Avruh 12
12
A Mlin Eia itu tim'ah lil nahan iv'i Pasuva
(Nut Kaka 9:1-14; Tv'el V'nen Hua 16:1-8)
1 #
Livai 23:5; Nut Kaka 9:1-5; 28:16; TVH 16:1,2. Laha, a Mlin Eia ivr an a Musis m'ei a Erun arna nut a Itsip kavr ti a, 2“Nal laha ipav'i tertauamu na pai m'dah. Ipatauamu a pai asnm'i. 3Parvr anr arm'ertu a Isrel udlani karvr ti a, ‘Arna nal laha, pln ipanal, m'ertu udlani p'sev' apavlev' net sivsiv ipaviviln a nelnal udlani avlak al nmahan a tetian.
4Ipavr ti nmah kinkin isusupa, sivsivan ihei, apam'ahu a ti ipap'lt m'a nmah iter mima asnn. Apavlev' sivsiv ipaviviln a m'ertu udlani. Pavspan m'ertu sena sivsiv inep'a nut avrn ti apavhani ipanap'ei. 5Sivsiv apavuei, apavua terp'as nen, m'nh nut kinkin imahei aranan, kav'i pua nen, paian idahmk. 6Apavp'auri dav'a ipaier ti nal laha pn ipanal lman iv'a; arna napn lera knarev', m'ertu a Isrel udlani apavrpep'ni. 7Akvlev' din kinkin pr kavtaui arna nakal na karliu na nmah m'a krus nen, sarei kavhani al nmah nen. 8P'ak sivsiv apavhani arna lihat lera, apavtahpei al nap', kavhan p'ret iis nen ihei m'a ru nai ihaau istudau.
9Mavhani ipam'dah, v'aha mavukuki a ti ipam'ah m'a nauei. V'eti pavtahpei al nap', m'a ptn, tln, m'a si udlani al v'atn. 10Mavln pna tim'ah ipater ipaier m'etav'aran. Nut kinkin kaavhani, pavali ipahapu al nap'. 11Pavhani ipanap'i laha. Pavv'u sitrav, kavpas sus, kavua napilakt al lm'am'i. Pavhatat kavrakn ani sena ti iv'i Pasuvan a Mlin Eia.
12Sena ti kana p'ev'el dan a tv'eliel na nut a Itsip kaier a tv'eliel lihat dika, karp titiamu udlani arna nut a Itsip, m'ertu m'a si dm udlani. P'utakm anr atua udlani arna nut a Itsip. Kana uaki nv'i a Mlin Eia. 13Nadei lera ipav'iv'en si kinkin al nmah kvlak a nln. Naran p'ela nadei p'ev'siau kaln kam'i a ti der lil ikaier kam'i kutakm a kam'i, naran p'erp v'anu a Itsip.
14 #
Avruh 23:15; 34:18; Livai 23:6-8; Nut Kaka 28:17-25; TVH 16:3-8. Napn lera ipav'i napnam'i a ti pavv'ahuri nakl, kavuadei kavan tim'ah nakl kavv'ahur a Mlin Eia. Pavan tim'ah nen ipel. A netm'i udlani m'er a m'hip'm'i udlani apavuadei arna pai udlani ipama. Pavan si lera ipav'i tim'ah asnm'i a ti pavv'ahuri ipel. 15Napn ipasaru, pavhan p'ret iis nen ihei. Arna napn itauamu nen, pavlev'la iis udlani iter al nmaham'i, sena ti m'ertu ihan p'ret iis nen iak, arna napn itauamu ier napn isaru, apalev'lei asnr m'ertu a Isrel. 16Arna napn itauamu pavp'lt arna napnet kavan m'itin. Arna napn saru nen, pavp'lt arna m'itin na napnet ml. Mavan parei arna napn nen. Pavan parei uaki kvrndu ti pavani a ti pavhatat. 17A ti pavuada mamh Tim'ah Lil na P'ret Iis Nen Ihei. Sena ti arna napn laha nlev'la kam'i kvstudau, la kvv'i m'rnurak ha, al lm'ar ardu a Itsip. Sena si lera pavuada napn lera ipav'i v'nen hua asnr a netm'i m'er a m'hip'm'i ikahiris naran.
