Avruh 10
10
Satl na der lil iv'i tapat
(Suil 1:2-4)
1Sarei, a Mlin Eia ivr an a Musis, kavr ti a, “Pav'a asn a Veru, sena ti Kana nten nln ithua sarei m'er nlr m'ertu na m'akarienan a ti p'ev'iv'en pari lilak lera arna nahn. 2A ti nakm parndu ti pavr anr a natm m'er a m'hip'am al drlnar si lilil Kana nten sarei a Itsip, m'a pari lililak avtah ani, la nten sarei asnr ha, a ti kam'i pavrndu ti Kana nv'i a Mlin Eia.”
3Laha, a Musis m'ei a Erun arv'a asn a Veru, karvr ani, karvr ti a, “A Mlin Eia, iv'i Atuar m'ertu a Isrel ivr ti a, ‘?V'aran nakm pani ti nlm ipav'a a nadep' arna nahk? Pam'ahu a ti m'ertuak apavrav'a a ti hir apavpata nahak. 4V'eti ipavr ti mkam'ahu a ti apavrav'a, parn, m'ih kana p'etep'a tapat ipastudau ipama arna v'anuam. 5Hir apavtavkar nut udlani arna nadep', a ti m'ertu kinkin ikala nadep' ml. Laha, apavhan sei iter uam, la ptir ais iutakm ani ha. Hir apavhan tim'ah papa iter uam al pitvetam'i. 6Laha, hir apavlin nl nmaham m'a nl nmahar m'ertu na m'akarienam m'a nl nmahar m'ertu a Itsip udlani. Ipav'i sei a tetiam'i m'ei a pupuam'i ahavmulei naran kinkin, arna naran hir avlak arna nadep' dav'a ier dika.’ ” Sarei, ivavp'la hin karuh asn a Veru.
7Laha, arm'ertuan a Veru avvr ani kavvr ti a, “?Aulera ipuhalili nakd ipaier v'aran? Pam'ahu a ti dui apavrav'a kavpatei a Mlin Eia iv'i Atuar. ?Nakm kaarndu ti nut a Itsip itstu sarei?”
8Sarei, avlev' a Musis m'ei a Erun kavuirv'a ml asn a Veru. Laha, ivr anr kavr ti a, “Kam'i pavrav'a kavpatei a Mlin Eia, iv'i Atuam'i. ?V'eti hir ak apavrav'a?”
9A Musis ivr ti a, “Kam'em' p'vv'el m'er malakal m'er arm'ertarep'am'em' m'er a netm'em' dui m'er a netm'em' tav'et m'er sivsivam'em' udlani m'er plukam'em' udlani, sena ti kam'em' nkvan tim'ah asn a Mlin Eia pr.”
10Sarei, ivr anr kavr ti a, “Ip'as a ti a Mlin Eia ipalak m'a kam'i, ipavr ti kana p'em'ahu a ti kam'i pavruh m'er mardelam'i udlani. Pavv'ah kam'i, nsarei der kinkin itrah ti ipaier kam'i. 11!Ikahei! Kam'i uaki kvv'i dui pavv'el kavpatei a Mlin Eia, sena ti si lera iv'i sei kvrni.” Sarei, avtp'av'r avruh asn a Veru.
12Sarei, a Mlin Eia ivr an a Musis kavr ti a, “Pah lm'am ipaluvn a nut a Itsip a ti tapat apavrama arna nut a Itsip kavhan si udlani isi arna nadep', iv'i sei iter uam, la ptir ais iutakm ani ha.” 13Laha, a Musis iah napilaktan iluvn a nut a Itsip, sarei a Mlin Eia itep'a nalen itvtv dan arna Is, itvtv arna nadep' arna napn lera m'a lihat lera dav'a dav'a. Naran iv'i m'etav'aran, nalen la itvtv dan arna Is ha, iuirma tapat. 14#Rev 9:2,3.Sarei, artapat lahara avtetv kavlinkar v'anu udlani a Itsip kavrap's arna nut udlani a Itsip, kavnelnal istudau. Tituei tapat ahavnelnal kavnap'i lera. Laha, ikanap'i lera ml naran kinkin. 15Sena ti avlinkar nadep' udlani ti nut ima kadam't inep'a m'alk. Hir avhan ru nai udlani alaui arna nadep', m'a nava nai udlani, la ptir ais iutakm ani ha. Iani ti si kinkin inep'a sera nava nai v'aha ru nai ihei ml arna ranan, m'a si udlani iter al pitvet arna nut udlani a Itsip.
16Sarei, a Veru irakn kav'ara an a Musis m'ei a Erun, kavr anr kavr ti a, “Kana nten sera si stu kamlen a Mlin Eia la iv'i Atuam'i ha, kan si stu kamlen kam'i. 17Hilaha, nvrdaui, nrn ti parmhmah a si stuak, kartu tamat asn a Mlin Eia, iv'i Atuam'i, sena ti ipalev'la m'ien la ier kana ha.” 18Sarei, a Musis iln a Veru kadav'a katu tamat ihua asn a Mlin Eia. 19Laha, a Mlin Eia ivav nalen, ima kav'i nalen iendan arna Ues, katvluar tapat udlani kasranr al Nata M'iel. Laha, tapat kinkin iahamk ml arna v'anu a Itsip. 20V'eti a Mlin Eia iani ti nln a Veru ima kahua ml, a ti hin ikam'ahu a ti arm'ertu a Isrel apavv'el.
Sav'et na der lil iv'i ti nut im'alk
21Sarei, a Mlin Eia ivr an a Musis kavr ti a, “Pah lm'am ipaviviln ipav'a eia, a ti nut ipam'alk arna v'anu a Itsip, ipav'i m'alk la m'ertu irndu ti iparni ha.” 22#Npin 105:28; Rev 16:10.Laha, a Musis iah lm'an iviviln a nut eia, sarei m'alk istudau ima arna v'anu a Itsip napn itl. 23Hir ahavlela hir ml. Hir kinkin ahavp'tir kavruh arna m'lnar napn itl, v'eti arm'ertu a Isrel nut ren iter arna nut avlak.
24Sarei, a Veru iv'ara an a Musis, kavr ani, kavr ti a, “Pavrav'a kavpatei a Mlin Eia, kavv'el m'er mardelam'i, v'eti pavln plukam'i m'a sivsivam'i uaki apavlak.”
25V'eti a Musis ivrprani, kavr ti a, “Mkvtu kam'em' si slm pr a ti kam'em' p'vrpi kavali kavtau an a Mlin Eia iv'i Atuam'em' ha. 26Plukam'em' akvrama m'a kam'em' pr, navrn ti si slmam'em' kinkin ipater. Kam'em' nkvuei pr a ti p'vpatei a Mlin Eia la iv'i Atuam'em' ha, sena ti kam'em' navrndu sei p'vpatei Atuam'em' m'ei dav'a dav'a ipaier naran p'vier a nut nen.”
27V'eti a Mlin Eia iani ti nln a Veru ihua ml. Sena si lera iam'ahu a ti hir apavv'el. 28Sarei, a Veru ivr ani, kavr ti a, “Paruh asnk. Pav'ahurh pr, sena ti narn ti pala nahk ml. Ipavr ti pala nahk, arna naran nen lera parhap'ni.”
29Laha, a Musis ivr ti a, “Nakm kvrdaui. Kana nkala nahm ml naran kinkin.”
Currently Selected:
Avruh 10: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
