11V'eti Atua iatu lm'an aranar ardu lilil a Isrel. Inap'i lera, avlei Atua, kavhatat kavm'nm'n.

12Laha, a Mlin Eia ivr an a Musis, kavr ti a, “Pama eia asnk arna ptha lil kalak. Kana p'etau anh puk ani a nav'et, m'a v'nen huak udlani ntulul sarei, a ti nakm pavrp'ep'ei.”

13Laha, a Musis m'ei a Susua, la isr lm'an a Musis nakl ha, arp'tir, sarei a Musis iv'a kam'i arna ptha lilan Atua. 14Laha, ivr anr arelta, kavr ti a, “Kam'i pavtrah kam'em' ipaier naran p'erm'alet asnm'i. Palei, hin a Erun m'ei a Hur arlak m'a kam'i. Ipavr ti dui kinkin ipasla ti si kinkin ihua, hin ipav'a asrr.” 15Laha, a Musis iv'a kam'i arna ptha lil, iv'amk m'a ti p'knaran iamk itukar ptha lil.

16Laha, si p'sp'asan a Mlin Eia iter arna ptha lil iv'i Sainai. P'knaran itukari napn ilm'sei, sarei, arna saru na napn, a Mlin Eia, la ilak al p'knaran ha, iv'ara an a Musis. 17Naran arm'ertu a Isrel avla si p'sp'asan a Mlin Eia arna ual ptha lil, avla ti inep'a nap' lil ihahan kal si udlani. 18#TVH 9:9.Laha, a Musis iv'a al p'knaran kam'i arna ptha lil. Laha, a Musis ilak arna ptha lil napn inelv'a (40), ren m'a lihat.

Currently Selected:

Avruh 24: nmb

Highlight

Copy

Compare