18Arna nal itauamu, napn ipanal lman ipav'a (14) knarev', pavhan p'ret iis nen ihei, dav'a ipaier pn nal ipanelru neltl nen ipamk (21) knarev'. 19Arna napn saru, iis imahter al nmaham'i. M'ertu ihan sei iis iter a nln, arna napn lera, apavlev'lei imap'lt m'a m'ertu a Isrel. Ipavr ti iv'i m'ertu iak arna v'anu, v'aha v'anudl, mkvan si lera pr m'ei. 20Arna napn na tim'ah lera mavhan si kinkin iis iter a nln. Al nmaham'i udlani pavhan p'ret iis ihei a nln.’ ”
21Sarei, a Musis iv'ara anr elta udlani a Isrel kavr anr kavr ti a, “Pavv'li sivsiv ipaviviln a nl nmaham'i udlani a ti pavrpi sena Pasuva. 22Pavlev' rana nai iv'i isup kinkin, kavtaui al din iter al dis, kavvisen krus m'a nakal iru m'a nadei udlani iter al dis. Kam'i kinkin imaruh al nmahan arna lihat udlani ipaier m'etav'aran. 23#Isrel 11:28.Sena it a Mlin Eia ipadan a tv'eliel a nut a Itsip kaier tv'eliel a ti iparp ardu a Itsip. Laha, naran ipala nadei arna krus m'a nakal iru, a Mlin Eia ipasiv' karliu nen, ikam'ahu a ti ensel na ti iputakm m'ertu ipama eim karp kam'i. 24Pavuada napn lera kavv'ahuri m'er a netm'i dav'a ikahiris naran, sena ti Atua itaui. 25Laha, naran pavrama arna nadep' a Mlin Eia ipatu kam'i, la itturan sarei ani ha, pavuada napn laha ipahua. 26Laha, naran a netm'i apavvr a kam'i kavvr ti a, ‘?Nvuada napn laha sena v'ata?’ 27Pavvr anr kavvr ti a, ‘Ki laha iv'i sakrivais na Pasuva sena ti a Mlin Eia isiv' nmahar m'ertu a Isrel udlani avlak a Itsip, naran irp nelnal a Itsip, kamhmah a nmahad.’ ” Laha, arm'ertu a Isrel aviaul kavpatei Atua. 28Sarei, m'ertu a Isrel avv'el kavani inap'i lera, inep'a nut a Mlin Eia ivr an a Musis m'ei a Erun inap'ei.
Snal na der lil iv'i ti Atua irpep'nr titiamu
29 #
Avruh 4:22,23. Laha, arna p't lihat, a Mlin Eia irp titiamu udlani arna nut a Itsip, avv'i a natn titiamu nan a Veru la ilak arna napl p'asan ha, dav'a kaier titiamu na m'ertu ilak al p'resin, m'er net titiamu na si slm udlani. 30Laha, a Veru ithal arna lihat m'er m'ertuan udlani m'er arm'ertu Itsip udlani, kavtakal istudau arna nut udlani a Itsip, sena ti al nmah ihei la titiamu iahm'a ha.
Arm'ertu a Isrel avruh arna v'anu a Itsip
31Sarei, iv'ara anr a Musis m'ei a Erun arna lihat lera kavr ti a, “Pavthal kavv'el kavruh asn m'ertuak udlani, kam'i m'er arm'ertu a Isrel udlani. Pavrav'a kavpatei a Mlin Eia, inep'a nut ktvvr sarei inap'ei. 32Pavlev' sivsivam'i m'a plukam'i inep'a nut ktvvr sarei inap'ei kavv'el kavruh kavmhmah a kana.”
