Tito 1
1
1Paolo, mbanda wa Mulungu, ni apostolo wa Yesu Kristo, kwa ndingo wa kiyitakiso kya wakuhagulika wake Mulungu, ni kufimanyisa fya chakaka fiyii kwa ndingo wa kungwilakimbo Mulungu, 2pa kihuwalilo kya kulama kwa miaka, kula akakulagiti Mulungu, uyu ahotola lepa kudeta, palongolo pa ngumbi sya miaka ni miaka; 3leka pa ngumbi sya yombe mwene akalilasiti lilowe lyake pa tangazo, iyi nikakamulasiki nayo kwa ndingo wa luwimbi lwa Mulungu Njokosi witu; 4kwa Tito, mwanangu wa chakaka kwa ndingo wa kiyitakiso wakuhasangana mumu: Neema ni kindamba kuhuma pa Mulungu Dadi nu Kristo Yesu Njokosi witu.
5Kwa ndawa iyi nikakulekiti pa Krete, nausi ugolose fila fikalemwiki, ni uwike wakulu‐wakulu pa likaya liyi lyoha, umu nenga nikakutaukili; 6mundu wona ayi wangapisika mhalo, ngwanamundu wa ndala yumonga, wakutama na wana wakukela, awa wangapisika mihalo ya kutumbulana pangi ya likomo. 7Pakuya askofu alinganila kuya wangapisika mbifu, kihwanakiso kya wakugoha fyuma fya Mulungu; nakuya wa kinywinda, nakuya wa kufyoma, nakuhwela pa ugimbi, nakutowana, nakugana mbendo ya lihamu; 8koma wakuwakemelesa wageni, wakufigana finofu, wakwihotola pa maholo, wa malinga, mbalafu, wakwigoha; 9kikamulile lilowe lya kiyitakiso ili liyii kwa ndingo wa mayigaliso, nausi aye wakuhotola kukila pa mayigaliso ga kusangalukisa, ni kuwapisa wa waka wa mapindikano.
10Pakuya wayili wandu wa mahele wangali kwigoha wicho, wakujowa malowe ga waka waka ni wakusowesa, muni muni awa wa pa kusilimuka, 11milomo ya awa ilinganila kulekeka; wandu awa wabomola nyumba sya mfilimila, pa kuyigalisa fila fiwalinganila lepa, kwa ndawa ya mbendo ya lihamu. 12Akajowiti yumonga wa wombe, wakulweta wa wene, Wa Krete magono goha wa mageya, filugu fiwifu, maleme ga ukata. 13Ulungamakiso uwu uyii wa chakaka. Kwa ndawa iyi uwapise mhalo udumuli, nausi wasangaluke pa kiyitakiso, 14wasiyufwana sumu sya waka sya waYehudi, ni mimbi sya wandu awa wapatukeye pa fya chakaka. 15Fyoha fiyii fiwalafu kwa wala wawalafu: koma kwa wala wawifu na wangali kukela pa waka kandu kawalafu; koma maholo gawe na chengo kyawe kya pa mwoyo kawili gayanangiki. 16Wafumbula kukita wammanya Mulungu; leka pa makitiko gawe wankanila, pakuya wawifu, na wangayufwana, ni wangalingika pa lihengo liyi lyoha linofu.
Currently Selected:
Tito 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
