Avruh 11

A Mlin Eia ivrp'ep'a ti a natn titiamu nar arm'ertu a Itsip apavram'a pr

(Avruh 3:21-22; 12:35-36)

1A Mlin Eia ivr an a Musis, kavr ti a, “P'etep'a der ml ki ipamk aranan a Veru m'a nut a Itsip. Sarei, ti hin ipam'ahu a ti pavv'el kavruh atlaha. Naran ipam'ahu a ti pavv'el, nvrdaui, ipatp'ev' kam'i pavhiris dudau arna nut laha. 2Pav'ana hilaha m'er arm'ertu a ti apavrni, kavr a dui m'a tav'et udlani apavmiman anr m'ertu avlak mima asnr a ti apavtu sei anr arna silva m'a sei ani arna kul.” 3Laha, Atua iani ti m'ertu a Itsip avv'ahuri ihua a ti apavtu sei anr arm'ertu a Isrel. Laha, arna naran lera nen a Musis iv'i dui lil arna nut a Itsip, arna nahr arm'ertu na m'akarienan a Veru m'ei arna nahr m'ertu udlani.

4Laha, a Musis ivr ti a, “A Mlin Eia ivr ti a, ‘Arna p't lihat, kana p'etpeia a p't nut na nut a Itsip. 5Laha, net titiamu udlani arna nut a Itsip apavram'a, ipatu hin aranan a net titiamu nan a Veru la ilak arna napl p'asan ha, kaier net tav'et la ihitev' uit ha, kaier net titiamu na pluk udlani. 6Laha, apavtakal ipastudau arna nut udlani a Itsip, ahavvalau inap'i lera tituei, akavvalau iknap'i lera ml naran kinkin. 7V'eti lip'ah kinkin ikahamk iksuala m'ertu a Isrel v'aha si slmar kinkin, a ti kam'i pavrndu ti Atua itupr m'ertu Itsip asnr m'ertu a Isrel.’ 8Veru, m'ertu na m'akarienam udlani apavrama asnk kaviaul asnk kavvr ti a, ‘!Nakm m'er arm'ertu udlani la avsapah ha, pavruh!’ Atah si lera, kana p'eruh.” Laha, a Musis nln irer istudau, kaln a Veru.

9V'eti a Mlin Eia ivr an a Musis kavr ti a, “A Veru ikav'rn a kam'i, sena ti Kana p'en pari lil ipastudau ipalinkar nut a Itsip.” 10A Musis m'ei a Erun aran pari lilil udlani arna nahn a Veru, laha a Mlin Eia iani ti nln a Veru ima kahua mau, a ti imam'ahu a m'ertu a Isrel apavruh arna v'anuan.

Currently Selected:

Avruh 11: nmb

Highlight

Copy

Compare