33Laha, arm'ertu Itsip udlani avvr anr kavtp'r ihua kavtap'er a ti apavruh arna v'anu, kavvr ti a, “Imahei ti kam'em' udlani p'vrhap'ni.” 34Laha, m'ertu a Isrel avlev' vlaua atvhuhap'lten sarei naran iis nen idathal mamh a nln, kavhuda dis na vlaua al kalik kavuei arna var. 35#Avruh 3:21,22.Arm'ertu a Isrel udlani atvan sarei inep'a nut a Musis ivr anr inap'ei. Katvrav'a sarei kavmiman neiau iv'i silva m'a kul, m'a klus. 36A Mlin Eia iten sarei kani ti arm'ertu a Itsip avrn ip'as a ti apavtu si udlani avmiman anr. Laha, avlev' siar m'ertu Itsip istudau.
37Laha, m'ertu a Isrel avv'el dan arna nut a Ramsis kavrav'a arna nut a Sukut. Hir udlani avv'i sikis antret tausen (600,000), ahavspan mardel. 38M'ertu avstudau, la avandan a nut ururaur ha, avsapar kavv'el m'er, kavua sivsiv, nani m'a pluk istudau. 39Laha, avtahpa p'ret iis nen ihei a vlaua nen atvuha sarei kavuei dan a Itsip. Iis nen ikam'akar sena ti avtp'avr apavruh pr a Itsip ipalahml, sena ti ahavandedp' tim'ah kinkin sena navanel.
40 #
Ap'u 15:13; Kalesia 3:17. Pai arm'ertu a Isrel avlak arna nut a Itsip inelnal iv'av'a pln ineltl (430). 41Laha, naran pai inelnal iv'av'a pln ineltl (430) ihiris hara, arna napn nen Isrel udlani, la avv'i m'rnuran a Mlin Eia ha, avruh arna v'anu a Itsip. 42Lihat nen iv'i napn iamk apavuadei ipahua asn a Mlin Eia, sena ti ilev'lar arna v'anu a Itsip. Lihat lera iv'i nut lihatan a Mlin Eia. M'ertu Isrel udlani akvuadei pr ikhua m'er a natr m'er a m'hip'r udlani apavtauatah anr.
V'nen hua ier tim'ah lil iv'i Pasuva
(Ap'u 17:9-14; Avruh 12:1-13)
43Laha, a Mlin Eia ivr an a Musis m'ei a Erun kavr ti a, “Ki laha iv'i v'nen hua na Pasuva. V'anudl kinkin ikahani. 44V'eti m'ertu na m'akarienam udlani, la kuli katen sera p'au anr ha, avrndu ti apavhani. 45V'anudl kinkin v'aha m'ertu na m'akarienam la kulr sena pariam ha akavhani. 46#Nut Kaka 9:12; Sun 19:36.Pavhani al nmah iamk uaki. Mavtu m'it kinkin ipav'a av'aran a nl nmah. Mavkapr a sun kinkin. 47Kam'i udlani kvv'i m'ertu Isel pavhani pr. 48Naran v'anudl kinkin la ilak m'a kam'i ha irn ti ipan Pasuva asn a Mlin Eia, dui udlani avlak asnn akvan p'au pr, sarei irndu ti ipap'lt m'a kam'i kahani. Laha, ipama kanep'a kam'i kvv'i m'ertu a Isrel. Sena dui iahan p'au ikahan Pasuva. 49V'nen hua iamk uaki iak, iv'i nk a m'ertu a Isrel m'a nk a v'anudl la ilak m'a kam'i ha.”
50Laha, arm'ertu a Isrel udlani avan sei a Mlin Eia ivr an a Musis m'ei a Erun. Avan si udlani a nut ivr anr inap'ei. 51Laha, arna napn lera, a Mlin Eia ilev'lar m'ertu udlani avruh arna v'anu a Itsip, kavv'i m'rnuran Atua arna nl nam'elar udlani.
Currently Selected:
Avruh 12: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
